လူငယ်များအမေး
ငါ့ဒေါသကို ဘယ်လိုထိန်းနိုင်မလဲ
အမေးပုစ္ဆာ
သင့်ရဲ့ ဒေါသထွက်တတ်တဲ့ အခြေအနေကို ဘယ်လိုဖော်ပြမလဲ
ဒေါသမထွက်သလောက်
တစ်ခါတလေ
နေ့တိုင်း
ဘယ်လောက်အတိုင်းအတာအထိ ဒေါသထွက်တတ်သလဲ
စိတ်အနှောင့်အယှက်ဖြစ်
စိတ်တို
ဒေါသပေါက်ကွဲ
ဘယ်သူတွေကို စိတ်ဆိုးလေ့ရှိသလဲ
မိဘ
မွေးချင်း
သူငယ်ချင်း
ဒေါသကိုထိန်းချုပ်ဖို့ လိုအပ်တဲ့အကူအညီကို ဒီဆောင်းပါးမှာ ဖော်ပြထားပါတယ်။ အရင်ဆုံး၊ ဒေါသထွက်စရာအခြေအနေ ကြုံရတဲ့အခါ ဘာကြောင့် စိတ်အေးအေးထားဖို့ အရေးကြီးတာလဲဆိုတဲ့ အကြောင်းရင်းတချို့ကို သုံးသပ်ကြည့်ရအောင်။
ဘာကြောင့်အရေးအကြီး
ကိုယ်တိုင်ရဲ့ ကောင်းကျိုးအတွက်ပါ။ သုတ္တံ ၁၄:၃၀ (ကဘ) မှာ ဒီလိုပြောထားတယ်- ‘အေးဆေးတည်ငြိမ်တဲ့စိတ်နှလုံးက ကိုယ်ခန္ဓာကို အသက်ရှင်စေတယ်။’ အဲဒါနဲ့ဆန့်ကျင်ဘက်ကတော့ “ဒေါသကြီးတဲ့သူကတော့ နှလုံးရောဂါတွေ ရတတ်တယ်” လို့ စာအုပ်တစ်အုပ် (Journal of Medicine and Life) မှာ ဆိုထားတယ်။
သူငယ်ချင်းတွေဆုံးရှုံးနိုင်တယ်။ “စိတ်တိုသောသူကို မိတ်ဆွေမဖွဲ့နှင့်။ အမျက်ပြင်းထန်သောသူနှင့်အတူ မလိုက်နှင့်” လို့ ကျမ်းစာမှာ ပြောထားတယ်။ (သုတ္တံ ၂၂:၂၄) ကိုယ်က ဒေါသထွက်လွယ်တဲ့သူဖြစ်လို့ လူတွေက ကိုယ့်ကို အပေါင်းအသင်းမလုပ်ချင်ကြဘူးဆိုရင် မအံ့ဩပါနဲ့။ “ဒေါသကို မထိန်းတတ်ဘူးဆိုရင် တကယ်ကောင်းတဲ့ အပေါင်းအသင်းတွေ ဆုံးရှုံးသွားနိုင်တယ်” လို့ ဂျက်စမင်လို့ခေါ်တဲ့ မိန်းမငယ်လေးက ပြောတယ်။
နာမည်ပျက်နိုင်တယ်။ “ကိုယ်က ဒေါသထွက်လွယ်တဲ့သူ ဖြစ်မယ်ဆိုရင် အဲဒါကို လူတွေမြင်ပြီး ကိုယ်ဘယ်လိုလူစားလဲဆိုတာကို သတ်မှတ်လိမ့်မယ်” လို့ ၁၇ နှစ်အရွယ် အီသန် ကပြောတယ်။ ကိုယ့်ကိုယ်ကိုယ် ဒီလိုမေးပါ- “ကိုယ့်ကို ရန်ငြိမ်းစေတဲ့သူအဖြစ် လူသိစေချင်သလား၊ ပေါက်ကွဲတော့မယ့် ဗုံးတစ်လုံးနဲ့တူတဲ့သူလို့ သိစေချင်သလား။ ‘ဒေါသထွက်နှေးသူဟာ ပိုင်းခြားသိမြင်မှုကြွယ်ဝသူဖြစ်တယ်။ စိတ်မရှည်သူကတော့ ကိုယ့်မိုက်မဲမှုကို ဖော်ပြတတ်တယ်’ လို့ ကျမ်းစာမှာ ပြောထားတယ်။—သုတ္တံ ၁၄:၂၉၊ ကဘ။
လုပ်ဆောင်နိုင်ရာ
အောက်ပါကျမ်းချက်တွေနဲ့ မှတ်ချက်တွေကိုဖတ်ပြီး ဖော်ပြထားတဲ့ မေးခွန်းတွေကို ဖြေပါ။
သုတ္တံ ၂၉:၂၂၊ ခမ– “ဒေါသကြီးတတ်သောသူသည် ခိုက်ရန်ဖြစ်ပွားစေတတ်၏။ အမျိုးမျိုးသောကျူးလွန်မှုကိုလည်း ပြုတတ်လေသည်။”
