Yachachikuypa kasqanman rinapaq

Yachachikuyman rinapaq

 36 KAQ YACHACHIKUY

¿Pikunataq kawsarimunqaku? ¿Maypitaq yachanqaku?

¿Pikunataq kawsarimunqaku? ¿Maypitaq yachanqaku?

¿HAYKA runakuna kawsarimusqanmantataq pasaq iskay yachachikuykunapi rimamurqanchik?... Pichqamantam. ¿Haykataq warmachakuna karqaku?... Kimsam, hukninqa mozoniqñam karqa. ¿Imatam kawsarimusqankuqa Jehova Diosmanta yachachiwanchik?...

Warmachakunapas Diospa ancha kuyasqan kasqantam. Diosqa kawsarichinqam wakin runakunatapas. Ichaqa, ¿allin ruwaqkunallachu kawsarimunqaku?... Manam. Achka runakunam Diosmanta hinaspa churin Jesusmanta mana allinta yachaspanku mana allinkunata ruwarqaku wañukunanku punchawkama. Hinaptinqa, ¿yaqachu paykunapas kawsarimunqaku?...

Bibliapa nisqanman hinaqa ‘allin ruwaqkunapas hinaspa mana allin ruwaqkunapas kawsarimunqakum’ (Hechos 24:15). ¿Imaynanpitaq mana allin ruwaqkunapas kawsarimunqaku?... Wañukunanku punchawkama Diosmanta hinaspa pay  kasukunamanta mana pipas yachachisqanraykum.

¿Imanasqataq Diosqa mana allinkuna ruwaq wakin runakunata kawsarichinqa?

¿Haykapitaq wañuqkunaqa kawsarimunqaku?... Chayta yachanapaq kayta yuyarisun: ¿Ima nirqataq Martaqa turin Lazaro kawsarimunanta Jesus niptin? Martaqa nirqam: ‘Ñuqaqa yachanim tukupay punchawpi wañuqkuna kawsarimuptin turiypas hatarimunanta’, nispa (Juan 11:23, 24). ¿Imanasqataq Martaqa nirqa ‘tukupay punchawpim kawsarimunqa’ nispaqa?...

¿Maypitaq kanqa Jesuspa rimasqan sumaq huertaqa?

‘Sepulturapi llapallan kaqkunam kawsarimunqaku’ nispa Jesuspa yachachisqanta ña yachasqanraykum (Juan 5:28, 29). Chay ‘tukupay punchawpim’ Diosqa yuyayninpi kaq llapallan runakunata kawsarichinqa. Chay ‘punchawqa’ waranqa watam kanqa. Chay waranqa watapim Jehova Diosqa ‘kay pachapi runakunata derechonpi juzganqa’, wakinmi kawsarimuqkuna kanqaku (Hechos 17:31; 2 Pedro 3:8).

¡Mayna kusikuypaqya chayqa kanqa! Chay waranqa watapim achkallay-achka runakuna kawsarimunqaku. Paykunaqa Jesuspa nisqanpi hinam sumaq huertapi yachanqaku.

Chay sumaq huertamantam Jesusqa qirupi warkusqaña kachkaspan waqtanpi kaq runamanpas willarqa. Chay waqtanpi kaq runaqa mana allinkunallaña ruwaq kasqanraykum warkusqa kachkarqa. Ichaqa Jesuspa ruwasqankunata qawaspan hinaspa paymanta  rimasqankuta uyarispanmi paypi iñikuyta qallaykurqa. Chaymi nirqa: “Jesus yuyarillawankimá kamachikuynikiman yaykuspayki”, nispa. Jesusñataqmi nirqa: “Chiqaptapunim kunan niki: Sumaq huertapim ñuqawan kanki”, nispa (Lucas 23:42, 43).

¿Imaynataq kanqa sumaq huertaqa?

¿Maypitaq kanqa chay sumaq huertaqa?... Chaypaqyá yuyarisun maypi sumaq huerta qallariypi kasqanta, ¿yuyachkanki?... Adantawan Evata Jehova Dios unancharuspanmi kay pachapi Eden sutiyuq sumaq huertapi churarqa. Chaypiqa karqam tukuy rikchaq animalchakuna, miski ruruyuq sachakuna hinaspa hatu-hatun mayupas. Chay huertaqa suma-sumaqmi karqa kawsakunapaq (Genesis 2:8-10).

