RUNAKUNAQA yuyaqyaspanchikmi wañunchik, warmakunapas wakinpiqa wañukunkum. Ichaqa, ¿manchakunaykichu wañukuyta utaq wañukuqkunata?... ¿Wañukuptinchikqa imanchikpas kawsachkanmanraqchu?...

Manamá pipas kunanqa kanchu wañukusqanmanta kawsariramuqqa, chaynapi wañukuptinchik imanchikpas hinallaraq kawsasqanmanta utaq manaña kawsasqanmanta willawananchikpaqqa. Jesus kay pachapi kachkaptinmi ichaqa Lazaro sutiyuq runa wañukusqanmanta kawsariramurqa. Lazaroqa karqa Jerusalenpa hichpan Betania llaqtapi yachaq Jesuspa amistadninmi, paypa paninkunam karqa Martawan Maria. Chaynaqa wañukuqkunamanta allinta yachanapaqyá Lazaromanta yachaykusun.

Huk kutipim Lazaro unqururqa, chaymi karupi kachkaptinpas Martawan Mariaqa Jesusman willachirqaku, paykunaqa yacharqakum Jesusqa hampirunanpaq atiyniyuq kasqanta. Jesusqa manam doctorchu karqa, ichaqa Diosmi atiyta qurqa unquqkunatapas hampinanpaq (Mateo 15:30, 31).

Ichaqa manaraq Jesus chayachkaptinmi Lazaroqa wañukurqa. Chaywanpas Jesusqa qatiqninkunatam nirqa: “Lazaroqa puñuchkanmi, ichaqa rikchachimuqmi risaq”, nispa. Chay nisqanta mana entiendeptinkuñataqmi nirqa: “Lazaroqa wañukunmi”, nispa. ¿Imatam kaywanqa yachanchik?... Wañukuyqa mana sueñokuspa miski puñuy hina kasqantam.

 Lazaropa wañukusqanta yacharusqanraykum Jesusqa Martapa hinaspa Mariapa wasinman rirqa. Chaypiqa Lazaropa ayllunta nanayninpi kaysinankupaqmi runakunapas huñunakururqakuña. Wasinman Jesus risqanta Marta yacharuspanñataqmi taripaq rirqa. Chaymantam Mariapas Jesuspa kasqanman waqastin chayarullarqa hinaspam ñawpaqninpi qunqurakuykurqa. Riysiqnin amistadninkunapas waqallarqakum.

Jesusñataqmi Lazarota maypi pamparusqankuta tapurqa. Hinaptinmi pampakusqan machayman pusarurqaku. Chaypi runakunapas llapallankum waqallachkarqaku, hinaptinmi Jesuspas wañukuqmanta llumpayta llakikuspan waqayta qallaykurqa.

Lazaropa pampakusqan machayqa rumiwan harkachisqam karqa. Chaymi Jesus nirqa: “Chay rumita asuchiychik”, nispan. ¿Allinchu karqa rumi asuchiyninku?... Martapaqqa manam allinchu karqa, chaymi nirqa: “Señor ñachá asnarichkanña, ñam tawa punchawniyuqña”, nispan.

Jesusñataqmi nirqa: “¿Manachu nirqayki creespaykiqa Diospa atiynin rikunaykita?”, nispa. Chaynataqa nirqa Dios hatunchasqa kaptin Martapas rikunanta yachaspanmi. Chaymi Jesusqa rumita asurachiptinku llapankupa uyarisqanta taytanta qayakurqa, hinaspam kallpawan nirqa: “¡Lazaro, lluqsimuy!”, nispa. ¿Yaqachu Lazaroqa kawsariramurqa?... Yachaykusunyá.

¿Atiwaqchu pitapas puñukuchkaptin rikcharichiyta?... Arí, kallpawan qayaykuspaqa rikcharirachiwaqmi. Ichaqa, ¿atiwaqchu wañukuqta rikcharichiyta?... Manam, mayna kallpawanña qayaptikipas wañukuq runaqa manam uyarisunkimanñachu. Imataña ruwaspapas wañukuqtaqa manam pipas rikcharichinmanñachu.

¿Imatam Jesusqa ruwarqa Lazaro wañukuptin?

