သင်နဲ့ သင့်အိမ်ထောင်ဖက်ဟာ ပြဿနာတစ်ခုကို ဆွေးနွေးတဲ့အခါ စပြောချိန်မှာထက် ပြီးသွားချိန်မှာ ပိုဆိုးသွားတယ်လို့ ခံစားရသလား။ အဲဒီလိုဖြစ်ရင်တောင် အခြေအနေကို တိုးတက်အောင် လုပ်နိုင်ပါတယ်။ အရင်ဆုံး အမျိုးသားတွေနဲ့ အမျိုးသမီးတွေရဲ့ မတူညီမှုလေးတွေကို သိထားသင့်တယ်။ *

အမျိုးသမီးတွေဟာ နားထောင်တာထက် စကားပြောချင်တာ ပိုများတယ်။ တစ်ခါတလေဆို စကားပြောလိုက်ရတာနဲ့ပဲ သူတို့ရဲ့ပြဿနာက ပြေလည်သွားပြီ။

“ခံစားချက်တွေကို ထုတ်ပြောလိုက်ပြီး ခင်ပွန်းက ကျွန်မကို နားလည်ပေးတယ်ဆိုတာ သိလိုက်ရတဲ့အခါ စိတ်ပေါ့သွားတယ်။ ဖွင့်ပြောပြီးပြီဆိုတာနဲ့ စိတ်ထဲမှာ ဘာမှမရှိတော့ဘူး။”—စန်းစန်း။  *

“ကိုယ့်ခံစားချက်ကို မပြောရမချင်း စိတ်ထဲမှာ ကလိကလိဖြစ်နေတာ။ ပြောလိုက်မှပဲ ပြေသွားတော့တယ်။”—အေးအေး။

“ထောက်လှမ်းရေးသမားလိုပဲ။ စကားပြောနေရင်းနဲ့ ဖြေရှင်းနည်းကိုလည်း ကျွန်မ ရှာနေလိုက်သေးတယ်။”—လောဒက်စ်။

အမျိုးသားတွေကတော့ ဖြေရှင်းနည်းတွေ ပေးချင်ကြတယ်။ အဲဒါက အမျိုးသားတစ်ယောက်ကို အားကိုးရတဲ့သူလို့ ခံစားရစေလို့ဖြစ်တယ်။ ဖြေရှင်းနည်းပေးလိုက်တာက သူ့ကို မှီခိုလို့ရမှန်း ဇနီးသည်ကို ဖော်ပြလိုက်တာပဲ။ သူတို့ရဲ့ ဖြေရှင်းနည်းတွေကို အလွယ်တကူ လက်မခံတဲ့အခါမှာတော့ ခင်ပွန်းသည်တွေ စိတ်ရှုပ်ကြတယ်။ “ဖြေရှင်းနည်းမလိုချင်ဘဲ ဘာလို့စကားပြောချင်မှန်း နားမလည်နိုင်ဘူး” လို့ ကျော်ကျော် ပြောတယ်။

စာအုပ်တစ်အုပ်မှာ ဒီလိုအကြံပြုထားတယ်– “အကြံမပေးခင် အရင်ဆုံး နားလည်သဘောပေါက်ဖို့ ကြိုးစားပါ။ ဖြေရှင်းနည်းမပေးခင်မှာ ကိုယ့်အိမ်ထောင်ဖက်ကို အပြည့်အဝနားလည်တယ်၊ စာနာထောက်ထားတယ်ဆိုတာ သိစေပါ။ တစ်ခါတလေမှာ သင့်ဇနီးဟာ သင့်ဆီက ဖြေရှင်းနည်းကို လိုချင်တာ မဟုတ်ဘူး။ ကောင်းကောင်းနားထောင်ပေးတာကိုပဲ လိုချင်တာ။”—The Seven Principles for Making Marriage Work.

