1, 2. Dicon nos mester ta interesa den Salmo 45?

UN REY glorioso ta sali riba cabay pa bringa pa causa di berdad y husticia y ta vence su enemigonan. Despues di gana e bataya final, e ta casa cu un bunita bruid. Generacion tras generacion, e rey aki ta ser recorda y honra. Basicamente, ta esey Salmo 45 ta papia di dje.

² Pero Salmo 45 ta encera mucho mas cu un storia emocionante cu un final feliz. E sucesonan cu e salmo aki ta relata tin hopi nificacion pa nos: Nan tin efecto riba nos bida awor y den futuro. Pues, laga nos presta bon atencion segun cu nos ta analisa e salmo aki.

3, 4. (a) Na kico e “palabranan bon” cu e salmista a menciona ta referi, y ki efecto esaki por tin riba nos curason? (b) Ki mensahe nos ta proclama tocante un rey, y den ki sentido nos lenga ta bira manera pen?

³ Lesa Salmo 45:1. E ‘bon palabranan’, of noticia, cu ta pone curason di e salmista “rebosa” ta tocante un rey. E verbo Hebreo traduci como “rebosa” ta nifica “brota.” E noticia tocante e rey a haci e salmista asina contento cu su curason tabata brota di entusiasmo y su lenga a bira manera “pen di un skirbido experto.”

 ⁴ Awor, kico di nos? E bon noticia tocante e Reino Mesianico sigur ta algo bon cu ta conmove nos curason. E mensahe di Reino a bira specialmente “bon” na 1914. Dicon? Pasobra di e tempo ey padilanti, e mensahe no tabata tocante un futuro Reino, pero tocante un gobierno real cu desde e tempo ey a cuminsa goberna den cielo. Esaki ta ‘e bon noticia di Reino’ cu nos ta predica “den henter e tera habita, como testimonio pa tur nacion.” (Mat. 24:14) E mensahe di Reino ta pone nos curason “rebosa”? Nos ta predica e bon noticia di Reino cu celo? Mescos cu e salmista a recita “poesia” tocante un rey, nos ta proclama Cristo como e Rey celestial di e Reino Mesianico y ta invita tur hende—hasta gobernantenan—pa somete nan mes na su reinado. (Sal. 2:1, 2, 4-12) Y debi cu nos ta uza e Palabra di Dios asina tanto den nos trabou di predica, ta comosifuera nos lenga ta bira manera “pen di un skirbido ­experto.”

5. (a) Den ki sentido Hesus tabata un “bunita” persona? (b) Den ki sentido palabranan yen di gracia tabata basha for di e Rey su boca, y con nos por imita su ehempel?

⁵ Lesa Salmo 45:2. E Scritura no ta duna hopi detaye tocante Hesus su apariencia. Pero como cu e tabata un homber perfecto, no tin duda cu e tabata un nechi hende. Pero loke realmente a ­hacie un “bunita” persona tabata su fieldad na Jehova y e echo cu e tabata un homber integro. Ademas, Hesus a predica e mensahe di Reino “yen di gracia” y a uza palabranan cu a conmove curason di hende. (Luc. 4:22; Juan 7:46) Nos ta haci esfuerso pa sigui Hesus su ehempel ora nos ta predica?—Col. 4:6.

6. Con Dios a bendiciona Hesus “pa semper”?

⁶ Debi cu Hesus a sirbi Jehova cu henter su curason, Jehova a bendicion’e durante su sirbishi aki riba tera y a recompens’e despues cu el a entrega su bida como sacrificio. Apostel Pablo a skirbi: “Ora [Hesus] a presenta como hende, el a humilia su mes y a bira obediente te na morto, si, morto riba un staca di tormento. Pa e motibo aki mes tambe Dios a hals’e na un puesto mas halto y bondadosamente a dun’e e nomber cu ta riba tur otro nomber, di manera cu den nomber di Hesus tur rudia mester dobla—di esnan den cielo, di esnan riba tera y di esnan bou di tera—y tur lenga mester reconoce publicamente cu Hesucristo ta Señor pa gloria di Dios, e Tata.” (Flp. 2:8-11) Si, Jehova a bendiciona Hesus “pa semper”: El a resucit’e y a dun’e bida inmortal.—Rom. 6:9.

