Tkabʼin a los Corintios 8:1-24
8 Aqeye erman, jaʼlo qajbʼile tuʼn tok kybʼiʼne tiʼ o bʼant tuʼn t-xtalbʼil Dios kyxol okslal kyoj congregación te Macedonia.
2 Maske nimxix e sufririn tej kyok weʼ twitz jun prueba kyuw, xi kyqʼoʼn chʼin tiʼjju at kye tukʼil nimxix tzalajbʼil maske prowxix qeʼ. Tuʼn jlu, kubʼ kyyekʼin qa bʼaʼn che oyin.
3 Porke jaku txi nqʼamaʼne kyeye qa xi kyqʼoʼn tkyaqilju jakutoq bʼant kyuʼn, axpe ikx mas twitzju jakutoq bʼant kyuʼn.
4 Porke e kubʼsan qwitze jun ex juntl maj tuʼn t-xi qqʼoʼne oklenj kye tuʼn ttzaj kyqʼoʼn jun oyaj tukʼil tkyaqil kykʼuʼj ex tuʼn kyparticiparin tuʼn t-xi qʼet onbʼil kye okslal.*
5 Ex bʼant mas kyuʼn twitzju ximen quʼne, porke xi kyqʼon kyibʼ tnejel te Qajaw, ex e onin qiʼje ik tzeʼn tajbʼil Dios.
6 Tuʼntzunju, xi qqʼamaʼne te Tito tuʼn tkyaj bʼant aqʼuntl xi tzyet tuʼn kyxole, tuʼn tjaw tchmoʼn oyaj tzul kyqʼoʼne tuʼn tkyaqil kykʼuʼje.
7 Porke ik tzeʼn o kubʼ kyyekʼine qa at nim kyeye toj tkyaqil, qa at nim kyokslabʼile, qa bʼaʼn che yoline, qa at nim kyojtzqibʼile, qa tok kykʼuʼje tiʼjju in bʼant kyuʼne, ex qa kʼujlaʼn qe txqantl kyuʼne ik tzeʼn kʼujlaʼn qeye quʼne, ax ikx kyyekʼinkuye qa bʼaʼn che oyine.
8 Nya jun orden in xi nqʼoʼne kyeye kyukʼil yol lu, oʼkx wajbʼile tuʼn tok kyqʼoʼne toklen tkyaqilju in bʼant kyuʼn txqantl ex tuʼn tok nkeʼyine qa in kubʼ kyyekʼine axix tok kʼujlabʼil.
9 Porke o tzʼel kynikʼe tiʼj tzeʼn t-xtalbʼil Qajaw Jesucristo: maske qʼinun, ok tqʼon tibʼ te prow noq tuʼn kypaje, tuʼntzun kyoke te qʼinun noq tuʼn tprowil.
10 Jaʼlo kxel nqʼamaʼne kyeye tiʼ nxime tiʼj jlu. Te jun bʼaʼn te kyeye, porke ya ma tzikʼ jun abʼqʼi t-xilen tzyet aqʼuntl lu kyuʼne. Porke nya oʼkx kubʼ kyyekʼine qa kyajbʼiltoqe tuʼn t-xi kybʼinchaʼne, sino ax ikx xi tzyet kyuʼne.
11 Tuʼntzunju, kybʼajsankuye aqʼuntl xi tzyet kyuʼne tukʼil nimxix kygane ik tzeʼn tnejel, aj t-xi kyqʼoʼne aju jaku bʼant kyuʼne.
12 Porke alkye in xi tqʼoʼn jun oyaj tukʼil tkyaqil tkʼuʼj, in tzalaj Dios tiʼj. Porke tajbʼil Dios tuʼn t-xi tqʼoʼn jun xjal aju jaku bʼant tuʼn ex nya aju mlay bʼant tuʼn.
13 Mintiʼ in xi nqʼamaʼne jlu kyeye tuʼn tok kyanqʼibʼile mas kwest, atzun kye txqantl mintiʼ kybʼis.
14 Noq oʼkx wajbʼile tuʼn qten qkyaqilx parej. Porke jaʼlo at nim kyeye ex jaku che onine kyiʼj tuʼn tten aju at tajbʼen kye. Tojtzun juntl maj, aj tten nim kye, aqe jaku che onin kyiʼje tuʼn tten aju at tajbʼen kyeye. Iktzun tten parej qo tel qkyaqilx.
15 Ik tzeʼn in tzaj tqʼamaʼn tyol Dios: «Aqeju jaw kychmoʼn nim, mintiʼ kyaj sobrin kye, ex aqeju jaw kychmoʼn chʼin, cabalx kanin kye».
16 Jaʼlo, in xi qqʼoʼne chjonte te Dios tuʼnju kubʼ tqʼoʼn toj tanmi Tito tuʼn t-ximen kyiʼje ik tzeʼn qeye in qo ximane kyiʼje.
17 Porke nya oʼkx ma txi tbʼiʼn Tito aju ma txi qqʼamaʼne te, sino ax ikx tajbʼil tuʼn t-xi tbʼinchaʼn aju ma txi qqanine te, tuʼntzunju ma kubʼ t-ximen tuʼn t-xiʼ visitaril kyeye.
18 Ex tukʼil Tito, ax ikx kxel qsamaʼne erman in che yolin txqantl bʼaʼn tiʼj kyoj kykyaqil congregación noq tuʼn aqʼuntl in bʼant tuʼn tiʼj tbʼanel noticia.
19 Nya oʼkxju, ax ikx o jaw skʼoʼn erman lu kyuʼn okslal kyoj kykyaqil congregación tuʼn t-xiʼ qukʼile ex tuʼn tonin qiʼje tuʼn t-xi sipet oyaj kjawil chmet, aju kxel sipet tuʼn tjaw nimset tbʼi Qajaw ex tuʼn tkubʼ qyekʼine qa list atoʼye tuʼn qonine kyiʼj txqantl.
20 Iktzun tten mlay che yolin xjal tiʼj tzeʼn kxel qsipene tkyaqil oyaj lu.
21 Porke ‹in nok tilil quʼne tuʼn t-xi qbʼinchaʼne tkyaqil toj tumel, nya oʼkx twitz Jehová,* sino ax ikx kywitz xjal›.
22 Ax ikx kxel qsamaʼne juntl kyxol qerman kyukʼil, aju o tzʼok qqʼoʼne toj prueba nimku maj ex o kubʼ tyekʼin qa in nok tilil tuʼn toj tkyaqil. Pero jaʼlo kʼokel tilil mas tuʼn, porke qʼuqlixix tkʼuʼj kyiʼje.
23 Qa at jun mintiʼ in nok qeʼ tkʼuʼj tiʼj Tito, tzʼelx tnikʼ tiʼj qa jun wukʼile Tito ex qa in qo aqʼunane junx tukʼil tuʼn qajbʼene kyeye. Ex qa at jun mintiʼ in nok qeʼ tkʼuʼj kyiʼj qerman che pol tukʼil, tzʼelx tnikʼ tiʼj qa samaʼn* qe kyuʼn erman ateʼ kyoj congregación ex qa in jaw kynimsaʼn tbʼi Cristo.
24 Tuʼntzunju, kyyekʼinxe kye erman lu qa kʼujlaʼn qe kyuʼne ex kyyekʼinxe kye okslal kyojele congregación tiquʼn in jaw qnimsan qibʼe kyiʼje.
