Bai na kontenido

Bai na kontenido

 TÓPIKO PRINSIPAL | DI BÈRDAT NOS TIN MESTER DI DIOS?

Dikon Nos Tin Mester di Dios?

Dikon Nos Tin Mester di Dios?

Ekspertonan di salú mental ta bisa ku si un hende ke ta berdaderamente felis, e tin ku rekonosé su nesesidat spiritual. Nos ta mira esaki den e echo ku hende ke alkansá un meta òf sirbi un otro hende òf un kousa mas grandi ku nan mes. Pa satisfasé e nesesidat akí, algun ta dediká nan tempu liber na naturalesa, arte, músika, etcetera. Pero mayoria di hende no ta haña satisfakshon duradero den e kosnan ei.

Dios ke pa nos ta felis, awor i pa semper

Esnan ku ta lesa Beibel no ta keda strañá ku hende a nase ku un nesesidat spiritual. E promé kapítulonan di Génesis ta mustra ku despues ku Dios a krea e promé pareha humano, e tabata papia ku nan regularmente, loke a permití nan forma un relashon kuné. (Génesis 3:8-10) Dios no a diseñá hende pa biba independiente di nan Kreador; nan tin e nesesidat pa komuniká kuné. I Beibel ta referí na e nesesidat akí bes tras bes.

Por ehèmpel, Hesus a bisa: “Felis ta esnan ku ta konsiente di nan nesesidat spiritual.” (Mateo 5:3) For di e palabranan ei nos por konkluí ku pa nos por ta felis i kontentu, nos tin ku satisfasé nos deseo natural pa konosé Dios. Esei ta algu indispensabel. Kon nos por hasi esei? Hesus mes a kontestá e pregunta ei ora el a bisa: “Hende no mester biba di pan so, sino tambe di tur palabra ku ta sali for di boka di Yehova.” (Mateo 4:4) Den ki manera e palabranan di Dios, esta, su pensamentu- i instrukshonnan ku nos ta haña den Beibel, por yuda nos hiba un bida felis i ku propósito? Laga nos konsiderá tres manera básiko.

Nos Tin Mester di Bon Guia

Awendia, tin hopi eksperto i spesialista ku ta kla pa duna konseho riba temanan manera relashonnan personal, amor, bida di famia, solushon di konflikto, felisidat i asta e nifikashon di bida. Pero ken ta den e mihó posishon pa duna guia sano i balansá den tur e áreanan akí ku no ta e Kreador di humanidat, Yehova Dios?

Meskos ku un manual, Beibel ta un guia pa nos bida

Por ehèmpel, ora bo kumpra un aparato nobo, manera un kámara òf un kòmpiuter, bo ta ferwagt  ku e ta bini ku un manual ku ta splika kon ta e mihó manera pa bo us’é p’e duna bon resultado. Beibel ta manera un manual asina. E ta un manual ku Dios, komo e fabrikante na moda di papia, a duna nos pa nos por sa kon nos tin ku usa nos bida. E ‘manual’ akí ta splika ku ki propósito Dios a diseñá e ‘produkto’ i kon mester us’é p’e duna mihó resultado.

Meskos ku kualke manual bon hinká den otro, Beibel ta spièrta nos kontra e práktikanan ku por pone e siguridat i bon funshonamentu di e ‘produkto,’ esta, nos bida, na peliger. Por parse mas fásil pa sigui konseho di otro hende. Pero no ta lógiko pa pensa ku e mihó manera pa evitá problema i haña bon resultado ta di sigui instrukshon di e ‘fabrikante’?

“Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”—Isaías 48:17, 18

Den Beibel nos ta haña e guia i yudansa ku nos tin mester

Maske Yehova Dios ta duna nos guia i instrukshon, e no ta obligá nos pa sigui nan. Mas bien, pa motibu ku e stima nos i ke yuda nos, e ta bisa nos di kurason: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.” (Isaías 48:17, 18) Ku otro palabra, si nos sigui e guia di Dios, kos lo bai bon ku nos i nos lo hiba un bida felis. P’esei, nos tin mester di Dios.

Nos Tin Mester di Solushon pa e Problemanan di Bida

Tin hende ta pensa ku nan no tin mester di Dios, pasobra nan no por kaba di komprondé kon un Dios di amor por permití tur e kosnan malu ku ta pasando aworakí. Por ehèmpel, nan ta puntra nan mes: ‘Dikon bon hende ta sufri?’ ‘Pakiko algun bebi inosente ta nase deformá?’ ‘Pakiko tin tantu inhustisia?’ Ta trata akí en bèrdat di preguntanan bálido, i ora nos haña kontesta satisfaktorio riba nan, nan por tin un efekto profundo riba nos bida. Pero en bes di kore kulpa Dios pa e problemanan ei, laga nos wak kon su Palabra, Beibel, por klarifiká e punto akí.

Den e di tres kapítulo di Génesis, nos ta lesa ku Satanas, skondiendo tras di un kolebra, a hinka e promé pareha humano den tentashon pa bai kontra e prohibishon di Yehova Dios di kome for di e palu di konosementu di bon i malu. Satanas a bisa Eva: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.”—Génesis 2:16, 17; 3:4, 5.