“ဆယ်ကျော်သက်တုန်းကဆိုရင် ကျွန်မဒေါသကို ထိန်းဖို့ တကယ်ခက်တယ်။ ကျွန်မအဖေဘက်က အမျိုးတွေလည်း အဲဒီလိုပဲ။ ကျွန်မတို့အားလုံး မျိုးရိုးလိုက်တယ်လို့ ထင်တယ်။ ကျွန်မတို့တွေ ဒေါသကို ဘယ်လိုမှ မထိန်းချုပ်နိုင်ကြဘူး။”—ကယ်ရီ။
ငါက အလွယ်တကူ ဒေါသထွက်တတ်သူလား။ ကောင်းတဲ့ကိုယ်ရည်ကိုယ်သွေးအတွက်တော့ ဂုဏ်ယူပြီး မကောင်းတဲ့အကျင့်တွေအတွက် မျိုးရိုးလိုက်ပါတယ်လို့ အပြစ်ဖို့တာက သင့်တော်ရဲ့လား။
သုတ္တံ ၁၅:၁၊ ကဘ– ‘နူးညံ့သိမ်မွေ့စွာ ပြန်ပြောတဲ့စကားက ဒေါသကိုပြေစေတယ်။ ကြမ်းတမ်းတဲ့စကားကတော့ ဒေါသကိုဆွပေးတယ်။’
“အဓိက,ကတော့ ကိုယ့်ရဲ့ခံစားချက်တွေကို ထိန်းချုပ်နိုင်စွမ်းရှိဖို့ပဲ။ ကိုယ်က နူးညံ့သိမ်မွေ့မှုပြမယ်၊ အကောင်းမြင်ဖို့ ကြိုးစားမယ်ဆိုရင် ဒေါသထွက်လွယ်မှာ မဟုတ်သလို အမှားလုပ်မိမှာလည်း မဟုတ်တော့ဘူး။”—ဒါယဲလ်။
ရန်စခံရတဲ့အခါ ငါ့ရဲ့တုံ့ပြန်ပုံက ဘာကြောင့် အရေးကြီးသလဲ။
သုတ္တံ ၂၆:၂၀၊ ခမ– “ထင်းမရှိလျှင် မီးသေတတ်၏။”
“ကျွန်မဘက်က ကြင်နာစွာပြန်တုံ့ပြန်တဲ့အခါ တစ်ဖက်သားပါ အေးအေးဆေးဆေး ဖြစ်သွားတယ်။ စိတ်ဆိုးရန်ဖြစ်ကြမယ့်အစား အေးအေးဆေးဆေး ဖြေရှင်းနိုင်သွားတယ်။”—ဂျက်စမင်။
ငါ့ရဲ့အပြောအဆိုနဲ့လုပ်ရပ်က ဒေါသကို ပိုပြီး ထွက်စေသလား။
သုတ္တံ ၂၂:၃၊ ခမ– “စဉ်းစားဉာဏ်ရှိသူတို့သည် မိမိတို့ကြုံတွေ့ရမည့်ဒုက္ခကို ကြိုတင်တွေ့မြင်၍ ရှောင်ရှားတတ်ကြ၏။ စဉ်းစားဉာဏ်မဲ့သူတို့မူကား ဒုက္ခနှင့် ထိပ်တိုက်ဝင်၍ တိုးပြီးကာမှ နောင်တရတတ်ကြလေသည်။”
“တစ်ခါတလေ အဲဒီနေရာကနေ ရှောင်ထွက်သွားပြီး ဖြစ်ခဲ့တာတွေကို အချိန်ပေးစဉ်းစားတယ်။ စိတ်တည်ငြိမ်သွားတဲ့နောက်ပိုင်းမှ အဲဒါကို ကောင်းကောင်းဖြေရှင်းနိုင်တယ်။”—ဂယ်ရီ။
တခြားသူကို မသိကျိုးကျွန်ပြုပြီး ထွက်သွားတဲ့ပုံစံမျိုးမပေါက်စေဘဲ တင်းမာနေတဲ့ အခြေအနေကနေ ရှောင်ထွက်သွားဖို့ ဘယ်အချိန်က အကောင်းဆုံးဖြစ်မလဲ။
ယာကုပ် ၃:၂– “ငါတို့ရှိသမျှသည် ကြိမ်ဖန်များစွာ မှားတတ်ကြ၏။”
“အမှားတွေအတွက် နောင်တရသင့်သလို သင်ခန်းစာလည်း ယူသင့်တယ်။ ဒေါသထွက်မိသွားပြီဆိုရင်လည်း နောက်တစ်ခေါက် ဒေါသကို ဘယ်လို ထိန်းမလဲဆိုတာ ကြိုတင်ဆုံးဖြတ်ထားသင့်တယ်။”—ကယ်ရီ။
အကြံပြုချက်– တစ်လလောက် ဒေါသကို ထိန်းနိုင်အောင် ကြိုးစားမယ်လို့ ပန်းတိုင်ချကြည့်ပါ။ တိုးတက်မှုရှိမရှိ စာအုပ်ထဲမှာ မှတ်ထားပြီး မကြာမကြာ စစ်ဆေးကြည့်ပါ။