အခြားဘာသာတရားများကို သင်စူးစမ်းသင့်သလော
အခြားဘာသာတရားများကို သင်စူးစမ်းသင့်သလော
တောင်အမေရိကမှ ယခု ယေဟောဝါသက်သေတစ်ဦးဖြစ်သူ မီဂေးလ်က “ခရစ်ယာန်အစည်းအဝေးတွေတက်တာ တစ်နှစ်နီးပါးရှိပြီး တခြားသူတွေကို ဘုရားသခင့်နိုင်ငံတော်အကြောင်း ပြောပြရတာ ကျွန်တော်ပျော်တယ်” ဟုဆိုသည်။ “အဲဒီနောက်တော့ ရေဒီယိုကလာတဲ့ ဘာသာရေးအစီအစဉ်တွေကို စနားထောင်ပြီး ရုပ်မြင်သံကြားမှာ ဘာသာရေးဟောပြောသူတွေကို ကြည့်ခဲ့တယ်။ ဒီအစီအစဉ်တွေဟာ တခြားဘာသာကလူတွေအကြောင်း ပိုပြီးနားလည်လာအောင် ကျွန်တော့်ကို ကူညီပေးနိုင်မယ်လို့ထင်ခဲ့တယ်။ သူတို့ရဲ့သွန်သင်ချက်တွေက ကျမ်းစာနဲ့မကိုက်ညီဘူးဆိုတာ ကျွန်တော်သိခဲ့ပေမဲ့ စပ်စုခဲ့တယ်။”
ထိုနိုင်ငံမှပင် ဟောရ်ဟာသည် စစ်မှန်သောဝတ်ပြုရေးအကြောင်းကို အခြားသူများအား သွန်သင်ပေးရာ၌ စိတ်အားထက်သန်သူတစ်ဦးဖြစ်သည်။ သို့တိုင် တစ်ခါသော် သူလည်း ရေဒီယိုနှင့်ရုပ်မြင်သံကြားမှ ဘာသာရေးအစီအစဉ်များကို စတင်နားထောင်ခဲ့၏။ “တခြားသူရဲ့ ထင်မြင်ယူဆချက်တွေကို သိထားဖို့လိုတယ်” ဟုသူပြောလေ့ရှိသည်။ မှားယွင်းသည့်သွန်သင်ချက်များကို ထိုသို့နားထောင်ခြင်းမှ ဖြစ်လာနိုင်ဖွယ်အန္တရာယ်များအကြောင်းကို မေးသောအခါ သူက “ကျမ်းစာအမှန်တရားသိတဲ့သူရဲ့ ယုံကြည်ခြင်းကို ဘာကမှ မဖျက်ဆီးနိုင်ပါဘူး” ဟုဖြေပါလိမ့်သည်။ ယင်းအတွေ့အကြုံများကြောင့် အခြားသူများ၏ယုံကြည်ခြင်းကို နားထောင်ခြင်းသည် ပညာရှိရာကျပါသလော ဟူသည့် အရေးကြီးသောမေးခွန်းတစ်ခု ပေါ်ပေါက်လာသည်။
စစ်မှန်သောခရစ်ယာန်ဘာသာကို သိမှတ်ခြင်း
တမန်တော်များ ကွယ်လွန်ပြီးနောက် ခရစ်ယာန်ဘာသာအတုအယောင်ပုံစံအမျိုးမျိုး ထွန်းကားလာခြင်းကြောင့် စစ်မှန်သောဝတ်ပြုရေးမှာ ညစ်ညမ်းလာလေသည်။ ယေရှုသည် ၎င်းကိုကြိုတင်သိမြင်သောကြောင့် စစ်မှန်သောခရစ်ယာန်ဘာသာနှင့် အတုအယောင်ခရစ်ယာန်ဘာသာအသွင်များကို ခွဲခြားသိမြင်နိုင်သည့် နည်းတစ်နည်းကို ဖော်ထုတ်ပြသခဲ့သည်။ ကိုယ်တော်သည် ဦးဆုံးဤသို့သတိပေးခဲ့သည်– “အတွင်း၌ ကြမ်းတမ်းသောဝံပုလွေဖြစ်လျက်၊ သိုးရေကိုခြုံ၍ သင်တို့ ရှိရာသို့လာသော [မှားသော]ပရောဖက်တို့ကို သတိနှင့်ရှောင်ကြလော့။” ထို့နောက် ဤသို့ထပ်ဆင့်မိန့်ဆိုခဲ့၏– “ထိုသူတို့၏အသီးကိုထောက်၍ သူတို့ကိုသိကြလိမ့်မည်။” (မဿဲ ၇:၁၅-၂၃၊ သမ္မာ) ယေရှု၏နောက်လိုက်စစ်များသည် ကိုယ်တော်သွန်သင်ပေးခဲ့ရာများကို ကျင့်သုံးကာ သူတို့၏အသီးကောင်းများကြောင့် သူတို့ကို အလွယ်တကူသိရှိကြသည်။ ယေရှုကိုယ်တိုင်လုပ်ဆောင်သကဲ့သို့ သူတို့သည် သမ္မာကျမ်းစာမှ ဘုရားသခင့်နိုင်ငံတော်အကြောင်းကို ရှင်းပြရန် လူတို့ထံ လည်ပတ်ကြသည်။ ယေရှု၏ပုံသက်သေကိုလိုက်ကာ သူတို့သည် ကမ္ဘာ့နိုင်ငံရေးနှင့် လူမူရေးအငြင်းပွားမှုများမှ သီးခြားနေကြသည်။ သမ္မာကျမ်းစာကို ဘုရားသခင့်နှုတ်မြွက်စကားတော်အဖြစ် လက်ခံကြကာ အမှန်တရားအဖြစ်လေးမြတ်ကြ၏။ ဘုရားသခင်၏နာမတော်ကို ထင်ရှားစေကြသည်။ ထို့ပြင် သူတို့သည် ဘုရားသခင်သွန်သင်ပေးသည့် ချစ်ခြင်းကို ကြိုးစားကျင့်သုံးကြသောကြောင့် စစ်ပွဲများတွင် မပါဝင်ကြချေ။ ယင်းအစား၊ တစ်ယောက်နှင့်တစ်ယောက် ညီအစ်ကိုချင်းများကဲ့သို့ သဘောထားဆက်ဆံကြသည်။—လုကာ ၄:၄၃; ၁၀:၁-၉; ယောဟန် ၁၃:၃၄၊ ၃၅; ၁၇:၁၆၊ ၁၇၊ ၂၆။
ကျမ်းစာအဆိုအရ “ဖြောင့်မတ်သောသူ၊ မဖြောင့်မတ်သောသူ၊ ဘုရားသခင်၏အမှုတော်ကိုဆောင်သောသူ၊ မဆောင်သောသူတို့ကို ပိုင်းခြား၍သိ” မြင်နိုင်ပါသည်။ (မာလခိ ၃:၁၈) ပထမရာစုခရစ်ယာန်များကဲ့သို့ ယနေ့ စစ်မှန်သောဝတ်ပြုသူများသည် အတွေးအခေါ်နှင့်အပြုအမူတို့တွင် စည်းလုံးညီညွတ်ကြသည်။ (ဧဖက် ၄:၄-၆) သင်သည် ဤစစ်မှန်သောခရစ်ယာန်အဖွဲ့ကို ခွဲခြားသိမြင်ပြီဆိုလျှင် အခြားသူများ၏ယုံကြည်ချက်များကို အဘယ်ကြောင့် စူးစမ်း သို့မဟုတ် စပ်စုသင့်သနည်း။
မှားသောသွန်သင်သူများကို သတိပြု