Ku e palabranan ei, Satanas no solamente a insinuá ku Dios ta un mentiroso, sino tambe ku Dios su forma di goberná ta inhustu. Diabel a pretendé ku si hende skuch’é, kosnan lo a bai nan mihó. Kon Yehova por a demostrá ku e akusashonnan ei tabata infundá? Wèl, el a opta pa laga kosnan sigui nan rumbo pa laga tur hende mira ken tin rason. En realidat, Dios a duna  Satanas i tur esnan ku a bai su tras e oportunidat pa demostrá si hende por biba mihó sin Dios.

Kiko abo ta kere di Satanas su insinuashonnan? Bo ta kere ku hende por biba mihó i dirigí nan pasonan sin yudansa di Dios? Pensa riba tur e sufrimentu, inhustisia, malesa i morto, i tambe krímen, dekadensia moral, guera, genosidio i otro krueldatnan ku a asotá humanidat durante siglonan. Akaso nan no ta evidensia innegabel ku hende su esfuersonan pa goberná nan mes independiente di Dios tabata un frakaso total? En bes di tene Dios responsabel pa tur e angustia ku e kosnan akí a kousa, Beibel ta mustra kiko ta un di e kousanan prinsipal: “Esun hende ta manda riba e otro pa perhudik’é.”—Eklesiástes 8:9, BPK.

En bista di esaki, no ta klaru anto ku nos tin ku akudí na Dios no solamente pa e kontestanan pa e preguntanan akí ku ta kousa angustia, sino tambe pa e solushon? Kiko Dios lo hasi?

Nos Tin Mester di e Yudansa di Dios

Pa hopi tempu kaba hende ta anhelá e dia ku nan por biba sin malesa, behes i morto. Nan a gasta hopi tempu, energia i rekurso pa logra esaki, pero te ainda sin resultado. Algun hende a kere ku si nan bebe sierto líkido, deskubrí e ‘fuente di hubentut’ òf biba na un sierto lugá, nan por keda yòn. Tur e kosnan akí a keda na puru soño.

Dios ke pa hende biba bon i pa nan ta felis. Esei tabata su propósito original ora el a krea hende, i e no a lubidá riba esei. (Génesis 1:27, 28; Isaías 45:18) Yehova a duna nos e garantia ku kiko ku e pone su mes pa hasi lo kumpli sigur. (Isaías 55:10, 11) Beibel ta papia di e promesa di Dios pa transformá e tera akí den un paradeis, manera esun ku Adam ku Eva a pèrdè. Den e último buki di Beibel, nos ta haña e palabranan akí: “E [Yehova] lo . . . seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.” (Revelashon 21:4) Kon Dios lo realisá e kambionan akí, i kon nos por benefisiá di e kumplimentu di e promesa ei?

Hesukristu, Yu di Dios, a siña su siguidónan pidi pa Dios su boluntat kumpli. Hopi hende konosé e asina yamá orashon di Nos Tata i ku frekuensia nan ta ripitié. E ta bisa: “Nos Tata ku ta den shelu, bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:9, 10) Sí, e Reino di Dios ta e medio ku Yehova lo usa pa eliminá tur e miseria ku gobernashon humano a kousa i realisá su promesa di un hustu mundu nobo. * (Daniel 2:44; 2 Pedro 3:13) Kiko nos mester hasi pa benefisiá di e promesa di Dios?

 Hesukristu a bisa kiko ta e paso simpel ku nos tur tin ku dal: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Sí, ku yudansa di Dios, nos por biba pa semper den e mundu nobo ku Dios a primintí. E posibilidat ei por konvensé bo di un motibu mas pakiko en bèrdat nos tin mester di Dios!

Tempu pa Buska Dios

Dos mil aña pasá, na Areópago, òf Seru di Mars, na Aténas, apòstel Pablo a bisa e atenonan liberal lo siguiente tokante Dios: “E mes ta duna tur hende bida, rosea i tur kos. Pasobra ta pa medio di dje nos tin bida i ta move i ta eksistí, manera algun di boso propio poetanan a bisa: ‘Pasobra nos tambe ta su desendiente.’”—Echonan 17:25, 28.

Loke Pablo a bisa e atenonan ta bálido te awe. Nos Kreador ta perkurá e aire ku nos ta hala aden, e kuminda ku nos ta kome i e awa ku nos ta bebe. E kos ta masha simpel: Sin e bon kosnan akí ku Yehova a duna nos, nos no por biba. Ma dikon Dios a sigui perkurá e kosnan akí pa tur hende, sea ku nan ta pensa riba dje òf nò? Pablo a bisa ku esei ta “pa nan por buska Dios—sí, busk’é fulando manera ora un hende ta buska den skuridat, i realmente hañ’é—maske e no ta masha leu for di kada un di nos.”—Echonan 17:27.

Lo bo ke konosé Dios mihó? Lo bo ke siña mas tokante su propósito i su konseho pa hiba un bida felis awor i pa semper? Si ta asina, nos ta animá bo pa papia ku e persona ku a duna bo e revista akí òf pa tuma kontakto ku e editornan. Nan lo ta kontentu pa yuda bo.

^ par. 20 Pa mas informashon riba kon e Reino lo pone e boluntat di Dios kumpli riba tera, wak kapítulo 8 di e buki Kiko Beibel Ta Siña Realmente? publiká pa Testigunan di Yehova. E ta disponibel online i pa download for di www.jw.org.