“¿Imaynatá ñuqa willayta atisaq?”

Jallpʼantinpi achkha hermanos, sinchi unqusqa kaspapis tukuy atisqankuta willanku. Ajinata hermananchik Dalia ruwan, payqa Lituaniap capitalnin Vilna nisqa llaqtapi tiyakun.

Dalia sutiyuq hermanaqa 35 watasniyuqjina kachkan. Nacekusqanmantapacha ñuqtunmanta unqusqa kasqanrayku, mana kuyuriyta atinchu, parlasqanpis mana sutʼichu. Chayrayku imatachus nisqantaqa familiaresnillan entiendenku. Daliaqa maman Galinawan tiyakun, pay atiendechkan. Dalia chʼampaykunapi, llakiykunapi ima rikukuspapis, kusisqallapuni kakun. ¿Imaynamantá chayta ruwan?

Maman nin: “Kay 1999 watapi primay Apolonija visitawarqayku. Payqa Jehovamanta sutʼinchaq, Bibliamanta sumaqta yachasqantataq repararqayku. Daliaqa achkha tapuykunata ruwarqa, usqhayllatataq Bibliamanta yachakuyta qallarirqa. Wakin kutisqa yachakuchkaptinku paykunawan kaspa, imatachus waway nisqanta sutʼinchaq kani. Yachakusqan mayta yanapachkasqanta reparaspa, ñuqamanpis Bibliamanta yachachinawanta nirqani”.

Bibliap yachachiykunasninta entiendesqanmanjina Daliaqa juk tapuyta mayta ruwakuq. Chayrayku Apolonijata chaymanta tapurqa: “Kayjina unqusqa kaspa, ¿imaynatá ñuqa willayta atisaq?”, nispa (Mat. 28:19, 20). Apolonija kʼachamanta jinata nirqa: “Ama manchachikuychu, Jehová yanapasunqa”, nispa. Ajinataq karqa.

¿Imaynatataq Dalia runasman willan? Wakin kutiqa hermanaswan Bibliamanta cartasta qillqananpaq yanapachikun. Ñawpaqtaqa imatachus niyta munasqanta paykunaman nin, paykunataq chayta qillqapunku. Chantapis Bibliamanta celularniqta mensajesta apachispa willallantaq. Tiempo allillan kaptintaq qutuchakuyninmanta wakin hermanos parquesman, callesman ima willananpaq pusanku.

Dalia, mamanwan, qutuchakuypi ñawparillarqankupuni. Kay 2004 noviembre killapitaq Jehovaman qukuspa bautizakurqanku. Kay 2008 septiembre killapi Vilna llaqtapi Polaca qallupi juchʼuy qutu qallarirqa. Chaypi astawan willaqkuna necesitakusqanraykutaq Dalia, mamanwan yanapayta qallarirqanku. Dalia nin: “Wakin killasqa mana willayman lluqsisqayrayku mayta llakikuni. Chayraykutaq Jehovamanta mañakuni, jinapitaq pillapis willayman pusanawanpaq jamunpuni”, nispa. ¿Imaynataq munasqa hermananchik sientekun? Pay nin: “Unquyniyrayku mana kuyuriyta atinichu, chaywanpis yuyayniyqa mana chinkanchu. Jehovamanta runasman willayta atisqaymanta may kusisqa kani”, nispa.