ကျမ်းစာအမှန်တရားသိရှိပြီးနောက်၌ပင် မှားသောသွန်သင်ချက်များကြောင့် ဝိညာဉ်ရေးညစ်ညမ်းမှုအန္တရာယ်ရှိကြောင်း သမ္မာကျမ်းစာက အသိအမှတ်ပြုသည်။ “ခရစ်တော်၏တရားကိုမလိုက်၊ လူအဆက်ဆက်ခံသော နည်းဥပဒေသနှင့် လော[က]တရားနုကိုလိုက်၍၊ လော[က]ပညာနှင့် အချည်းနှီးသောပရိယာယ်အားဖြင့် သင်တို့ကို အဘယ်သူမျှ မလုယူမဖျက်ဆီးစေခြင်းငှာ သတိပြုကြလော့” ဟူ၍ တမန်တော်ပေါလုက သတိပေးခဲ့သည်။ (ကောလောသဲ ၂:၈) ရုပ်လုံးပီပြင်အောင် ဆွဲပြထားသည့်စုတ်ချက်ပါတကား! သားရဲများသည် သင့်ကို အလုအယက်ကိုက်ဖြတ်လိုသကဲ့သို့ မှားသောသွန်သင်သူများသည် အမှန်ပင်အန္တရာယ်ပေးနိုင်သည်။
ပေါလုသည် အခြားသူများ၏ယုံကြည်ရာများကို အလေးထားခဲ့သည်မှာမှန်၏။ တစ်ခါက သူသည် “အချင်းအာသင်လူတို့၊ သင်တို့သည် ခပ်သိမ်းသောအရာတို့၌ နတ်ဘုရားတို့ကို အလွန်ရိုသေတတ်ကြသည်ကို ငါမြင်ပါ၏။ လမ်း၌သွား၍ သင်တို့၏ဘုရားများကို ကြည့်ရှုသည်တွင် ‘ငါတို့မသိသောဘုရားသခင်အဖို့’ ဟူ၍ အက္ခရာတင်သော ယဇ်ပလ္လင်တစ်ခုကိုတွေ့ပါ၏” ဟုပြောဆိုကာ ဟောပြောချက်ကိုစတင်ခဲ့သည်။ (တမန်တော် ၁၇:၂၂၊ ၂၃) သို့ရာတွင် ပေါလုသည် ဂရိဟောပြောသူများ၏ အတွေးအခေါ်များကို မှန်မှန်ဆည်းပူးလေ့လာခြင်းမျိုးမရှိခဲ့ချေ။
မှားသောဘာသာတရားများ၏ ရင်းမြစ်များနှင့်ယုံကြည်ချက်များအကြောင်းကို သိရှိထားခြင်းသည် ယင်းတို့ကို လေ့လာခြင်းနှင့် တခြားစီဖြစ်သည်။ * ယေဟောဝါသည် ကိုယ်တော်၏နှုတ်မြွက်စကားတော်ကို အခြေပြု၍ သွန်သင်ပေးရန် “သစ္စာနှင့်သတိပညာရှိသောကျွန်” ကိုခန့်အပ်ထား၏။ (မဿဲ ၄:၄; ၂၄:၄၅၊ သမ) “သခင်ဘုရား၏စားပွဲ၊ နတ်ဆိုးတို့၏စားပွဲနှစ်ပါးကို သင်တို့ဝင်၍ မစားနိုင်ကြ။ သခင်ဘုရားအမျက်တော်ထွက်စေခြင်းငှာ ငါတို့ပြုရကြသလော” ဟူ၍ ပေါလုကိုယ်တိုင်ရေးခဲ့သည်။—၁ ကောရိန္သု ၁၀:၂၀-၂၂။
မှားသောသွန်သင်သူအချို့သည် ယခင်က စစ်မှန်သောခရစ်ယာန်များဖြစ်ခဲ့ကြသော်လည်း တစ်ချိန်တွင် သူတို့သည် အမှန်တရားမှ မှားယွင်းခြင်းသို့ လှည့်သွားခဲ့ကြသည်။ (ယုဒ ၄၊ ၁၁) ၎င်းကို မအံ့သြသင့်ပါ။ ယေရှုသည် ဘိသိက်ခံခရစ်ယာန်များအဖွဲ့ကို ကိုယ်စားပြုသည့် “သစ္စာနှင့်သတိပညာရှိသောကျွန်” အကြောင်းကို