Aze 1:1-15

  • Repros parski pa’nn rekonstrir tanp (1-11)

    • ‘Eski se ler pou res dan bann lakaz dekore avek zoli dibwa?’ (4)

    • “Reflesi bien lor zot sitiasion” (5)

    • Sem boukou me pa rekolte boukou (6)

  • Lepep ekout lavwa Zeova (12-15)

1  Dan deziem lane regn Lerwa Daryis, dan siziem mwa, lor premie zour sa mwa-la, Zeova ti servi profet Aze* pou koz ar gouverner Zida, Zorobabel, ki ti garson Sealtiel, ek ar gran pret Zozwe, ki ti garson Zeozadak. Li ti dir: 2  “Ala seki Zeova, Sef bann larme dir, ‘Sa bann dimounn-la pe dir, “Pankor ariv ler pou aranz* lakaz* Zeova.”’” 3  Ek Zeova ti servi profet Aze ankor enn fwa pou dir: 4  “Eski se ler pou zot res dan zot bann lakaz ki dekore avek bann zoli dibwa, alor ki sa lakaz-la an rwinn? 5  Aster-la ala seki Zeova, Sef bann larme dir, ‘Reflesi bien lor* zot sitiasion. 6  Zot inn sem boukou lagrin, me zot pa rekolte boukou. Zot manze, me zot vant pa plin. Zot bwar, me zot res swaf. Zot met linz lor zot, me personn pa gagn so. Sa kikenn ki travay pou gagn lapey la met so kas dan enn sak ranpli ar trou.’” 7  “Ala seki Zeova, Sef bann larme dir, ‘Reflesi bien lor* zot sitiasion.’ 8  “Ala seki Zeova dir, ‘Al lor montagn ek al sers dibwa. Ek aranz lakaz-la pou ki sa kapav fer mwa kontan ek ki mo kapav gagn laglwar.’” 9  “Ala seki Zeova, Sef bann larme dir, ‘Zot ti pe atann boukou me zot inn gagn tigit; ek kan zot ti amenn li kot zot, mo ti soufle lor li pou li disparet. Kifer? Parski mo lakaz an rwinn, alor ki sakenn parmi zot pe galoup par tou kote pou okip so prop lakaz. 10  Alor lesiel ki lao zot, inn retenir so laroze, ek later pa’nn donn zot so rekolt. 11  Ek mo ti kontign amenn lasesres lor later, lor bann montagn, lor bann lagrin, lor nouvo divin, lor delwil, lor seki pouse lor later, lor bann dimounn ek bann troupo, ek lor tou travay ki zot lame fer.’” 12  Zorobabel ki ti garson Sealtiel ek gran pret Zozwe ki ti garson Zeozadak, ek tou leres lepep ti ekout lavwa Zeova zot Bondie ek bann parol profet Aze, parski Zeova zot Bondie ti avoy li; ek lepep ti koumans ena enn gran respe anver Zeova. 13  Lerla Aze, mesaze Zeova, ti donn lepep sa mesaz-la, an-akor avek mision ki Zeova ti donn li: “‘Mo avek zot mo pep,’ ala seki Zeova dir.” 14  Alor Zeova ti motiv* gouverner Zida, Zorobabel, ki ti garson Sealtiel, ek gran pret Zozwe, ki ti garson Zeozadak, ek tou leres lepep; ek zot ti vini ek zot ti koumans travay lor lakaz Zeova zot Bondie, Sef bann larme. 15  Sa ti arive lor 24em zour sa siziem mwa-la, dan deziem lane regn Lerwa Daryis.

Not

^ Vedir “Ne zour enn fet.”
^ Ouswa “rearanz.”
^ Ouswa “tanp.”
^ Lit., “Fixe zot leker lor.”
^ Lit., “Fixe zot leker lor.”
^ Lit., “inflians lespri.”

Copyrights pou sa piblikasion-la