Tkabʼin a los Corintios 10:1-18
10 Jaʼlo, aqine Pablo, ok chin kubʼsale kywitze tukʼil tbʼanel nmode ex mans qine ik tzeʼn te Cristo, maske ateʼ junjun kyxole in kubʼ kyximen qa nya kyuw qine aj ntene kyukʼile, pero kyuw qine aj t-xi ntzʼibʼine kyeye.
2 Ikju, ok chin kubʼsale kywitze qa aj npone kyukʼile, otoqwit chʼexpaj kyximbʼetz qeju in kubʼ kyximen qa in qo ok lepeʼye kyiʼj xjal tuʼntzun miʼn woke kyuw kyukʼil.
3 Porke, maske ik qoʼye ik tzeʼn kye txqantl xjal, mintiʼ in qo qʼojine ik tzeʼn kye xjal.
4 Porke aqeju tiʼ in che ajbʼen toj qʼoj quʼne, nya aqeju in che ajbʼen kyuʼn xjal, sino aqeju in tzaj tqʼoʼn Dios, aqeju at kyipumal tuʼn tkubʼ kyxiten alkyexku tiʼ kyuw.
5 Porke in kubʼ tiʼj alkyexku nya ax tok ximbʼetz quʼne ex alkyexku tiʼ in nel tiʼn ambʼil kye xjal tuʼn tel kynikʼ tiʼj Dios. In kubʼ tiʼj alkyexku kynabʼil xjal quʼne tuʼn tok ik tzeʼn jun pres tuʼn tnimen te Cristo.
6 Ex ma bʼant qtene tuʼn tkubʼ qqʼoʼne tkastiw alkyexku xjal mintiʼ in nimen, otoqxi kubʼ kyyekʼine qa in che nimane tuʼn tkyaqil kykʼuʼje.
7 Porke kyeye, oʼkx in nok kyqʼoʼne kywitze tiʼjju in nok kykeʼyine. Tuʼntzunju, qa at jun qʼuqli tkʼuʼj tiʼj qa te Cristo te, tzʼelx tnikʼ tiʼj jlu juntl maj: ik tzeʼn te Cristo te, ax ikx qeye te Cristo qoʼye.
8 Porke o tzaj qʼoʼn qoklene tuʼn Qajaw tuʼn qonine kyiʼje tuʼn kychiʼye toj kyokslabʼile ex nya tuʼn ttzaj kybʼise. Ex mlay tzaj nchʼixwiye noqwit jaw nnimsan chʼin wibʼe tiʼj qoklene lu.
9 Pero nya waje tuʼn tkubʼ kyximane qa in chin ok tene xobʼtzal kyeye kyukʼil carta in xi ntzʼibʼine kyeye.
10 Porke ateʼ junjun kyxole in kyqʼamaʼn: «Nim kyoklen qe carta in che kubʼ ttzʼibʼin ex kyuw qeʼ, pero mintiʼ in qo jaw labʼin tiʼj aj tul ex mintiʼ kyajbʼen qe tyol».
11 Alkyeqe in che qʼamante jlu, tzʼelx kynikʼ tiʼj qa aju in xi qqʼamaʼne kyeye kyoj carta, axju kxel qbʼinchaʼne aj qpone kyukʼile.
12 Porke mintiʼ in qnimarin qibʼe tuʼn t-xi qqʼamaʼne qa ik qoʼye ik tzeʼn qeju in jaw kynimsan kyibʼ ex tuʼn tok qcompararin qibʼe kyukʼil. Porke in kubʼ kyyekʼin xjal lu qa mintiʼ kynabʼil aj tok kymojbʼaʼn kybʼinchbʼen kyukʼilx ex tukʼilju in kyqʼamaʼn qa bʼaʼn.
13 Atzun qeye, oʼkx kjawil qnimsan qibʼe tiʼjju o tzaj tqʼoʼn Dios qoklene tiʼj, jatumel ax ikx ateʼye, ex nya tiʼjju mintiʼ o tzaj qʼoʼn qoklene tiʼj.
14 Porke tej qpone kyukʼile, mintiʼ bʼant jun tiʼ quʼne aju mintiʼ tzaj tqʼoʼn Dios qoklene tiʼj. Pero aqoʼye xi qʼamante tbʼanel noticia tiʼj Cristo kyeye tnejel.
15 Ikju, mintiʼ in jaw qnimsan qibʼe tiʼjju mintiʼ o tzaj tqʼoʼn Dios qoklene tiʼj, toj juntl yol, tiʼj kyaqʼun txqantl. Ex ik tzeʼn qʼuqli qkʼuʼje tiʼj qa kchʼiyel kyokslabʼile, ax ikx qʼuqli qkʼuʼje tiʼj qa kchʼiyel qaqʼunbʼene kyxole. Iktzun tten kbʼantel mas quʼne.
16 Ex toj qwitze, mas bʼaʼn tuʼn qxiʼye qʼamalte tbʼanel noticia kyoj junjuntl lugar najchaq ateʼ kyiʼje, tuʼntzun miʼn tjaw qnimsan qibʼe tiʼj kyaqʼunbʼen txqantl.
17 «Pero alkye in jaw tnimsan tibʼ, nimsanktz Jehová».*
18 Porke oʼkx in tzalaj Jehová* tiʼj xjal in jaw tnimsaʼn ex nya tiʼj xjal in jaw tnimsan tibʼ.
