Tkabʼin a los Corintios 6:1-18
6 Tuʼnju in qo aqʼunane junx tukʼil Dios, ax ikx in qo kubʼsane kywitze tuʼn miʼn tikʼ tnaʼl kyuʼne tiquʼn in kubʼ tyekʼin Dios t-xtalbʼil kyiʼje.
2 Porke in tqʼamaʼn Dios jlu: «Toj ambʼil mas tbʼanel, xi nbʼiʼne tyola. Toj tqʼijlalil kolbʼil, tzaj nqʼoʼne onbʼil teya». ¡Jaʼlo, ma tzul kanin ambʼil mas tbʼanel! ¡Jaʼlo, ma tzul kanin tqʼijlalil kolbʼil!
3 Mintiʼ jun tolsabʼil in kubʼ qqʼoʼne kywitz txqantl, tuʼntzun miʼn tyolin nijun xjal nya bʼaʼn tiʼj qaqʼunbʼene.
4 Ex in kubʼ qyekʼine toj tkyaqilju in bʼant quʼne qa in qo aqʼunane junx tukʼil Dios. In nikʼx nim quʼne: at maj in qo ok weʼye kywitz prueba, at maj twitz sufrimiento, at maj toj necesidad, at maj toj ambʼil kwest,
5 at maj in qo bʼaj golpearine, at maj in qo okx qʼoʼne pres, at maj in che jaw tilj xjal qiʼje, at maj in qo aqʼunane kyuw, at maj mintiʼ in qo jtane, ex at maj mintiʼ in qo waʼne.
6 Ax ikx, in kubʼ qyekʼine qa in qo aqʼunane junx tukʼil Dios aj qanqʼine bʼaʼn twitz, aj tkubʼ qbʼinchaʼne aju ojtzqiʼn quʼne, aj tkubʼ qyekʼine qpasense ex tbʼanel qmode, aj t-xi qqʼoʼne ambʼil te espíritu santo tuʼn tkubʼ nej qwitze, aj tkubʼ qyekʼine axix tok qkʼujlabʼile,
7 aj t-xi qqʼamaʼne axix tok, aj tok qeʼ qkʼuʼje tiʼj tipumal Dios, aj tkubʼ qbʼinchaʼne aju tzʼaqli ik tzeʼn jun soldad qʼiʼn jun espada tuʼn toj tqʼabʼ derecha ex jun escudo toj tqʼabʼ izquierda,
8 aj tok qʼoʼn qoklene ex aj tel qʼiʼn, aj kyyolin xjal bʼaʼn qiʼje ex aj kyyolin nya bʼaʼn qiʼje. In kubʼ kyximen xjal qa sbʼul qoʼye maske axix tok aju in qqʼamaʼne,
9 qa nya ojtzqiʼn qwitze maske ojtzqiʼn qwitze, qa chʼinx qkyime maske kukx itzʼ qoʼye, qa ya o kubʼ qʼoʼn qkastiwe* maske naʼmx qkyime,
10 qa in qo bʼisune maske kukx in qo tzalaje, qa prow qoʼye maske in che ok nim xjal te qʼinun quʼne, qa mintiʼ jun tiʼ at qeye maske tkyaqil at qeye.
11 Aqeye erman te Corinto, klar in qo yoline kyukʼile ex axix tok kʼujlaʼn qeye quʼne.
12 Mintiʼ o kubʼ qxkʼayine qkʼujlabʼile kyiʼje, atzun kyeye o kubʼ kyxkʼayine kykʼujlabʼile qiʼje.
13 Tuʼntzunju, in chin kubʼsane kywitze, ik tzeʼn in kubʼsan jun mambʼaj kywitz tkʼwal, tuʼn tkubʼ kyyekʼine kykʼujlabʼile qiʼje ik tzeʼn qeye in kubʼ qyekʼine qkʼujlabʼile kyiʼje ex tuʼn tchʼiy kykʼujlabʼile.
14 Miʼn tzʼok kymojbʼan kyibʼe* kyukʼil qeju nya okslal. Porke, ¿tiʼ toklen aju tzʼaqlixix tukʼilju nya bʼaʼn?* Moqa, ¿tiʼ toklen spikʼun tukʼilju qlolj?
15 Ax ikx, ¿tiʼ toklen Cristo at tukʼil Tajaw il?* Moqa, ¿tiʼ toklen jun okslal* at tukʼil jun nya okslal?
16 Moqa, ¿tiʼ toklen tja Dios at kyukʼil imagen? Porke aqoʼ tja Dios, aju Dios itzʼ, ik tzeʼn tqʼama Dios: «Ok chin najale kyxol ex ok chin bʼetele kyxol, ex chin okele te Kydios, atzun kye che okel te ntname».
17 «‹Tuʼntzunju, kyetze kyxol ex kypaʼmil kyibʼe kyiʼj, ex kytzoqpinkje tuʼn tok kymakoʼne aju tzʼil›, chi Jehová»,* «‹ex che xel nrecibirine›».
18 «‹Ex chin okele te kymane, atzun kyeye che okele te nkʼwale ex te nmeʼjele›,* chi Jehová,* aju Dios at Nimxix Tipumal».
Tqanil
^ Moqa «o qo kubʼ kawine».
^ Toj griego «Miʼn tzʼokx kyqʼon kyibʼe tjaqʼ jun yuw nya parej».
^ Toj griego «tuʼn qikʼ tibʼaj ley», toj juntl yol, tuʼn tel qikʼun qe tley Dios.
^ Toj griego «Belial», aju juntl tbʼi Tajaw il at. Atz tzajni yol lu tiʼj jun yol hebreo aju a tzʼelpuna ‹mintiʼ tajbʼen›.
^ Moqa «jun xjal tzʼaqli».
^ Qʼonka twitza tiʼj xnaqʼtzbʼil A5.
^ Toj junjuntl lugar «nmyale».
^ Qʼonka twitza tiʼj xnaqʼtzbʼil A5.
