Ndi cakuti Leza asi aali wino akalenga twacula, ale u mulandu ci uno kwayela inzala, vipowe ivisisila, inkondo, indwala alino na mazanzo akacitika sile kwaula kwenekela? Izwi Lyakwe Leza, kulikuti Baibo, yalanda pa vintu vitatu ivikalenga sana antunze yacula:

1. Ukaitemwe, lwiswa nu lupato. “antu yamwi a maka yakateeka auze mu unkalwe.” (Kasambilizya 8:9) Ilingi antu yakacula pa mulandu nu kutitikiziwa, ku yantu aya na ukaitemwe nu unkalwe.

2. Insita ni Vikacitika Kwaula Kwenekela. Antu yacula, a pa mulandu wakuti “[ivipe] vikaponela umuntu ali wensi.” (Kasambilizya 9:11) Kulikuti iciipe cingacitikila muntu nga ali pa ncende na pa kasita akasi ningo, icikalenga kucitika mazanzo, nanti limwi antu yangailekelezya nanti kuluvyanya vimwi.

3. Kateeka wa Nsi ii U Mwipe. Baibo yalanda ningo sana icikalenga antu yacula. Ikati: “Insi yonsi ili pisika lya utesi wa Mwipe wilya.” (1 Yoane 5:19) “Umwipe,” a Satana Ciwa, iciumbwa ca mupasi camaka, wino walipo umungeli wakwe Leza nomba atatwalilile uwa “cumi.” (Yoane 8:44) Angeli na yauze kwene yakonkelizye Satana iyapondokela Leza pakuti yalondela miyele yakwe ukaitemwe, nupya vikwene avino aeneco yaipanzile iviwa. (Utandiko 6:1-5) Kufuma pa nsita iya, Satana ni viwa vyakwe yavulunganya ivintu pano nsi ponsi. Sana sana mu manda yano tulimo. Nakupya ndakai Ciwa ali nu ukali cuze nupya “akasomba antu [yonsi] amu nsi,” icalenga ‘malanda ku amu nsi.” (Umbwilo 12:9, 12) Icumi kwene Satana a kateeka mwipe. Wene asisakamala ndi cakuti antu yakucula. Fwandi wino akalenga antu yacula a Satana, asi Leza foo.

TALE ELENGANYINI PALI VII: Wino atakwata uluse, umukwakwa ali wino angalenga sile antu akaele yacula. Baibo yene ikalanda vipusaneko ukuti: “Leza ukutemwa.” (1 Yoane 4:8) Acino kulingana ni miyele kwene ii yakutemwa “Leza asicita icintu iciipe, awe. Wamaka yonsi asifyenga umuntu foo.”—Yobo 34:10.

Fwandi lyene mungelenganya ukuti, ‘Uzye Leza Wamaka Yonsi alasisyapo wanda ci mitekele iipe yakwe Satana?’ Wakwe vino utusambilila, Leza wapata viipe nupya cikamuwaya kulola vino tukacula. Ali mulandu kwene uno na Baibo ikatunena iti: “Ikini masakamiko inu pali Leza, pano wene akamusakamala.” (1 Petulo 5:7) Leza watutemwa nupya wakwata amaka, aakufumyapo uyi wonsi nu lufyengo lonsi nupya vikwene avino cipande calondelelapo icilanda. *