မိန့်ဆိုပြီးနောက် “ငါ့အရှင်လာခဲလိမ့်မည်” ဟုညည်းညူကာ ကျွန်ချင်းတို့ကို ရိုက်ပုတ်ကြသော “ကျွန်ဆိုး” အတန်းအစားအကြောင်းကိုလည်း မိန့်ဆိုခဲ့သည်။ (မဿဲ ၂၄:၄၈၊ ၄၉) အဆိုပါလူတို့နှင့် သူတို့၏နောက်လိုက်များတွင် ရှင်းလင်းသောသွန်သင်ချက်မရှိချေ; အခြားသူတို့၏ယုံကြည်ခြင်းကို ဖျက်ဆီးဖို့သာ စိတ်ဝင်စားကြသည်။ သူတို့နှင့်ပတ်သက်၍ တမန်တော်ယောဟန်က ဤသို့ရေးခဲ့၏– “ထို[တရား]တော်မပါသောသူသည် သင်တို့ထံသို့လာလျှင်၊ သူ့ကို သင့်အိမ်၌လက်မခံနှင့်။ မင်္ဂလာရှိစေသောဟု နှုတ်မဆက်နှင့်။”—၂ ယောဟန် ၁၀; ၂ ကောရိန္သု ၁၁:၃၊ ၄၊ ၁၃-၁၅။
အမှန်တရားကို ရိုးရိုးသားသားရှာဖွေလျက်ရှိသူများသည် ဘာသာတရားအမျိုးမျိုးမှ ကြားသိရာများကို သေချာစွာသုံးသပ်လျှင် ကောင်းပေမည်။ အချိန်တန်သော် ဘုရားသခင်သည် အမှန်တရားကို ရှာဖွေနေကြသော စိတ်နှလုံးရိုးဖြောင့်သူများကို ကောင်းချီးပေးလိမ့်မည်ဖြစ်သည်။ သမ္မာကျမ်းစာက ဘုရားသခင်ရေးရာဉာဏ်ပညာအကြောင်းကို ဤသို့ဆိုသည်– “ငွေကိုရှာတတ်သကဲ့သို့ ပညာကိုရှာ၍ ဝှက်ထားသောဘဏ္ဍကို စူးစမ်းတတ်သကဲ့သို့ ဉာဏ်ကိုစူးစမ်းလျှင်လည်းကောင်း . . . ဘုရားသခင်ကိုသိသောဉာဏ် [“ဘုရားသခင်ကိုသိကျွမ်းခြင်းပညာ၊” ကဘ] နှင့်ပြည့်စုံလိမ့်မည်။” (သု. ၂:၄၊ ၅) သမ္မာကျမ်းစာနှင့် ခရစ်ယာန်အစည်းအဝေးတို့မှတစ်ဆင့် အဆိုပါဘုရားသခင်ကိုသိကျွမ်းခြင်းပညာကို တွေ့ ရှိပြီး ထိုအသိပညာ၏ လမ်းညွှန်မှုခံရသူများအား ယေဟောဝါကောင်းချီးပေးပုံကို မြင်တွေ့ ကြရသောကြောင့် စစ်မှန်သောခရစ်ယာန်များသည် မှားသောဘာသာရေးသွန်သင်ချက်များကို ဆက်၍နားမထောင်ကြတော့ချေ။—၂ တိမောသေ ၃:၁၄။
[အောက်ခြေမှတ်ချက်များ]
^ အပိုဒ်၊ 10 နယူးယောက်၊ ကင်းမျှော်စင် သမ္မာကျမ်းစာနှင့် ဝေစာအသင်းမှ ထုတ်ဝေထားသော ဘုရားသခင်ကို လူသားများရှာပုံတော် စာအုပ်တွင် ကမ္ဘာ့ဘာသာတရားများစွာ၏ နောက်ခံနှင့် သွန်သင်ချက်များနှင့်ပတ်သက်၍ အခြေခံအချက်အလက်ကို ဖော်ပြထားသည်။