7. Den ki sentido Dios a ungi Hesus mas cu su “compañeronan”?

⁷ Lesa Salmo 45:7. Como cu Hesus ta stima husticia y ta odia tur loke cu por deshonra nomber di su Tata, Jehova a ungie como Rey di e Reino Mesianico. Hesus a ser ungi cu “e zeta di goso”, mas cu su “compañeronan”, esta, mas cu e reynan di Juda kendenan a bin di e liña di descendencia di David. Awor, den ki sentido Hesus a ser ungi mas cu su compañeronan? Wel, pa di prome, ta  Jehova mes a ungi Hesus. Di dos, Jehova a ungie como Rey y como Sumo Sacerdote. (Sal. 2:2; Heb. 5:5, 6) Y di tres, Hesus no a ser ungi cu zeta pero cu spirito santo, y su reinado no ta na tera pero den cielo.

8. Den ki sentido ‘Dios ta e trono di Hesus’, y dicon nos por ta sigur cu Hesus lo goberna cu husticia?

⁸ Lesa Salmo 45:6. * Jehova a entronisa su Yiu na 1914 como Rey di e Reino Mesianico den cielo. ‘E bara di su Reino ta un bara di rectitud’, pues nos por ta sigur cu Hesus lo goberna cu rectitud y husticia. Y e tin tur derecho di ta Rey pasobra ta ‘Dios ta su trono;’ cu otro palabra, ta Jehova a nombr’e como Rey. Y Hesus su trono lo dura “pa tur eternidad.” Bo no ta sinti bo orguyoso di por sirbi Jehova como subdito di un Rey poderoso cu E mes a nombra?

9, 10. (a) Na ki tempo Hesus a faha su spada, y con el a haci uzo di dje mesora? (b) Con Cristo lo uza su spada den futuro?

⁹ Lesa Salmo 45:3. Jehova a bisa e Rey pa e ‘faha su spada na su heup.’ Di e manera ey, Jehova a duna Hesus autorisacion pa bringa contra tur esnan cu ta opone e soberania di Dios y pa ehecuta Su huicionan riba nan. (Sal. 110:2) Y como cu Cristo ta un Rey y Guerero invencibel, Bijbel ta yam’e “esun poderoso.” El a faha su spada na 1914 y a vence Satanas y su demoñonan, saca nan for di cielo y benta nan den bisindario di tera.—Rev. 12:7-9.

¹⁰ Esey tabata djis e comienso di e Rey su careda victorioso. Ainda e tin cu “completa su victoria.” (Rev. 6:2) Ainda e tin cu destrui tur e elementonan di e mundo di Satanas. Ademas, e tin cu encarcela Satanas y su demoñonan pa nan no influencia hende mas. E prome elemento cu lo ser elimina ta Babilonia e Grandi, e imperio di religion falso. Jehova su proposito ta pa uza mundo su gobernantenan pa destrui e “prostituta” malbado aki. (Rev. 17:16, 17) Despues, Cristo lo elimina henter e sistema politico di Satanas su mundo. Finalmente, Cristo, kende ta ser yama tambe “e angel di e abismo”, lo completa su victoria: Lo e tira Satanas y su demoñonan den abismo. (Rev. 9:1, 11; 20:1-3) Laga nos wak con Salmo 45 a profetisa e sucesonan emocionante aki.

