PASAQ yachachikuypim runakunata sinchi parawan manaña chinkachinanmanta Jehova Diospa nisqanta yachamurqanchik ¿aw?... Diosqa chirapatam puyupi rikurichirqa chayta qawaspa runakuna paypa nisqanta ama qunqanankupaq. Yaqa chaynam Jesuspa qatiqninkunapas Jesusta tapukurqaku: “¿Ima señaltaq qawachinqa chayaramuspa kaypi kasqaykita chaynataq kay tiempopa tukupayninmantapas?”, nispa (Mateo 24:3).

Chayna tapukuptinkum Jesusqa kay pachapi imakuna qawanankumanta qatiqninkunaman willakurqa. Chay willakusqanman hina imapas kasqanta qawaspankum yachananku karqa chayaramusqanta utaq huk simipiqa hanaq pachapi kamachiqña kasqanta.

Chayta allinta yachanankupaqmi Jesusqa nirqaraq: “Qawariychik higos sachatawan wakin sachakunatapas.  Chikllimuqta qawaspaykichikqa yachankichikmi tarpuy tiempo hichparamusqanta”, nispa. Arí, imaynam imapas chikllimuqta qawaspaqa yachanchikña tarpuy tiempo chayamunanta, chaynam Jesuspa willakusqankuna cumplikusqanta qawaspapas yachanchikña Diospa piñakuynin punchaw kayllapiña kasqanta (Lucas 21:29, 30).

¿Imatam Jesusqa yachachichkarqa higos sachapa chikllimusqanmanta rimaspanqa?

Diospa munaychakuynin chayamunanpaqña kasqanta yachanapaqmi kay qawasqayki  dibujokunapi sasachakuykuna kanan karqa. Tukuy chaykunata qawaspaqa yachanañam karqa Jesusqa kay pachapi gobiernokunata chinkachinanpaq hinaña kasqanta.

Sumaqta qaway 245 hinaspa 246 kaq paginapi dibujokunata chaymanta rimarinanchikpaq. Chay dibujokunaqa Mateo 24:6-14 hinaspa Lucas 21:9-11 nisqankunapi willakusqanman hinam kachkan. Chaymantapas qawaytaq sapa dibujopi numerokunata, chay numerokunaman hinam sapakamamanta yachasunchik. Chaynaqa yachaykusunyá Jesuspa willakusqankuna imaynata kunan cumplikusqanmanta.

1) Jesusmi nirqa: “Qamkunaqa uyarinkichikmi guerrakunamanta hinaspa guerrakuna kasqanmanta [...]. Huk nacionmi peleanqa huk law nacionwan chaynataq huk gobiernopas huk law gobiernowan”, nispa. ¿Uyarirqankichu maypipas guerrakuna kasqanta?... Enteron pachapi punta kaq hatu-hatun guerram karqa 1914-1918 watakama, iskay kaq hatu-hatun guerrañataqmi karqa 1939-1945 watakama. Puntakunataqa manam chayna hatu-hatun guerrakunaqa karqachu, kunanmi ichaqa sapa kuti uyarikun televisionkunapi hinaspa radiokunapi.

2) Jesusqa nirqataqmi: “Kanqam kaypi chaypi muchuykuna”, nispa. Ichapas yachankiña achka runakuna mikuymanta llumpayta ususqankuta. Waranqantin runakunam sapa punchaw yarqaymanta wañullachkanku.

3) Chaymantapas Jesusqa nirqam: “Kanqam [...] kaypi-chaypi unquykuna”, nispa. Qayninpa watakunam gripe española nisqanku unquywan 20 millon runakuna wañukurqaku. Kunanqa sida nisqanku unquywanmi aswan achka runakunaraq wañullachkanku. Chaymantapas cancer unquywanmi utaq huk rikchaq unquykunawanmi waranqantin runakuna wañullachkanku.

 4) Jesusqa kaytapas nirqam: ‘Kanqam kaypi-chaypi terremotokuna’, nispa. ¿Imataq terremotoqa?... Chayqa allpa pachapa manchakuypaqta kuyusqanmi, chayna kuyuptinmi wasikuna tuñiptin runakuna wasipa ñitisqan wañullanku. 1914 watamantapacham achka terremotokuna karqa. ¿Uyarirqankichu chayna terremotokunamanta?...

5) Jesuspa nisqanman hinaqa ‘tukuy mana allinkunapas yapakunantaqmi’ karqa. Chaymi maypiñapas maqakuq piña runakuna hinaspa suwa runakuna runamasinkuta ñakarichichkanku. Manam ñawpaqkunataqa anchachu karqa chaykunaqa.

6) Chaymantapas Jesusqa nirqataqmi: “Diospa munaychakuyninmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy imapas tukunqa”, nispa (Mateo 24:14). Kay ‘sumaq willakuymanta’ ña yachaspaykiqa runamasikimanmi willakunayki. Chayta ruwaspaqa kay willakuy cumplikunanpaqmi yanapakunki.

Achka runakunam ninku kay rimamusqanchik sasachakuykunaqa ñawpaqkunatapas kasqanta. Ichaqa manam haykapipas chayna llumpa-llumpay sasachakuyqa enteron allpa pachapiqa karqachu. Hinaptinqa, ¿imatataq chaykunawan musyakuchwan?... Kay pachapi tukuy mana allinkuna tukunanpaqña kasqantam hinaspa sumaq huertapi kawsakuy kayllapiña kasqantam.

Jesusqa tukuy chaykunamanta willakuspanpas nirqataqmi: “Hinallayá Diosta mañakuychik ayqinaykichik punchaw ama paranan hinaspa chirinan tiempopi [...] kananpaq”, nispa (Mateo 24:20). ¿Imanasqataq chaynata nirqa?...

 ¿Imataq kanman pipas paranan hinaspa chirinan tiempopi ima ñakariymantapas lluptinan kaptinqa?... Llumpaytachá sasachakunman utaq wakinpiqa wañuytapas tarillanman. Mayna llakikuypaqya kanman imapas ruwayllanpi kasqanrayku puntamantaraq mana lluptispan wañuyta tariyninqa ¿aw?...

¿Ima niytataq Jesusqa munachkarqa paranan hinaspa chirinan tiempomanta rimaspanqa?

Hinaptinqa, ¿ima niytataq Jesusqa munachkarqa ayqinapaqqa ama paranan hinaspa chirinan tiempotaraq suyanamanta rimaspanqa?... Diospa piñakuynin punchawtaraq ama suyaspa kunanmantapuni Jehova Diosta servinanchiktam. Chay punchawtaraq suyaspaqa manam allinchu kasun. Noeypa tiemponpi runakuna hinachá willasqaña kaspapas mana kasukusqanchikrayku wañuypi tukusun.

Qatiqnin yachachikuypim rimasunchik Armagedonwan sutichasqa Diospa piñakuynin punchaw tukuruptin payman sunqu runakunapaq kay pachapi ima kananmanta.

Diospa piñakuynin punchaw kayllapiña kasqanmantapas rimachkanmi 2 Timoteo 3:1-5 hinaspa 2 Pedro 3:3, 4.