 Jesusmi ichaqa Diosmanta atiy chaskisqanrayku runakunapa mana ruway atisqanta ruwarqa. Payqa Lazarotam tawa punchawña pampasqa kasqanmanta kawsarirachirqa, hinaptinmi Lazaroqa kaqlla purirqa, rimarqa hinaspa imatapas ruwarqa (Juan 11:1-44). Arí, Jesusqa puñuqtapas hinallam kawsarirachirqa.

Ichaqa Lazaro wañukuptinqa, ¿yaqachu alman utaq animan lluqsiruspan maymanpas ripukurqa? ¿Hanaq pachapichu espiritun Dioswan hinaspa angelkunawan karqa?...

Manam. Chaymanta yachanapaq yuyarisun Lazaro wañukuptin “puñuchkanmi” nispa Jesuspa nisqanta. Pipas miskita puñuspaqa manam imatapas musyakunchu, rikchariruspapas relojta qawaspañam yachan hayka unay puñurusqantaqa ¿aw?...

Chaynam yaqa miski puñuypi hina wañuqkunapas kachkanku, manañam imatapas yachankuñachu, musyankuñachu nitaq ruwankuñachu. Chaymi bibliapas nin: “Manam imatapas  yachanchu wañuqkunaqa”, nispa (Eclesiastes 9:5, 10). Chaynam Lazaropas wañusqa kaspanqa kachkarqa.

¿Imaynam Lazaroqa kachkarqa wañukuspanqa?

Manam hanaq pachamanchu ripukurqa, ripukuspanqa willakunmanchiki karqa imayna hanaq pacha kasqantaqa ¿aw?... Chaymantapas hanaq pachapiña kaptinqa, ¿imapaqñamá Jesusqa kay pachapiqa kawsarichinman karqa?...

Chayna kaptinpas achka runakunam ninku Lazaropa animan utaq alman huk lawpi hinalla kawsasqanta. ¿Imanasqa? Wañukuptinchik cuerponchikmanta almanchik utaq animanchik lluqsisqanta piensasqankuraykum. Bibliam ichaqa mana chaynatachu yachachin. Bibliapa nisqanman hinaqa Adanpas ‘kawsaq runaña karuspanmi’ huchallikuruspan wañururqa, hinaspam allpallamanta ruwasqa kasqanrayku allpallaman kutiykurqa. Ñuqanchikpas Adanpa miraynin kasqanchikraykum llapallanchik huchayuq kanchik hinaspa wañuqlla kanchik (Genesis 2:7; 3:17-19; Numeros 6:6; Romanos 5:12).

Chaynaqa manam runapa almanqa utaq animanqa kanchu. Wañuruspaqa chayllapim tukurunchik. Adanpa miraynin kasqanchikraykum  biblia niwanchik: ‘Pipas huchallikuqqa wañunqam’, nispa (Ezequiel 18:4).

¿Imanasqataq wañusqakunataqa mana manchakunanchikchu?

Ichaqa wakin runakunam wañuqkunata manchakunku. Chaymi panteonninta puriytapas mana munankuchu “wañukuqpa almanmi utaq animanmi imanaruwanmanpas” nispanku. Ichaqa, ¿chaynachu kanman?... Manam.

Wakin runakunaqa wañuqkunapa animan utaq espiritun watukusqanta nispankum mikuykunatapas churapunku. Chayta ruwaq runakunaqa manam wañuqkuna imayna kasqanmantaqa yachankuchu. Ñuqanchikmi ichaqa Diospa yachachisqanta yachanchik, chaymi wañuqkunataqa mana manchakunanchikchu. Chaynaqa Diosta kasukuspayá kawsay quwasqanchikmantapas agradecekusun.

Ichaqa kaykunamanta yacharuspapas ichapas tapukuchkankiraq: “¿Yaqachu Diosqa kawsarichinqa wañukuq warmachakunata? ¿Munachkanchu kawsarichiyta?”, nispayki. Chaymantam qatiqninpi yachasun.

Wañuqkuna imayna kasqanmanta hinaspa alma ima kasqanmanta astawan yachanapaqyá qawasun Salmo 115:17; 146:3, 4 hinaspa 1 Corintios 15:45.