11. Den ki sentido Cristo ta bringa “pa causa di berdad”?

¹¹ Lesa Salmo 45:4. E Rey-Guerero no ta bringa un guera djis pa conkista teritorio y captura pueblonan. E ta bringa un guera husto cu motibonan noble. E ta bringa “pa causa di berdad, humildad y husticia.” Awor, den ki sentido e ta bringa “pa causa di berdad”? Wel, e ta defende e berdad di mas grandi cu mester ser defende, esta, e berdad encuanto Jehova su soberania universal. Satanas a cuestiona Jehova su derecho di goberna ora el a rebela contra Dje. Desde e tempo ey, tanto hende como e demoñonan ta cuestiona e berdad fundamental ey. Awor a yega tempo pa Jehova su Rey ungi proba unabes y pa semper cu ta Jehova so tin e derecho di goberna.

12. Con nos por ta sigur cu e Rey lo sigui bringa ‘pa causa di humildad’?

¹² E Rey ta bringa ‘pa causa di humildad’ tambe. Hesus mes, como Yiu unigenito di Dios, a pone un excelente  ehempel di humildad y a somete su mes lealmente na e soberania di su Tata. (Isa. 50:4, 5; Juan 5:19) Tur subdito leal di e Rey mester sigui su ehempel y somete nan mes humildemente na e soberania di Jehova den tur cos. Ta solamente esnan cu haci esey lo haya chens di biba den e mundo nobo cu Dios a priminti.—Zac. 14:16, 17.

13. Den ki sentido Cristo ta bringa ‘pa causa di husticia’?

¹³ Cristo ta bringa tambe ‘pa causa di husticia.’ E husticia cu e Rey ta defende ta loke Dios ta considera “husto”—Jehova su normanan di loke ta bon y malo. (Rom. 3:21; Deu. 32:4) Relaciona cu Rey Hesucristo, Isaias a profetisa: “Un rey lo reina cu husticia, y prinsnan lo goberna cu huicio.” (Isa. 32:1) Durante su reinado, Hesus lo trece “cielo nobo” y e “tera nobo” priminti den cua “husticia lo biba.” (2 Ped. 3:13) Tur habitante di e mundo nobo ey lo mester cumpli cu e normanan di Jehova.—Isa. 11:1-5.

14. Den ki sentido e man drechi di Cristo lo haci “kosnan spantoso”? (Wak e prome plachi.)

¹⁴ Segun e salmista, e Rey a sali cu un spada faha na su heup. (Sal. 45:3) E tempo lo yega cu lo e saca su spada cu su man drechi y uz’e. E salmista a profetisa cu Hesus lo haci “kosnan spantoso.” (Sal. 45:4, BPK) Ora Hesucristo ehecuta e huicionan di Jehova na Armagedon, lo e haci “kosnan spantoso” contra su enemigonan. Nos no sa precies con Hesus lo destrui e mundo di Satanas. Pero un cos ta sigur: Loke e ta bay haci lo hinca temor den e habitantenan di tera cu no a haci caso di e spiertamento divino pa somete nan mes na e gobernacion di e Rey. (Lesa Salmo 2:11, 12.) Hesus mes a bisa den su profecia tocante e fin cu hende lo “desmaya di miedo y di ansha pa e cosnan cu lo bin riba e tera habita, pasobra e podernan di cielo lo keda sacudi.” El a bisa tambe: “Anto nan lo mira e Yiu di hende bin den un nubia cu poder y gran gloria.”—Luc. 21:26, 27.

15, 16. Ken lo forma “e ehercitonan” cu lo compaña Cristo den e bataya?

¹⁵ E buki di Revelacion ta bisa cu e Rey ta bin pa ehecuta huicio “cu poder y gran gloria.” E ta bisa: “Mi a mira cielo habri, y ata un cabay blanco. Y esun sinta riba dje yama Fiel y Berdadero, y e ta husga y bringa guera cu husticia. Es mas, e ehercitonan den cielo tabata siguie riba cabay blanco, y nan tabata bisti na linen fini, blanco y limpi. Y for di su boca tabata sali un spada largo y skerpi pa e por a dal e nacionnan cu ne, y lo e goberna nan cu un bara di hero. Ademas, lo e trapa den e baki di pers druif cu ta e furia di e rabia di Dios, e Todopoderoso.”—Rev. 19:11, 14, 15.

