Bai na kontenido

Kiko e Palabra di Dios Ta? E Por Referí Tambe na un Persona?

Kiko e Palabra di Dios Ta? E Por Referí Tambe na un Persona?

E kontesta ku Beibel ta duna

Den Beibel, e ekspreshon “e palabra di Dios” hopi biaha ta referí na un mensahe òf un kolekshon di mensahe di Dios. (Lukas 11:28) Tin biaha, “Palabra di Dios” òf “e Palabra” ta ser usá komo título di un persona.—Revelashon 19:13; Huan 1:14.

Un mensahe di Dios. Hopi biaha, e profetanan a bisa ku e mensahenan ku nan tabata proklamá tabata palabra di Dios. Por ehèmpel, Yeremías a introdusí su mensahe profétiko ku “e palabra di SEÑOR a yega na mi.” (Yeremías 1:4, 11, 13; 2:1, Beibel Santu) Promé ku profeta Samuel a bisa Saul ku Dios a skohe Saul komo rei, e profeta a bisa: “Keda para awor, pa mi proklamá e palabra di Dios na bo.”—1 Samuel 9:27, Beibel Santu.

Título di un persona. “E Palabra” ta aparesé tambe den Beibel komo un título pa Hesukristu, tantu ora e ta den shelu komo ora e tabata un hende riba tera. Laga nos wak algun motibu pakiko nos a yega na e konklushon akí:

  • E Palabra tabat’ei promé ku tur otro kreashon. “Na kuminsamentu e Palabra tabat’ei . . . E tabata huntu ku Dios na kuminsamentu.” (Huan 1:1, 2) Hesus ta “e promé di tur kreashon . . . E tabata eksistí promé ku tur otro kos.”​—Kolosensenan 1:13-15, 17.

  • E Palabra a bini na tera komo un hende. “E Palabra a bira hende i a biba meimei di nos.” (Huan 1:14) Kristu Hesus “a entregá tur loke e tabatin i a tuma un kondishon di esklabo i a bira hende.”—Filipensenan 2:5-7.

  • E Palabra ta e Yu di Dios. Despues ku apòstel Huan a bisa ku “e Palabra a bira hende,” manera a ser menshoná, el a sigui bisa: “Nos a mira su gloria, un gloria ku un yu unigénito ta risibí di un tata.” (Huan 1:14) Huan a skirbi tambe: “Hesukristu ta e Yu di Dios.”—1 Huan 4:15.

  • E Palabra tin kualidatnan di un dios. “E Palabra tabata un dios” òf tabata “divino.” (Huan 1:1, nota) Hesus ta “refleho di e gloria di Dios i kopia eksakto di su personalidat.”—Hebreonan 1:2, 3.

  • E Palabra ta un rei. Den Beibel, nos ta lesa ku riba kabes di e Palabra di Dios “tin hopi korona.” (Revelashon 19:12, 13) E Palabra tambe ta ser yamá “Rei di reinan i Señor di señornan.” (Revelashon 19:16) Hesus ta ser yamá “Rei di esnan ku ta goberná komo rei i Señor di esnan ku ta goberná komo señor.”—1 Timoteo 6:14, 15.

  • E Palabra ta e bosero di Dios. Aparentemente, Dios ta usa e persona ku tin e título “e Palabra” pa duna informashon i instrukshon. Hesus a bisa ku ta e tabatin e tarea akí: “E Tata ku a manda mi a duna mi òrdu tokante kiko pa bisa i kiko pa siña hende. . . . P’esei loke mi ta papia, mi ta papia presis manera e Tata a bisa mi.”​—Huan 12:49, 50.