Tkabʼin a los Corintios 2:1-17
-
Tajtoq Pablo tuʼn kytzalaj erman te Corinto (1-4)
-
Iltoq tiʼj tuʼn tkubʼ kynajsaʼn erman til xinaq ex tuʼn t-xi kyqʼoʼn ambʼil te tuʼn tten juntl maj kyukʼil (5-11)
-
Tej attoq Pablo Troas ex Macedonia (12, 13)
-
Ik tten qajbʼebʼil te Dios ik tzeʼn qe soldad in che tzalaj aj kymeltzʼaj toj qʼoj (14-17)
-
«Mintiʼ in qo kʼayine tiʼj tyol Dios» (17)
-
2 Porke ma kubʼ nximane tuʼn miʼn npone juntl maj toj bʼis kyukʼile.
2 Porke qa ma tzaj kybʼise wuʼne, ¿alkyetzun kʼonil wiʼje tuʼn ntzalaje? ¿Nyapetzun oʼkx qeju otoq tzaj kybʼis wuʼne?
3 Tuʼntzunju xi ntzʼibʼine kyeye, tuʼntzun miʼn ttzaj nbʼise kyiʼje aj npone kyukʼile, oʼkx tuʼn ntzalaje. Porke qʼuqli nkʼuʼje tiʼj qa aju in tzaj qʼonte tzalajbʼil weye, axju in qʼonte tzalajbʼil kyeye kykyaqile.
4 Xi ntzʼibʼine kyeye tukʼil taʼl nwitze, tuʼnju kubʼ nnaʼne bʼis ex kʼixkʼoj toj wanmiye. Pero mintiʼ bʼant jlu wuʼne tuʼn ttzaj kybʼise, sino tuʼn tok kybʼiʼne qa kʼujlaʼnxix qeye wuʼne.
5 Jaʼlo, qa at jun o tzaj bʼis tuʼn, nya aqine o tzaj nbʼise tuʼn, sino aqeye kykyaqile o tzaj chʼin kybʼise tuʼn. Kynajsame qa klar in chin yoline.
6 Pero cabalx tkastiw xinaq* lu ma kubʼ kyqʼoʼne chʼixme kykyaqile.
7 Jaʼlo, il tiʼj tuʼn tkubʼ kynajsaʼne til tuʼn tkyaqil kykʼuʼje ex tuʼn t-xi kyqʼuqbʼaʼne tkʼuʼj tuʼntzun miʼn tkyaj ten kukx toj bʼis.
8 Tuʼntzunju, chin kubʼsale kywitze tuʼn t-xi kyyekʼine te xinaq lu qa kʼujlaʼn kyuʼne.
9 Porke ax ikx xi ntzʼibʼine kyeye tuʼn tel nnikʼe tiʼj qa bʼaʼn che bʼine toj tkyaqil.
10 Qa ma kubʼ kynajsaʼne til jun xjal, ax ikx weye kbʼel nnajsaʼne til. Ik tzeʼn weye, qa o kubʼ nnajsaʼne til jun xjal, o bʼant wuʼne tuʼn tonin kyiʼje ex o bʼant wuʼne twitz Cristo.
11 Nim toklen tuʼn tbʼant jlu quʼn tuʼntzun miʼn tkubʼ qiʼj* tuʼn Satanás, porke ojtzqiʼn quʼn alkyeqe tmañ.*
12 Jaʼlo, tej npone Troas qʼamalte tbʼanel noticia* tiʼj Cristo ex tej ttzaj qʼoʼn jun oportunidad weye tuʼn tbʼant mas wuʼne toj taqʼun Qajaw,
13 tzaj bʼaj nkʼuʼje tuʼnju mintiʼ kanet Tito wuʼne aju wermane. Tuʼntzunju xi nqʼamaʼne kye okslal in che anqʼin atz qa ma kubʼ bʼe wuʼne ex in xiʼye Macedonia.
14 Pero in xi qqʼoʼn chjonte te Dios tuʼnju kukx nejli qwitz junx tukʼil Cristo. Porke ik qoʼ ik tzeʼn qe soldad in che tzalaj aj kymeltzʼaj toj qʼoj tuʼnju otoq che kambʼan. Ax ikx noq tuʼn qaqʼunbʼen, in nok kybʼiʼn xjal tqanil tiʼj Dios noq jaxku tumel ik tzeʼn jun perfume in xi tsipen tibʼ tkʼokʼjal toj kyqʼiqʼ.
15 Porke toj twitz Dios, aqoʼ in qo predicarin tqanil tiʼj Cristo, ik qoʼ ik tzeʼn jun tiʼ chiʼ tkʼokʼjal, aju in xi tsipen tibʼ kyxol qeju in che klet ex kyxol qeju in che naj.*
16 Kye qeju in cheʼx toj najen, t-xew kamik in nok te kye, atzun kye qeju in che klet, jun tkʼokʼjal in tqʼoʼn chwinqlal. ¿Alkyetzun ma bʼant tten tuʼn tbʼant aqʼuntl lu tuʼn?
17 Aqoʼye, porke mintiʼ in qo kʼayine tiʼj* tyol Dios ik tzeʼn in bʼant kyuʼn nimku xjal. Sino samaʼn qoʼye tuʼn Dios ex axix tok aju in qqʼamaʼne twitz Dios junx tukʼil Cristo.
