Tkabʼin a los Corintios 7:1-16
7 Tuʼntzunju, aqeye erman kʼujlaʼn wuʼne, tuʼnju o tzaj ttziyen Dios jlu qe, qlimpiarim qibʼ tiʼj tkyaqilju in bʼaj tzʼilsante qxmilal* ex qanmi, tuʼntzun tbʼaj qxjansan mas qibʼ tuʼn qxobʼil twitz Dios.
2 Kybʼinchame xtalbʼil, qo kyrecibirime. Ni jun xjal o tzʼok qbʼinchaʼne nya bʼaʼn tiʼj, ni jun xjal o tzʼel txalpaj quʼne ex ni jun xjal o kubʼ qsbʼuʼne.
3 Mintiʼ ma txi nqʼamaʼne jlu kyeye tuʼn wok tene ilil kyiʼje, porke ik tzeʼn xi nqʼamaʼne kyeye tnejel kʼujlaʼnxix qeye quʼne, qa tuʼn qkyim junx moqa tuʼn qanqʼin junx.
4 Mintiʼ in chin xobʼe tuʼn nyoline klar kyukʼile, ex nim in chin tzalaje kyiʼje. Porke nimxix o qeʼ nkʼuʼje kyuʼne, ex nimxix in chin tzalaje toj tkyaqil nya bʼaʼn in qo ok weʼye twitz.
5 Porke tej qpone Macedonia, mintiʼ o ojlane chʼin,* porke kukx o ok weʼye twitz nya bʼaʼn, e qʼojin xjal qiʼje ex kubʼ qnaʼne bʼis toj qanmiye.
6 Pero qeʼ qkʼuʼje tuʼn Dios, aju Dios in qʼuqbʼante kykʼuʼj qeju in che bʼisun, tej tul Tito qukʼile.
7 Pero nya oʼkx qeʼ qkʼuʼje tuʼnju ul Tito qukʼile, sino ax ikx tuʼnju otoq qeʼ tkʼuʼj Tito kyuʼne. Tzaj tqʼamaʼn Tito qeye qa kyajbʼilxixe tuʼn tok kykeʼyine qine, qa kubʼ kynaʼne nimxix bʼis toj kyanmiye ex qa tzaj bʼajxix kykʼuʼje wiʼje, ex tuʼn jlu kubʼ nnaʼne mas tzalajbʼil.
8 Tuʼntzunju, qa tzaj kybʼise tuʼn carta xi ntzʼibʼine kyeye, mintiʼ weye nbʼis tzaj tuʼn. Bueno, tzaj chʼin nbʼise tuʼn tnejel tej tok nkeʼyine qa tzaj kybʼise tuʼn. Pero ojtzqiʼn wuʼne qa noq chʼin ambʼil tzaj kybʼise.
9 Pero jaʼlo in chin tzalaje, nya tuʼnju tzaj kybʼise wuʼne, sino tuʼnju ma tzʼonin bʼis kyiʼje tuʼn tajtz tiʼj kyanmiye. Porke tzaj kybʼise ik tzeʼn tajbʼil Dios, tuʼntzunju mintiʼ jun nya bʼaʼn ma tzaj kyiʼje noq tuʼn qpaje.
10 Porke aju qbʼis in tzaj ik tzeʼn tajbʼil Dios, in najtz tiʼj qanmi tuʼn ex in nonin qiʼj tuʼn qklet, ex mi aʼl jun kbʼel tnaʼn nya bʼaʼn tuʼn. Pero aju bʼis in kubʼ kynaʼn xjal, in tzaj kamik tuʼn.
11 ¡Che ximane tiʼj jaʼlo tzeʼn o tzʼonin kyiʼje tej ttzaj kybʼise ik tzeʼn tajbʼil Dios! O tzʼonin kyiʼje tuʼn tkyaj kybʼiye saq juntl maj, tuʼn ttzaj kyqʼoje tiʼjju o bʼaj kyxole, tuʼn kyxobʼe twitz Dios, tuʼn tkubʼ kyximane tuʼn tajtz tiʼj kyanmiye, tuʼn kyajbʼene te Dios tuʼn tkyaqil kykʼuʼje ex tuʼn t-xi kybʼinchaʼne tiʼj nya bʼaʼn. Toj tumel tkyaqilju bʼant kyuʼne tuʼn t-xi bʼinchet tiʼj nya bʼaʼn lu.
12 Tej t-xi ntzʼibʼine kyeye, mintiʼ xi ntzʼibʼine kyeye tuʼn tpaj ju xjal bʼinchan nya bʼaʼn ex mintiʼ xi ntzʼibʼine kyeye tuʼn tpaj ju xjal ok bʼinchaʼn nya bʼaʼn tiʼj. Sino xi ntzʼibʼine kyeye tuʼn tqʼanchaʼlix kyxole ex twitz Dios qa ok tilil kyuʼne tuʼn t-xi kynimane qyole.
13 Atzun jlu o qeʼ qkʼuʼje tuʼn.
Pero mas in qo tzalaje tuʼnju in tzalaj Tito, porke o qʼuqbʼanjtz tkʼuʼj kyuʼne kykyaqile.
14 Porke qa o jaw nnimsan wibʼe kyiʼje twitz Tito, mintiʼ ma kubʼ nchʼixwiye kyuʼne. Porke ik tzeʼn axix tok tkyaqilju o txi qqʼamaʼne kyeye, ax ikx axix tok tkyaqilju jaw qnimsan qibʼe tiʼj twitz Tito.
15 Ax ikx, mas in chʼiy tkʼujlabʼil Tito kyiʼje aj ttzaj tnaʼn tzeʼn e nimane kykyaqile ex tzeʼn ok kyqʼoʼne toklen tej tpon kyukʼile.
16 In chin tzalaje, porke toj tkyaqil jaku tzʼok qeʼ nkʼuʼje kyiʼje.*