ခင်ပွန်းသည်တွေအတွက်– သေချာနားထောင်ပြီး ဇနီးရဲ့ ခံစားချက်ကို နားလည်ပေးပါ။ “သူပြောတာကို နားထောင်ပေးပြီးတဲ့အခါ ‘ဘာမှလည်းမထူးပါဘူး’ လို့ စဉ်းစားမိပေမဲ့ ငါ့မိန်းမလိုအပ်တာက ဒီလိုနားထောင်ပေးတာပဲလေ” ဆိုပြီး သောမတ်စ် ပြောတယ်။ “မိန်းမပြောနေတဲ့အချိန်မှာ ဝင်မပြောဘဲ နားထောင်ပေးတာ အကောင်းဆုံးပဲဆိုတာ သိသွားပြီ” လို့ စတီဗင်လည်း ပြောတယ်။

ဒီနည်းကို စမ်းကြည့်ပါ– ဇနီးနဲ့ ပြဿနာအကြောင်း ဆွေးနွေးတဲ့အခါ ချက်ချင်း အကြံပေးတာမျိုး မလုပ်ပါနဲ့။ သူ့ကိုကြည့်ပြီး သူပြောတာကို သေချာနားထောင်ပေးပါ။ သဘောတူတဲ့အခါ ထောက်ခံပေးပါ။ သူပြောနေတဲ့အထဲက လိုရင်းအချက်ကို ပြန်ပြောပြပါ။ “ကျွန်တော့်ဇနီးက သူ့ကိုနားလည်ပေးပြီး သူ့ဘက်မှာ ကျွန်တော်ရှိတာကိုပဲ လိုချင်တာ” လို့ ချားလ်စ် ပြောတယ်။—ကျမ်းစာအကြံပြုချက်– ယာကုပ် ၁:၁၉။

ဇနီးသည်တွေအတွက်– ဖြစ်ချင်တာကို ခင်ပွန်းကို ပြောပြပါ။ “ကိုယ်ဖြစ်ချင်တာကို ခင်ပွန်းသည်သိရမယ်လို့ မျှော်လင့်တတ်ကြတယ်။ ဒါပေမဲ့ တစ်ခါတလေ ထုတ်ပြောဖို့လိုတယ်” လို့ အယ်လန်နာ ပြောတယ်။ “‘ကျွန်မပြောတာကို နားထောင်ပေးပါ။ ဖြေရှင်းပေးခိုင်းတာ မဟုတ်ဘူး။ ကျွန်မခံစားချက်ကို နားလည်ပေးစေချင်တာ’ ဆိုပြီး ခင်ပွန်းကို တောင်းဆိုပါ” လို့ အန်း အကြံပြုတယ်။

ဒီနည်းကို စမ်းကြည့်ပါ– ခင်ပွန်းဖြစ်သူက ဖြေရှင်းနည်းကို ချက်ချင်း ပြောလာတဲ့အခါ စာနာစိတ်မရှိဘူးလို့ မထင်လိုက်ပါနဲ့။ သင့်ကို သူ ကူညီပေးချင်တာပါ။ “ချက်ချင်းစိတ်ဆိုးမယ့်အစား ငါ့ခင်ပွန်းက ငါ့ကို ဂရုစိုက်တယ်၊ နားထောင်ပေးချင်တယ်၊ ကူလည်းကူညီပေးချင်နေတာလို့ ကျွန်မပြန်စဉ်းစားတယ်” ဆိုပြီး အက်စတာ ပြောတယ်။—ကျမ်းစာအကြံပြုချက်– ရောမ ၁၂:၁၀။

နှစ်ယောက်စလုံးအတွက်– အိမ်ထောင်သည်တွေဟာ ကိုယ့်ကို ပြုမူဆက်ဆံစေချင်တဲ့နည်းအတိုင်း အိမ်ထောင်ဖက်ကို ဆက်ဆံတတ်ကြတယ်။ ဒါပေမဲ့ ပြဿနာတွေကို ထိထိရောက်ရောက် ဆွေးနွေးနိုင်ဖို့ ကိုယ့်အိမ်ထောင်ဖက်က ဘယ်လိုပြုမူဆက်ဆံစေချင်တယ်ဆိုတာ သိဖို့ကြိုးစားရမယ်။ (၁ ကောရိန္သု ၁၀:၂၄) မီဂဲလ်လို့ခေါ်တဲ့ ခင်ပွန်းတစ်ယောက် ဒီလိုအကြံပြုတယ်– “သင်က ခင်ပွန်းဆိုရင် လိုလိုလားလား နားထောင်ပေးသူဖြစ်ပါ။ သင်က ဇနီးဆိုရင် ခင်ပွန်းသည် ပြောတဲ့ဖြေရှင်းနည်းတွေကို တစ်ခါတလေ လိုလိုလားလား နားထောင်ပေးပါ။ နှစ်ယောက်စလုံး အလျှော့ပေးမယ်ဆိုရင် အကျိုးဖြစ်ပါလိမ့်မယ်။”—ကျမ်းစာအကြံပြုချက်– ၁ ပေတရု ၃:၈။