Kiko Lo Tin den Futuro?
Kiko Lo Tin den Futuro?
DIKON TA IMPORTANTE PA HAÑA E KONTESTA? Loke un hende ta opiná tokante futuro tin efekto riba e manera ku e ta hiba su bida awor. Por ehèmpel, esnan ku no tin masha speransa pa futuro por tin e siguiente punto di bista: “Laga nos kome i bebe, pasobra mañan nos ta muri.” (1 Korintionan 15:32) Hopi bes e pensamentu ei por hiba na komementu i bebementu di mas i na ansiedat—i no na berdadero pas mental.
Pues, si nos futuro lo tabata dependé totalmente di esfuerso humano, nos lo tabata sin speransa. Nunka promé, hende a kontaminá e aire, awa i tera asina tantu. E menasa di un guera nuklear i atake terorista ta birando kada bes mas grandi. Malesa i pobresa ta afektá míles di miónes di hende rònt mundu. Sin embargo, nos tin bon motibu pa karga speransa.
Ounke hende no por pronostiká futuro ku eksaktitut, Yehova Dios ta deskribí su mes komo Esun ku “ta deklará e fin for di prinsipio, i for di tempunan antiguo, kosnan ku no a wòrdu hasí ainda.” (Isaias 46:10) Kiko Yehova ta bisa ku lo tin den futuro?
Loke Beibel Ta Bisa
Yehova lo no permití hende destruí e tera. De echo, Beibel ta primintí ku Dios lo “destruí esnan ku ta destruí e tera.” (Revelashon 11:18) Mediante su Reino, òf gobièrnu den shelu, Yehova lo eliminá maldat for di tera i kumpli ku su propósito original. (Génesis 1:26-31; 2:8, 9; Mateo 6:9, 10) E tekstonan di Beibel ku ta sigui ta laga nos mira kiko lo tin den futuro; nan ta deskribí susesonan ku pronto lo tin efekto riba kada hende riba tera.
Salmo 46:8, 9. “Bin, mira e obranan di SEÑOR, kende a hasi desolashonnan riba tera. E ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.”
Isaias 35:5, 6. “E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria. Pasobra awa lo basha den desierto, i koridanan di awa den Arabá.”
Isaias 65:21, 22. “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.”
Daniel 2:44. “E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”
Juan 5:28, 29. “No straña boso di esaki, pasobra e ora lo yega den kual tur ku ta den graf lo tende [Hesus] su bos, i lo sali.”
Revelashon 21:3, 4. “Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”
Kontesta Bíbliko Ta Duna Berdadero Pas Mental
Na promé instante, e kondishonnan deskribí anteriormente por parse muchu bon pa ta bèrdat. Pero no ta hende a hasi e promesanan aki, sino Dios. I Yehova Dios “no por gaña.”—Tito 1:2.
Si bo siña konfia den Dios su promesanan i biba na armonia ku su leinan, lo bo keda ku bo pas mental maske bo haña bo den e sirkunstansianan di mas difísil. Guera, pobresa, malesa i asta e problemanan di behes òf e echo ku bo ta konsiente ku bo ta bai muri—ningun di e kosnan aki lo kita bo pas permanentemente. Dikon nò? Pasobra lo bo ta konvensí ku e Reino di Dios lo eliminá e efekto di tur e kosnan malu aki.
Kon lo bo por haña e speransa firme aki pa futuro? Bo tin ku ‘renobá bo mente’ i komprobá pa bo mes kiko ta “e bon i agradabel i perfekto boluntat di Dios.” (Romanonan 12:2) Probablemente lo bo tin mester di mas prueba ku e promesanan di Beibel ta konfiabel. Un investigashon asina ta bale la pena. Masha poko kos ku bo hasi den bida lo duna bo un pas mental mas grandi ku esei.
[Plachinan na página 8, 9]
Kiko e Palabra di Dios ta bisa tokante futuro?