¿QARI tukuqllaña kaspa maqakuq warmakunata riqsinki?... ¿Paykunawan kaytachu munanki icha hawkalla kaqkunawan kaytachu?... Jesusmi nirqa: “Mayna kusisqam hawkayachiqkunaqa, paykunamiki ‘Diospa churin’ nispa sutichasqa kanqaku”, nispa (Mateo 5:9).

Hawka kakuyta munaptinchikpas kanmi piñachiwaqninchik runakuna ¿aw?... Chaymi wakinpiqa kutipakuyta munachwan. Jesuspa qatiqninkunapas chaytam ruwayta munarqaku Jerusalenman Jesuswan kuska risqankupi. Chaymanta willasqayki.

Allin puriytaña richkaptinkum Jesusqa wakinta kacharqa Samaria lawpi llaqtachaman samana wasita maskanankupaq. Hinaptinmi chaypi runakunaqa  sapaq religionniyuq kasqankurayku mana samachiyta munarqakuchu. Chay runakunaqa Jerusalenpi Diosta yupaychaq runakunawanmi mana apanakuqkuchu.

¿Imatam Santiagowan Juanqa mañakurqaku Samaria llaqtayuq runakunapaq?

Qamta pipas mana samaykachisuptikiqa, ¿imatataq ruwawaq? ¿Piñakuruspachu imanaruytapas munawaq?... Chayna piñakusqankuraykum Santiagowan Juanpas Jesusta nirqaku: ‘Señor, ¿munawaqchu hanaq pachamanta nina uraykamuspan kay runakunata chinkarachinanpaq ninaykuta?’, nispa. Jesusñataqmi chay nisqanku mana allin kasqanrayku paykunata qaqcharqa. Hinaspapas “rayopa churinkuna” nispam paykunata riqsirqa (Lucas 9:51-56; Marcos 3:17).

Arí, wakinpiqa pipas nanay simiwanmi imatapas niwachwan. Ichapas wakin warmakunaqa nisunkiman: “Manam munanikuchu qanwan pukllaytaqa”, nispa. Hinaptinqa hukmanyanchikmi ¿aw? Ichapas chayrayku imanaruytapas munachwan. Ichaqa, ¿allinchu kanman?...

Qawasun bibliapi chaymanta ima niwasqanchikta. Proverbios 24 capitulopa 29 versiculonpim nin: ‘Ama niychu: Ruwawasqanta hinallam ñuqapas ruwasaq’, nispa.

¿Imatam kayqa yachachiwanchik?... Kutipakuyqa mana allin kasqantam Chayna kaptinpas wakin runaqa piñakunaykita munaspam tukuyta rimaspa tratapasunkiman. ¿Imatam ruwawaq pipas chaynata nisuspayki sikuta qawachisuptiki? ¿Qampas sikuwanchu kutiriwaq?...

Chaypaqyá kaqmanta qawasun bibliapi Jesuspa ima niwasqanchikta. Mateo 5 capitulopa 39 versiculonpim nin: ‘Amayá mana allin runapa contranpiqa churakuychikchu, aswanqa alliq law uyaykipi laqichurusuptikiqa huk lawnintapas  qawaykachiyyá’, nispa. ¿Ima niytataq munachkarqa? ¿Pipas uyaykipi sikurusuptiki huk lawninpipas sikuchikunaykitachu?...

Manam. Pipas laqichusuqnikiqa utaq tanqakachasuqnikiqa takatam maskachkan. Ichaqa, ¿imataq kanman piñakuspa kutiriptikiqa?... Pampapichiki siku qusnirinman.

Chayraykum Jesusqa nirqa pipas chaynawaptinchikqa ama kutipakunapaq. Kutipakuspaqa taka maskaq runa hinañam rikuriruchwan.

Hinaptinqa, pipas laqichusuptikiqa utaq tanqakachasuptikiqa, ¿imatam ruwanayki?... Ama kaqpaqpas hapispam asurikunayki. Kaqmanta tanqakachasuptikipas asurikuptikiqa manam  imapas kanqañachu. Chaytaqa ruwanki manam manchati kaspaykichu, aswanqa allin ruwaq kaspaykim.

¿Imatam ruwachwan pipas ñuqanchikwan maqanakuyta munaptin?

Ichaqa, ¿imataq kanman hapinakuruspa payta maqaparuptikiqa?... Yapachiki achkaña maskamusunkiman kaspiwan utaq rumiwan tukusunaykipaq. Hawkachiki cuchillowanpas maskamusunkiman. Chayraykuchá Jesusqa nirqa pipas rabiachiwaptinchikqa ama kutipakunapaq. Icha, ¿ima niwaqtaq?...

Chaymantapas, ¿imatam ruwachwan runakuna maqanakuqta qawaspaqa? ¿Huk kaqninmanchu sayapakunanchik?... Bibliam Proverbios 26 capitulopa 17 versiculonpi nin: ‘Hukpa quejanman chapukuyqa allquta rinrinkunamanta hapiruy hinam’, nispa.

¿Imanasqataq runakuna maqanakuptinku yanapayqa allquta rinrinmanta hapiy hina? Ima sasachakuymanpas churasusqaykiraykum

¿Imataq kanman allquta rinrinmanta hapiruptinchik? Kachuruwachwanmi. Hinaptinqa, ¿yaqachu kachurachikuyta mana munaspa rinrimanta tukuy punchaw hinalla hapirayawaq?...

Chaynam ima sasachakuymanpas wichiykuchwan runakuna maqanakuptin yanapaq yaykuspaqa. Manam yachanchikchu imamanta maqanakusqankutaqa. Ichapas maqasqanku runaqa imatapas suwakururqa hinaptin maqachkanku. Chaymi mana yachaspa suwata yanapachkachwan. Chayqa manam allinchu ¿aw?

 Chaynaqa, ¿imatam ruwachwan runakuna maqanakuqta qawaspaqa?... Escuelaykipi kaptinqa profesornikimanmi willaykuwaq. Huk lawpi kaptinñataqmi policiaman utaq tayta-mamaykiman willaykuwaq. Runakuna maqanakuyta munaptinkupas ñuqanchikqa hawka kawsakuytam maskananchik.

¿Imatam ruwawaq runakuna maqanakuptinku?

Jesuspa qatiqninkunaqa tukuytamá ruwanchik piwanpas maqanakuyman mana chayanapaq. Chaynata ruwaspanchikmi qawachinchik allin ruwaq runakuna kasqanchikta. Bibliapim nin: “Señorpa sirvientenqa manam peleananchu, aswanqa llapallanwanmi allinlla kanan”, nispa (2 Timoteo 2:24).

Piwanpas maqanakuyman ama chayanapaqyá qawasun Romanos 12: 17-21 hinaspa 1 Pedro 3:10, 11.