Skip to content

Muye pa utantiko wa vilimo

Uzye Leza Wakwata Uluse?

Uzye Leza Wakwata Uluse?

VINO TUNGASAMBILILA KU VIUMBWA

Uluse lwalondololwa ukuti a maka yano twakwata akumanya vino muntu muze akuvwa na vino akupitamo nu kwelenganya vino cingaya ndi cakuti sweswe tuli ni ntazi zino akweti. Dokota Rick Hanson uwasambilila pa myelenganyizye ya antu watile: “Uluse tukavyalwa nalo.”

TALE ELENGANYINI: U mulandu ci uno twakwatila uluse, imiyele ino iviumbwa vyuze vitakwata? Baibo ikalondolola ukuti muntu waumbwa mucata cakwe Leza. (Utandiko 1:26) Twaumbwa mu cata cakwe Leza pakuti twalanga vino waya nupya aali cino tukalanga miyele yakwe isuma. Acino lino uluse lukuleenga antu kwazwa yauze, ala yakulanga vino Kaumba Leza wao waluse Yeova waya.—Mapinda 14:31.

VINO BAIBO IKATUSAMBILIZYA PALI VINO LEZA WAYA NU ULUSE

Leza waya nu luse nupya wapata kulola tukucula. Lino aina Izlaeli yaculanga, Baibo ikati: Leza “wayayelelanga ulanda, apakuvwa inkuuta yao.” (Masamu, 106:44) Lolini ukuti Leza atamanyile sile vino yaculanga. Lelo nawe kwene wawaikanga. “Manyile kunyunguluka kwao konsi”, avino walanzile. (Kufuma 3:7) “Ali wensi uwazanza mwemwe,” avino Leza walanda, “ala wazanza icintu ca mutengo ukulu cuze.” (Zakaliya 2:8) Lino yamwi yatuluvyanya Leza asyauvwa ningo.

Baibo ikatuneena ukuti nanti icakuti kampingu witu angatucuzya nupya tungayuvwa ukuti tutalinga ukuti Leza atulanga uluse, “Leza wene umukulu kuluta yakampingu itu. Wene wamanya vintu vyonsi.” (1 Yoane 3:19, 20) Leza watumanya ningo sana kuluta vino twaimanya sweisikulu. Wamanya ningo vino tukapitamo, vino tukaelenganya, na vino tukayuvwa. Nupya akatuvwila uluse.

Tungalenga Leza ukuti atuteekezye, atupeele mano nu kutwavwa, pano twamanya ukuti akaya piipi sana na yano yali ni ntazi

 Malembelo aakatukomelezya

  • “Lyene mulati ndi mwangama ndaasuka. Mulaapunda izina lyane nani ndaasuka inti, ‘Apano ndi.’”—EZAYA 58:9.

  • ‘Pano nimanya vino mpanzile ukucita pamulandu namwe, ivyalanda Yeova. Napanga ukumuletela ulongo asi uyi foo. Ukumuletela utailo ni syuko likalamba. Alino lyene mulampunda nu kumpapata, nga nani ndamuvwa.’—YELEMIYA 29:11, 12.

  • “Wemo wamanya vino nkacula, ukaiusya na minsozi yane. Uzye kwene vitatantikwa umu lupapulo lwako?”—MASAMU 56:8.

LEZA AKALOLA, KUMANYA NUPYA AKATUVWILA ULUSE

Uzye ukumanya ukuti Leza wakwata uluse kungatwavwa kuzizimizya intazi? Lekini tulande ivyacitikile ya Maria.

“Naweni ukuti vintu vyantalila lino nafwililwe umwanane umonsi uwa myaka 18 apa cisila ca kucula ku ulwale wakwe kansa pa myaka iili. Calenzile nsokele sana Yeova pali vino atapozizye umwanane.

Lino papisile imyaka 6, cuza wane wa mu cilongano uwali nu kutemwa nu uluse uvwile lino namulondolwelile vino nayuvwanga ukuti Yeova atantemilwe. Pacisila ca kukutika kuli vino namulondolwelile pa nsita itali, wawelenzile ilembelo ilyamfisile pa mwenzo lyakwe 1 Yoane 3:19, 20 ilikati: ‘Leza wene umukulu kuluta yakampingu itu’. Walondolwile ukuti Yeova akalola ndi tukucula.

Nanti cakuti walondolwile vii, citangupile kuleka kusokela Leza. Lyene nawelenzile pali Masamu 94:19 apakati: ‘Intazi nanti zingamvulila uli, wemo ukantekezya nu kunsansamusya.’ Nayuvwile kwati ivikomo vii yalembile nene! Lino papisile insita, natandike kuyuvwa ningo lino nkulanda na Yeova pa ntazi zino nakweti , pano namanyile ukuti akauvwa nupya akanguvwikisya.

Tukatekeziwa cuze ukumanya ukuti Leza akatuvwikisya nu kutuvwila uluse. Nomba u mulandu ci uno tukaculila? Uzye a pa mulandu wakuti Leza akatufulula pa viipe vino tukacita? Uzye Leza alacita uli pa kufumyapo ukucula? Mauzyo yaa yamalandwapo sana mu vipande ivilondeliilepo.