Yachachikuypa kasqanman rinapaq

Yachachikuyman rinapaq

 12 KAQ YACHACHIKUY

Taytanta mañakunapaqmi Jesus yachachiwanchik

Taytanta mañakunapaqmi Jesus yachachiwanchik

¿RIMANKICHU Jehova Dioswan?... Diosqa munanmi paywan rimanaykita utaq mañakunaykita. Jesuspas taytanwanmi sapa kuti rimaq runakunapa qayllanpipas chaynataq sapallanpipas. Bibliam nin: ‘Jesusmi runakunata aviaruspan urquman sapallan rirqa Diosta mañakunanpaq, tutayaruptinpas hinallam chaypi sapallan kachkarqa’, nispa (Mateo 14:23).

¿Maypitaq sapaykipi Diosta mañakuwaq?... Ichapas puñunaykipaq kachkaspayki. Jesusmi nirqa: “Diosta mañakunaykipaqqa cuartoykiman yaykuy, hinaspayá punkuta wichqaykuspa mana rikuy atinapi kaq taytaykita mañakuy”, nispa (Mateo 6:6). ¿Sapa kutichu puñunaykipaq Diosta mañakunki?... Allinmi kanman mañakuynikiqa.

Jesusqa sapanpipas hinaspa hukkunapa qayllanpipas Diostam mañakurqa

 Hukkunapa qayllanpipas Jesusqa mañakurqam. Amistadnin Lazaro wañukuptinmi pampananku lawpi runakunapa qayllanpi Diosta mañakurqa (Juan 11:41, 42). Chaynallataqmi qatiqninkunawan huñunakuspanpas Diosta mañakurqa. Qamqa, ¿rirqankichu Diosta yupaychana huñunakuykunaman?... Chaypiqa yuyayniyuq kaq qarim lliwpaq Diosta mañakun. Chaymi rimasqanta allinta uyarinayki, chaynapi tukuykuptin “amen” ninaykipaq. Ichaqa, ¿imanasqataq “amen” ninanchik?... Mañakuqpa rimasqan ñuqanchikpaqpas allin kasqanta qawachinapaqmi.

¿Imanasqataq huñunakuypi pipas Diosta mañakuptinqa allinta uyarinanchik?

Chaymantapas Jesusqa manaraq mikuchkaspanmi Diosta mañakuq mikuymanta agradecekunanpaq. Qamqa, ¿mañakunkichu mikunaykipaq?... Ancha allinmi manaraq mikuchkaspa Diosta agradecekuyqa. Wakinpim mikunapaq pipas llapankupaq Diosta mañakunman. Ichaqa, ¿imatam ruwawaq Diosta mana yupaychaq runakunawan mikuspaykiqa?... Chaywanpas hinallam Diosta mañakunayki.

Ichaqa, ¿lliwpa uyarinankupaq hinachu Diosta mañakunanchik? ¿Uyariwanchikmanchu Diosqa sunqullanchikpi mañakuptinchikpas?... Chaypaq yachasun Jehova Diosta yupaychaq  Nehemias sutiyuq runamanta. Payqa Persia nacionpi Artajerjes sutiyuq runapaqmi llamkapakuq. Huk kutipim llakisqa kachkarqa Jerusalen llaqtan purmasqallaña kaptin.

¿Maykunapim Nehemias hina sunqullaykipi Diosta mañakuwaq?

Chaymi Artajerjesqa tapurqa imanasqa llakisqa kasqanmanta. Nehemiasñataqmi chaylla sunqunpi Diosta mañakurqa. Chaymantañam Artajerjesman willakurqa imanasqa llakisqa kasqanmanta hinaspam ruegakurqa Jerusalen llaqtanman kachananpaq, chaynapi kikin rispa llaqtanpa pirqankunata kaqlla hatarichinanpaq. ¿Artajerjesqa kacharqachu?...

