Tkabʼin a los Corintios 9:1-15
9 Nya il tiʼj tuʼn t-xi ntzʼibʼine kyeye qa il tiʼj tuʼn kyonine kyiʼj okslal.
2 Porke ojtzqiʼn wuʼne qa kyajbʼile tuʼn kyonine. Tuʼntzunju, in jaw nnimsan wibʼe kyiʼje kywitz okslal te Macedonia ex in xi nqʼamaʼne kye qa o tzikʼ jun abʼqʼi tbʼantlen kyten erman te Acaya tuʼn kyonin. Tej tok kybʼiʼn qa kyajbʼile tuʼn kyonine, nim qe kyxol ax ikx kyajbʼil tuʼn kyonin.
3 Pero in chex nsamaʼne erman lu kyukʼile, tuʼntzun nya noqx gan in jaw qnimsan qibʼe kyiʼje ex tuʼn tbʼaj kybʼinchaʼn kytene ik tzeʼn otoq txi nqʼamaʼne.
4 Porke noqwit chin pone kyukʼil erman te Macedonia ex tzʼokwit kykeʼyin qa naʼmxtoq tbʼant kytene, jaku kubʼ qchʼixwiye, pero mas kyeye, tuʼnju in nok qeʼ qkʼuʼje kyiʼje.
5 Tuʼntzunju, bʼaʼn ela toj nwitze tuʼn t-xi nqʼamaʼne kye erman tuʼn kyxiʼ con tiempo kyukʼile ex tuʼn tbʼaj kychmoʼn oyaj tzaj kyqʼamaʼne tuʼn ttzaj kyqʼoʼne. Iktzun tten list taʼ aj qpone kyukʼile ex kqʼanchaʼlix qa ma tzaj kyqʼoʼne ik tzeʼn jun oyaj ex nya a la fuerza.
6 Miʼn tzikʼ tnaʼl kyuʼne, alkye noq chʼin in kux tawaʼn, noq chʼin kjawil tchmoʼn, ex alkye nim in kux tawaʼn, nim kjawil tchmoʼn.
7 Teyele junjun bʼincham aju ma kubʼ t-ximen toj tanmi, nya de mala gana ni a la fuerza, porke aju xjal in xi tqʼoʼn tukʼil tzalajbʼil, kʼujlaʼn tuʼn Dios.
8 Porke jaku kubʼ tyekʼin Dios nimxix t-xtalbʼil kyiʼje, tuʼntzun kukx tkanun aju at tajbʼen kyeye ex tuʼn tten nimku kyeye tuʼn tbʼant alkyexku tbʼanel aqʼuntl kyuʼne.
9 (Ik tzeʼn tzʼibʼin toj tyol Dios: «Nimxix oyaj o txi tsipen ex o txi tqʼoʼn kye prow. Aju tbʼinchbʼen tzʼaqli, kukx ktel te jumajx».
10 Porke aju in tzaj qʼonte nim ijaj teju xjal in nawan ex in tzaj qʼonte pan kye xjal tuʼn kywan, tzul tqʼoʼn mas nimxix ijaj kyeye tuʼn kyawane ex kʼonil kyiʼje tuʼn tchmet mas nimxix twitz kybʼinchbʼene tzʼaqli).
11 Jaʼlo in che tzaj kʼiwlaʼne tuʼn Dios toj tkyaqil tuʼntzun tbʼant kyqʼonteye nimku oyaj. Ex aju oyaj kjawil qchmoʼne kyxole, kxel kyqʼoʼn erman chjonte te Dios tiʼj.
12 Porke aj t-xi qiʼne oyaj lu, nya oʼkx kʼonil kyiʼj okslal* tuʼn tten aju at tajbʼen kye, sino ax ikx kʼonil kyiʼj mas erman tuʼn t-xi kyqʼoʼn chjonte te Dios.
13 Ikju, kxel kyqʼoʼn chjonte te Dios tuʼnju kʼelel kynikʼ tiʼj tukʼil oyaj kxel kyqʼoʼne qa in kubʼ kyanqʼine aju in che yoline tiʼj, aju tbʼanel noticia tiʼj Cristo. Ax ikx tuʼnju bʼaʼn che oyine kye ex kye kykyaqil.
14 Ex aj kykubʼsan twitz Dios kyiʼje, kxel kyqʼamaʼn jniʼ kʼujlaʼn qeye kyuʼn tuʼnju o kubʼ tyekʼin Dios nimxix t-xtalbʼil kyiʼje.
15 Chjonte te Dios tuʼn tbʼanelxix oyaj ma tzaj kyqʼoʼne qeye.
Tqanil
^ Toj griego «qeju xjan qe».
