Aze 2:1-23
2 Dan setiem mwa, lor 21em zour sa mwa-la, Zeova ti servi profet Aze pou dir,
2 “Silteple demann gouverner Zida, Zorobabel, ki garson Sealtiel, ek gran pret Zozwe, ki garson Zeozadak, ek leres lepep:
3 ‘Kisann-la parmi zot ki ti trouv sa lakaz-la* kouma li ti ete avan dan so laglwar? Kouma zot trouv li aster-la? Eski li pa resanble nanye ditou konpare ar avan?’
4 “‘Me aster-la to bizin for Zorobabel,’ ala seki Zeova dir, ‘ek twa gran pret Zozwe, garson Zeozadak, to bizin for.’
“‘Ek zot, tou bann dimounn dan sa pei-la, zot bizin for ek travay,’ ala seki Zeova dir.
“‘Parski mo avek zot,’ ala seki Zeova Sef bann larme dir.
5 ‘Rapel seki mo ti promet kan zot ti sorti dan Lezip, ek zot kapav sir ki mo lespri sin ankor avek zot.* Pa gagn per.’”
6 “Parski ala seki Zeova Sef bann larme dir, ‘Ankor enn fwa—dan enn tigit letan—mo pou sakouy lesiel ek later ek lamer ek later ferm.’
7 “‘Ek mo pou sakouy tou bann pep, ek bann kitsoz presie* ki sorti dan tou pep pou rant dan lakaz-la; ek mo pou ranpli sa lakaz-la avek laglwar,’ ala seki Zeova Sef bann larme dir.
8 “‘Larzan pou mwa, ek lor pou mwa,’ ala seki Zeova Sef bann larme dir.
9 “‘Laglwar ki sa lakaz-la pou gagne dan lavenir pou pli gran ki seki li ti ena avan,’ ala seki Zeova Sef bann larme dir.
“‘Ek dan sa plas-la, mo pou donn zot lape,’ ala seki Zeova Sef bann larme dir.”
10 Lor 24em zour sa neviem mwa-la, dan deziem lane regn Daryis, Zeova ti koz ar profet Aze ek ti dir:
11 “Ala seki Zeova Sef bann larme dir, ‘Silteple, demann bann pret konsernan lalwa:
12 “Si enn zom sarye laviann ki sin dan so linz,* ek ki so linz tous ar dipin, lasoup, divin, delwil, ouswa ninport ki kalite manze, eski sa manze-la pou vinn sin?”’”
Bann pret ti reponn: “Non!”
13 Lerla Aze ti dir: “Si enn kikenn inn vinn inpir akoz li’nn gagn kontak ar enn kadav ek ki li tous enn parmi sa bann kitsoz-la, eski sa kitsoz-la pou vinn inpir?”
Bann pret ti reponn: “Li pou vinn inpir.”
14 Lerla Aze ti dir: “‘Se koumsa mem ki sa pep-la ete, ek se koumsa mem ki sa nasion-la ete devan mwa,’ ala seki Zeova dir, ‘ek se koumsa mem ki tou travay ki zot fer ar zot lame ete; tou seki zot ofer isi, li inpir.’
15 “‘Me aster-la, silvouple, reflesi bien lor* la apartir azordi: Avan ki rekonstriksion tanp Zeova ti koumanse,
16 kouma sa ti pe pase? Kan enn dimounn ti al kot enn pil lagrin ki ti sipoze fer 20 mezir, ti ena zis 10; ek kan enn dimounn ti al kot enn basin divin pou tir 50 mezir, ti ena zis 20;
17 mo’nn pini zot—tou travay zot lame—mo’nn avoy lor zot enn gro divan bien so, enn maladi, ek lagrel, me okenn parmi zot pa’nn retourn ver mwa,’ ala seki Zeova dir.
18 “‘Silvouple, reflesi bien lor* la apartir azordi, apartir 24em zour sa neviem mwa-la, apartir zour ki ti poz fondasion tanp Zeova; reflesi bien lor la:
19 Eski ankor ena lagrin dan stor?* Pie rezin, pie fig, pie grenad, ek pie zoliv—pankor gagn frwi, pa vre? Apartir azordi, mo pou beni zot.’”
20 Zeova ti koz ar Aze enn deziem fwa, lor 24em zour sa mwa-la, ek ti dir:
21 “Dir Zorobabel, gouverner Zida, ‘Mo pou sakouy lesiel ek later.
22 Mo pou devir tronn bann rwayom ek tir lafors bann pep; ek mo pou devir kales-la ek bann ki kondir li, ek bann seval ek zot bann kavalie pou tonbe, ek zot pou touy sakenn zot kamarad avek lepe.’”
23 “‘Sa zour-la, ala seki Zeova Sef bann larme dir, ‘Mo pou pran twa, mo serviter Zorobabel, garson Sealtiel,’ ala seki Zeova dir, ‘ek mo pou fer twa vinn kouma enn bag ki servi pou sele, parski to sa kikenn ki mo finn swazir la,’ ala seki Zeova Sef bann larme dir.”
