Tkabʼin a los Corintios 3:1-18
3 ¿Ilpe tiʼj tuʼn t-xi qqʼamaʼne juntl maj kyeye alkye qoʼye? ¿Ex ilpe tiʼj tuʼn tkubʼ kytzʼibʼine jun carta de recomendación qiʼje moqa tuʼn t-xi qqʼoʼne jun carta de recomendación kyeye ik tzeʼn in bʼant kyuʼn txqantl xjal? Nya il tiʼj.
2 Porke ik qeye ik tzeʼn carta lu, aju tzʼibʼin toj qanmiye ex ojtzqiʼn kyuʼn kykyaqil xjal ex in jaw kyleerin.
3 Porke qʼanchaʼlxix taʼ, ik qeye ik tzeʼn jun carta in tzaj tukʼil Cristo aju kubʼ qtzʼibʼine tukʼil qaqʼunbʼene. Nya tzʼibʼin tukʼil tint, sino tzʼibʼin tukʼil tipumal Dios itzʼ. Ax ikx, nya tzʼibʼin twitz abʼj, sino tzʼibʼin tiʼj chibʼj, toj kyanmiye.
4 Ex noq tuʼn Cristo, jaku txi qqʼamaʼne jlu tuʼn tkyaqil qkʼuʼje twitz Dios.
5 Nya qajbʼile tuʼn t-xi qqʼamaʼne qa ma bʼant qtene tuʼn tbʼant aqʼuntl lu quʼne quʼnx qibʼe, sino ma bʼant qtene tuʼn tonbʼil Dios.
6 Ex noq tuʼn Dios, ma bʼant qtene tuʼn qajbʼene te jun akʼaj trat. Nya tuʼn qajbʼene teju Ley tzʼibʼin, sino tuʼn qajbʼene teju espíritu santo.* Porke aju Ley tzʼibʼin in kubʼ tqʼoʼn tsentens jun xjal tuʼn tkyim, atzunju espíritu santo in tqʼoʼn chwinqlal.
7 Atzun jaʼlo, aju Ley in kubʼ tqʼoʼn tsentens jun xjal tuʼn tkyim, kubʼ tzʼibʼin twitz abʼj. Ex tzaj tqʼoʼn Dios kye xjal te Israel tukʼil nimxix tspikʼumal. Ex tuʼnju attoq nimxix tspikʼumal, ya mintiʼ bʼant tuʼn tok kykeʼyin xjal te Israel twitz Moisés. Pero iltoq tiʼj tuʼn tkubʼaj tspikʼumal.
8 Qa ik tten tzaj tqʼoʼn Dios Ley kye xjal te Israel, ¿nyapetzulo mas tbʼanelxix tzeʼn tten tzaj tqʼoʼn espíritu santo?
9 Porke qa tbʼanelxix Ley aju in kubʼ tqʼoʼn tsentens jun xjal tuʼn tkyim, ¿nyapetzun mas tbʼanelxix tzeʼn tten in che ok qʼoʼn xjal te tzʼaqli?
10 Porke aju Ley, maske tbʼanelxix nej, jaʼlo nya tbʼanelxix tuʼnju ma tzaj qʼoʼn juntl yol mas tbʼanelxix twitz.
11 Porke qa tbʼanelxix tzaj qʼoʼn aju iltoq tiʼj tuʼn tnaj, ¿nyapetzulo mas tbʼanelxix aju ktel te jumajx?
12 Tuʼnju at qʼuqbʼil qkʼuʼj lu, mintiʼ in qo xobʼ aj qyolin.
13 Ex nya axju in bʼant quʼn ik tzeʼn te Moisés tej tok tqʼoʼn jun xbʼalun tiʼj twitz tuʼntzun miʼn tok kykeʼyin xjal te Israel tspikʼumal Ley, aju iltoq tiʼj tuʼn tnaj.
14 Pero mintiʼ el kynikʼ xjal te Israel tiʼj. Ex kukx kyten jaʼlo, mintiʼ in nel kynikʼ tiʼj ojtxe trat aj tjaw leerin, ik tzeʼn tok axju xbʼalun tiʼj kywitz. Porke oʼkx jaku tzʼel xbʼalun lu noq tuʼn Cristo.
15 Axpe ikx toj ambʼil jaʼlo, tkyaqil maj aj tjaw leerin aju kubʼ ttzʼibʼin Moisés, mintiʼ in nel kynikʼ tiʼj, ik tzeʼn tok jun xbʼalun tiʼj kyanmi.
16 Pero aj tmeltzʼaj jun xjal tukʼil Jehová,* in nel xbʼalun lu.
17 Porke jun espíritu te Jehová,* ex jatumel taʼ t-espíritu santo Jehová,* at tzaqpibʼil.
18 Tuʼntzunju, qkyaqilx, aqoʼ o tzʼel qiʼn xbʼalun tiʼj qwitz, in qo ok ik tzeʼn jun espej in tyekʼin tspikʼumal Jehová.* In qo chʼexpaj tuʼn qok ik tzeʼn tilbʼilal Dios ex tuʼn tkubʼ qyekʼin mas aju tspikʼumal Dios. Ik tzeʼn tajbʼil Jehová,* aju jun espíritu.*