Chaynaqa, Jesuspa rimasqan chay sumaq huertaqa hina kay allpa pachallapim kanqa. Chaypim Jesuswan rimaq chay mana allinllaña ruwaq runapas kawsarimunqa. Hinaptinqa, ¿kay allpa pachapichu Jesuspas chay mana allinllaña ruwaq runawan kuska kanqa?... Manam. ¿Imanasqa?...

Hanaq pachamanta kay pachata kamachinanpaq churasqa kasqanraykum. Hanaq pachamantam Jesusqa chay mana allinllaña ruwaq runatapas kawsarichispan imapipas yanapanqa. Ichaqa, ¿imanasqataq Jesusqa chay mana allinllaña ruwaq runataqa sumaq huertapi kawsachinqa?...

 Tapukusun, ¿chay runaqa yachanmanñachu karqa Diospa munaynin ima kasqanta?... Manam. Mana yachaywanmi tukuy mana allinkunata ruwarqa. Sumaq huertapim ichaqa Diospa munaynin ima kasqanta yachaspan Jehova Dios kuyaytapas tanteakunqa.

Hinaptinqa, ¿llapallan kawsarimuqkunachu kay pachapi kawsakunqaku?... Manam. ¿Imanasqa?... Wakinqa hanaq pachapi kawsakunankupaq sapaqchasqa kasqankuraykum. Paykunaqa Jesuswan kuskam kay pachata kamachimunqaku. Imanasqa chayna nisqanchikmantayá yachaykusun.

Manaraq wañukuchkaspanmi Jesusqa apostolninkunata nirqa: ‘Taytaypa wasinpiqa achkam yachanapaq wasikuna kachkan, ñuqaqa qamkunapaq sitiota allichaqmi richkani, hinaspam kaqmanta hamuspay wasiyman pusasqaykichik maymi kasqaypi qamkunapas kanaykichikpaq’, nispa (Juan 14:2, 3).

 ¿Maymantaq Jesusqa kawsariramuspan rirqa?... Hanaq pachamanmi (Juan 17:4, 5). Chaynaqa, hanaq pachapi kanankupaqmi Jesusqa apostolninkunata hinaspa wakin qatiqninkunatapas nichkarqa. ¿Imatataq chaypi ruwanqaku?... Bibliapa nisqanman hinaqa ‘punta kawsarimuqkunam’ Cristowan kuska hanaq pachapi kaspa kay pachata ‘waranqa wata kamachimunqaku’ (Apocalipsis 5:10; 20:6; 2 Timoteo 2:12).

¿Hayka runakunataq hanaq pachamanta Jesuswan kuska kamachimunqaku?... Jesusmi qatiqninkunata nirqa: “Ama manchakuychikchu aslla kaq ovejakuna, hanaq pachapi taytaykichikmi tantearun munaychakuyninta qusunaykichikpaq”, nispa (Lucas 12:32). Chay ‘aslla kaq ovejakunam’ hanaq pachapi kawsarinankupaq yupasqa kachkanku. Paykunaqa kanku ‘pachak tawa chunkan tawayuq waranqa runakunam’ (Apocalipsis 14:1, 3).

¿Maypim wañuqkuna kawsarimunqaku, hinaspa imatam ruwanqaku?

Hinaptinqa, ¿hayka runakunataq kay pachapiqa kawsakunqaku?... Manam chaytaqa bibliaqa willakunchu. Adanwan Eva unanchasqa kaptinkum Dios nirqa churi-wawayuq kaspanku kay pachata huntachinankupaq. Ichaqa manam chaytachu Adanwan Evaqa ruwarqaku. Chayna kaptinpas Jehova Diosqa kay pachatam huntachinqa allin ruwaq runakunawan (Genesis 1:28; Isaias 45:18; 55:11).

¡Mayna kusikuypaqya kanqa sumaq huertapi kawsakuyqa! Enteron allpa pacham kuyayllapaq waytayuqkuna, sachayuqkuna hinaspa animalchayuqkuna kanqa. Manañam pipas unquytaqa nitaq wañuytaqa riqsinqañachu. Lliw runakunam allin ruwaqkuna kanqaku. Chaymi sumaq huertapi kawsakuyta munaspaqa kunanmantapuni Diospaq hina kawsakunanchik.

Kay pacha suma-sumaq kananmanta yachanapaqyá qawasun Proverbios 2:21, 22; Eclesiastes 1:4 hinaspa Isaias 2:4; 11:6-9; 35:5, 6; 65:21-24.