Diosta mañakusqanman hinam Artajerjesqa kachaykurqa, hinaspapas kullukunata quspanmi pirqata hatarichinanpaq yanaparqa. Kaymi yachachiwanchik  sunqullanchikpi mañakuptinchikpas Diosqa uyariwasqanchikta (Nehemias 1:2, 3; 2:4-8).

¿Kumuykuspachu utaq qunqurakuspachu Diosta mañakunanchik? ¿Ima niwaqtaq?... Diosta Jesus mañakuspanqa wakinpim qunqurakuq, wakinpiñataq sayanpalla Diosta mañakuq. Wakin kutipiñataqmi hanaq pachata qawarispan mañakuq, chaynatam mañakurqa amistadnin Lazaro wañukuptin.

Hinaptinqa, ¿imaynanpataq Diosta mañakunanchik?... Arí, kumuykuspapas, qunquranpapas, hanaq pachata qawaspapas utaq sayanpallapas mañakuchwanmi. Payqa tutapas punchawpas mañakuptinchikqa uyariwasunmi. Ichaqa manapunim iskayrayananchikchu uyariwananchikmantaqa. Icha, ¿ima niwaqtaq?...

¿Imakunamantam Diosta mañakuwaq?

¿Imakunamantataq mañakuspaqa rimachwan?... ¿Imakunamantataq qamqa Diosta mañakuspayki rimanki?... Jehova Diosqa tukuy imatam quwanchik. ¿Manachu chaykunamanta agradecekuchwan?... Mikuy quwasqanchikmanta agradecekuy allin kaptinpas, ¿agradecekurqankichu killamanta, sachakunamanta, kawsaykunamanta hinaspa waytakunamanta?... Chaykunapas Diospa unanchasqankunam.

Jesuspa qatiqninkunaqa Diosta imayna mañakunankupaqmi Jesusta tapukurqaku, hinaptinmi payqa yachachirqa imaynata mañakunankupaq.  ¿Imakunatataq yachachirqa?... Mateo 6 capitulopa 9-13 versiculonkamam chaymanta riman. Chayqa ancha riqsisqa mañakuymi. Leeykusunchik.

Leesqanchikman hinam puntataqa Diospa sutin chuyanchasqa kananpaq mañakunanchik. ¿Imam Diospa sutin?... Arí, sutinmi Jehova. Chay sutitam respetananchik.

Chaymantam Diosña kay pachata kamachinanpaq mañakunanchik. Kay pachata kamachimuspanmi kuyayllapaqta huertayachinqa hinaspa hawkayayta apamunqa.

Chaymantañataqmi mañakunanchik hanaq pachapi hina kay pachapipas Diospa munaynin ruwakunanpaq. Ichaqa paypa munasqanman hinam imatapas ruwananchik.

Mañakunanchiktaqmi sapa punchaw mikunanchikta quwananchikpaq hinaspa huchanchikmanta wanakuptinchik pampachawananchikpaqpas. Ichaqa pampachasqa kayta munaspaqa pampachakuqmi kananchik. ¿Sasachakunkichu pitapas pampachanaykipaq?...

Tukunapaqñataqmi mañakunanchik satanas diablomanta harkawananchikpaq. Tukuy kaykunamantam Jehova Diostaqa mañakunanchik.

Ichaqa manam yanapawanallanchikpaqchu Diostaqa mañakunanchik, mañakunanchiktaqmi agradecekunapaqpas. Manamá iskayrayananchikchu mañakusqanchikta Dios uyarinanmantaqa. Diosqa anchatam kusikun sunqumanta paywan rimaspa munasqanman hina mañakuptinchikqa. Payqa quwasunpunim imapas mañakusqanchiktaqa. ¿Chaynachu icha manachu?...

Imakunamanta mañakunapaq astawan yachanapaq qawasun Romanos 12:12; 1 Pedro 3:12 hinaspa 1 Juan 5:14.