မျက်နှာဖုံးအကြောင်းအရာ | အလေ့အကျင့်ကောင်းတွေ ပျိုးထောင်နိုင်ပုံ
၂ အကျိုးပြုတဲ့ ဝန်းကျင်ဖြစ်အောင် ဖန်တီးပါ
-
အာဟာရရှိတဲ့အစာစားဖို့ သင် ဆုံးဖြတ်ထားတယ်။ ဒါပေမဲ့ ရေခဲမုန့်ဘူးက သင့်ကို အကြီးအကျယ် ဆွဲဆောင်နေတယ်။
-
ဆေးလိပ်မသောက်ဖို့ သင် ဆုံးဖြတ်ထားတယ်။ ဒါပေမဲ့ သူငယ်ချင်းက သင်ဆေးလိပ်ဖြတ်ဖို့ ကြိုးစားနေမှန်းသိရက်နဲ့ စီးကရက် လှမ်းပေးတယ်။
-
ဒီနေ့ အားကစားလုပ်ဖို့ သင် စီစဉ်ထားတယ်။ ဒါပေမဲ့ အားကစားဖိနပ်ကို ဗီရိုထဲကနေ မနည်းရှာရမယ့်ပုံ ဖြစ်နေတယ်။
ဒီအခြေအနေတွေမှာ ဘယ်အချက်ကို သတိထားမိသလဲ။ အကျင့်ကောင်းတွေ မွေးမြူပြီး အကျင့်ဆိုးတွေဖြတ်ပစ်ရာမှာ ကိုယ့်ဝန်းကျင် (နေရာနဲ့ အပေါင်းအသင်း) က သက်ရောက်မှုရှိတယ်ဆိုတာ ဖော်ပြနေတယ်။
ကျမ်းစာအကြံပြုချက်– “သတိရှိသောသူသည် အမှုကိုမြော်မြင်၍ ပုန်းနေတတ်၏။ ဉာဏ်တိမ်သောသူမူကား အစဉ်အတိုင်းသွား၍ အမှုနှင့်တွေ့တတ်၏။”—သုတ္တံ ၂၂:၃။
ကြိုတင်စဉ်းစားထားဖို့ ကျမ်းစာက အကြံပြုတယ်။ အဲဒါက ပန်းတိုင်မရောက်အောင် တားဆီးတဲ့ အခြေအနေတွေကို သတိထား ရှောင်နိုင်ပြီး ပန်းတိုင်ရောက်အောင် ထောက်ကူတဲ့ အခြေအနေတွေကို လုပ်ဆောင်နိုင်ပါလိမ့်မယ်။ (၂ တိမောသေ ၂:၂၂) တိုတိုပြောရရင် အကျိုးပြုတဲ့ ဝန်းကျင်ဖြစ်အောင် ဖန်တီးနိုင်ပါတယ်။
မကောင်းတဲ့အရာကို လုပ်ရခက်အောင် ပြုလုပ်ထားပြီး ကောင်းတဲ့အရာကို လုပ်ရလွယ်အောင် ပြုလုပ်ထားပါ
လုပ်ဆောင်နိုင်ရာ
-
မကောင်းတဲ့အရာကို လုပ်ရခက်အောင် ပြုလုပ်ထားပါ။ ဥပမာ၊ အာဟာရမဖြစ်တဲ့ အစားအစာတွေ စားတဲ့အကျင့်ကို ဖြတ်ချင်တယ်ဆိုရင် အိမ်မှာ အဲဒီအစာတွေ မထားပါနဲ့။ စားချင်စိတ်ပေါ်လာတဲ့အခါ အိမ်ပြင်ထွက်ဝယ်ရမှာဖြစ်လို့ ပိုချုပ်တည်းတတ်လာပါလိမ့်မယ်။
-
ကောင်းတဲ့အရာကို လုပ်ရလွယ်အောင် ပြုလုပ်ထားပါ။ ဥပမာ၊ မနက်ပိုင်းမှာ လေ့ကျင့်ခန်းလုပ်ဖို့ စီစဉ်ထားတယ်ဆိုရင် ညကတည်းက အားကစားဝတ်စုံကို အသင့်ပြင်ထားပါ။ စလုပ်တဲ့အချိန်မှာ လွယ်ကူရင် နောက်ပိုင်းဆက်လုပ်ဖို့ အကျင့်ဖြစ်သွားပါလိမ့်မယ်။
-
အပေါင်းအသင်းကို ဂရုတစိုက် ရွေးပေါင်းပါ။ လူတွေက ကိုယ်ပေါင်းသင်းတဲ့သူတွေနဲ့ တူလာတတ်တယ်။ (၁ ကောရိန္သု ၁၅:၃၃) သင် ကြိုးစားဖြတ်နေတဲ့အကျင့်ကို လုပ်ဖို့အားပေးတဲ့သူတွေနဲ့ မပေါင်းဘဲ ကောင်းတဲ့အကျင့်တွေ လုပ်ဖို့အားပေးတဲ့သူတွေနဲ့ ပေါင်းသင်းပါ။