¹⁶ Ken ta e guereronan cu ta forma “e ehercitonan” cu lo compaña Cristo den e bataya? Ora Hesus a faha su spada pa saca Satanas y su demoñonan for di cielo, e tabata compaña pa “su angelnan.” (Rev. 12:7-9) Pues, ta parce logico pa conclui cu na e guera di Armagedon, Cristo su angelnan santo lo forma parti di su ehercito. Tin mas persona cu lo forma parti di su ehercito? Hesus a priminti su rumannan ungi lo siguiente: “Esun cu sali victorioso y cumpli te na fin cu loke mi a manda lo mi duna autoridad riba e nacionnan, e mesun autoridad cu mi a ricibi di mi Tata. Y e persona ey lo goberna e pueblo cu un bara di hero di manera cu nan lo ser destrui na pida pida mescos cu pochi di klei.” (Rev. 2:26, 27) Pues, Cristo su  rumannan ungi, kendenan tur lo ta den cielo e tempo ey, tambe lo forma parti di su ehercito celestial. E co-gobernantenan ungi aki lo ta na lado di Cristo ora e ta haci “kosnan spantoso” mientras e ta goberna e nacionnan cu bara di hero.

17. (a) Kico e cabay blanco cu Cristo ta sinta riba dje ta representa? (b) Kico e spada y e boog ta simbolisa?

¹⁷ Lesa Salmo 45:5. Revelacion 6:2 ta bisa: “Mi a wak, y ata un cabay blanco; y esun sinta riba dje tabatin un boog; y Dios a dun’e un corona, y el a sali bay, venciendo su enemigonan y pa completa su victoria.” E echo cu e Rey ta sinta riba cabay blanco ta nifica cu e ta bringa un guera limpi y husto den Jehova su bista. (Rev. 19:11) Fuera di un spada, e Rey tin un boog tambe. Tanto e spada como e boog ta simbolisa e medionan cu Cristo lo uza pa ehecuta huicio riba su enemigonan.

18. Kico lo sosode ora Cristo uza su “flechanan”?

¹⁸ Uzando idioma poetico, e salmista a profetisa cu e Rey su ‘flechanan skerpi’ lo penetra ‘curason di su enemigonan’ y pone ‘pueblonan cay’ su dilanti. E matanza aki lo ta mundial. Jeremias a profetisa: “Esnan cu SEÑOR mata riba e dia ey lo keda benta tur caminda, for di esun extremo di mundo te na e otro.” (Jer. 25:33) Un profecia paralelo ta bisa: “Mi a mira tambe un angel parha den solo, y cu stem duro el a grita tur parha cu ta bula den cielo: ‘Bin akinan! Bin hunto pa e gran bankete di Dios, pa boso por come carni di rey, carni di comandante militar, carni di homber fuerte, carni di cabay y di esnan sinta riba nan y carni di tur hende, tanto di hende liber como di esclavo, di grandi y di chikito.’”—Rev. 19:17, 18.

19. Con Cristo lo sigui “bay victoriosamente” y completa su victoria?

¹⁹ Despues di destrui e mundo malbado di Satanas, Cristo, den tur su splendor, of mahestad, lo sigui “bay victoriosamente.” (Sal. 45:4) Lo e completa su victoria ora e tira Satanas y su demoñonan den abismo, caminda nan lo keda durante henter e Reinado di Mil Aña. (Rev. 20:2, 3) Como cu Diabel y su demoñonan lo ta inactivo e tempo ey, habitantenan di tera lo ta liber di influencia satanico y nan lo por somete nan mes completamente na nan victorioso y glorioso Rey. Pero, prome cu nan por mira planeta Tera completamente transforma den un paradijs mundial, nan lo tin un otro motibo pa alegra hunto cu nan Rey y su co-gobernantenan celestial. E siguiente articulo lo trata e acontecimento gososo ey.