Tkabʼin a los Corintios 12:1-21
12 Ax tok, maske mintiʼ tajbʼen tuʼn tjaw nnimsan wibʼe, kjawil nnimsan wibʼe. Ok chin yolile kyukʼile kyiʼj qe witzikʼ ex qe tqanil o tzaj tyekʼin Qajaw weye.
2 At jun xinaq* ojtzqiʼn wuʼne okslal tiʼj Cristo, ma tzikʼ 14 años, noq minabʼen xi qʼiʼn toj toxin kyaʼj. Mintiʼ bʼiʼn wuʼne qa tukʼil t-xmilal moqa nya, oʼkx Dios bʼilte.
3 Ikju, ojtzqiʼn xinaq lu wuʼne. Pero mintiʼ bʼiʼn wuʼne qa xi qʼiʼn toj paraíso tukʼil t-xmilal moqa nya, oʼkx Dios bʼilte.
4 Ex tej attoq toj paraíso, ok tbʼiʼn qe yol mlay bʼant tuʼn qyolin tiʼj ex aju mintiʼ toklen jun xjal tuʼn tyolin tiʼj.
5 Kjawil nnimsan wibʼe tiʼj xinaq lu, pero mlay jaw nnimsan wibʼe wiʼjxe, noq oʼkx tiʼjju in tzaj tyekʼin qa mintiʼ wipumale.
6 Pero maske noqwit jaw nnimsan wibʼe, mintiʼ in kubʼ nyekʼine qa mintiʼ nnabʼile, porke axix tok aju in nqʼamaʼne. Pero mintiʼ in jaw nnimsan wibʼe, tuʼntzun miʼn tkubʼ t-ximen nijun xjal qa mas nim woklene twitzju in nok tkeʼyin moqa in nok tbʼiʼn wiʼje
7 noq tuʼnju in tzaj yekʼin tbʼanelxix witzikʼ weye.
Pero tuʼn miʼn tjaw nnimsan wibʼe ex tuʼn miʼn tkubʼ nximane qa nim woklene, tzaj qʼoʼn jun chʼiʼx toj nxmilale, jun t-anjel Satanás, tuʼntzun nkʼixbʼisanjtze tuʼn.*
8 Oxe maj in kubʼsane twitz Qajaw tuʼn tel tiʼn chʼiʼx toj nxmilale.
9 Pero tzaj tqʼamaʼn Qajaw weye: «Cabalx nxtalbʼile o kubʼ nyekʼine tiʼja, porke mas in qʼanchaʼlix wipumale qa mintiʼ tipumala». Tuʼntzunju, kjawil nnimsan wibʼe tukʼil tzalajbʼil tuʼnju mintiʼ wipumale, tuʼntzun kukx tten tipumal Cristo wibʼaje ik tzeʼn jun carpa.
10 Ikju, in chin tzalaje tuʼnju mintiʼ wipumale, tuʼnju in chin bʼaj yasune ex tuʼnju in chin ikʼe toj necesidad, tuʼnju in chin el ikʼune ex tuʼnju in nok bʼinchaʼn nya bʼaʼn wiʼje tuʼn tpaj Cristo. Porke aj tkubʼ nnaʼne qa mintiʼ wipumale at, mas nim wipumale at.
11 In chin yoline ik tzeʼn jun xjal mintiʼ tnabʼil noq tuʼn kypaje. Pero mintiʼwtlo in chin yoline ikju noqwit ma che yoline bʼaʼn wiʼje. Porke maske nya nim woklene toj kywitze, o kubʼ nyekʼine qa nya mas chʼin woklene kywitz qeju apóstol ateʼ kyxole, aqeju in kyqʼamaʼn qa nim kyoklen.
12 Porke o txi nyekʼine kyeye tukʼil nim pasens qa ax tok jun apóstol qine, ax ikx o che bʼant milagro* wuʼne, qe tbʼanel bʼinchbʼen ex qe bʼinchbʼen nim kyipumal.
13 Qa ikju, ¿tzeʼn tten ma che oke te mas chʼin kyoklene kywitz qeju okslal ateʼ kyoj txqantl congregación? ¿Tuʼnpetzun mintiʼ ma chin oke te jun iqtz kyeye? Qa ikju, kynajsame wile.
14 Lu ma bʼant ntene tuʼn nxiʼye toxin maj kyukʼile, ex mlay chin oke te jun iqtz te kyeye. Porke mintiʼ in chin jyone tiʼjju at kyeye, oʼkx wajbʼile tuʼn kyok nkeʼyine. Porke nya aqe kʼwalbʼaj il tiʼj tuʼn t-xi kykʼuʼn pwaq tuʼn t-xi kyqʼoʼn kye mambʼaj, sino aqe mambʼaj il tiʼj tuʼn t-xi kykʼuʼn pwaq tuʼn t-xi kyqʼoʼn kye kʼwalbʼaj.
15 Tuʼntzunju, tukʼil tkyaqil nkʼuʼje kbʼajel ngastarine tkyaqilju at weye ex kbʼajel nyajin wibʼe noq tuʼn kypaje. Pero qa nimxix kʼujlaʼn qeye wuʼne, ¿bʼaʼnpe tuʼn wok kykʼujlaʼne chʼin?
16 Pero maske mintiʼ in noke te jun iqtz te kyeye, in kyqʼamaʼne qa list qine ex qa e kubʼ nsbʼuʼne.
17 ¿Ma elpe wiʼne jun tiʼ kyeye kyuʼn qe erman e xiʼ nsamaʼne kyukʼile?
18 In kubʼsane twitz Tito tuʼn t-xiʼ kyukʼile ex xiʼ nsamaʼne juntl erman tukʼil. ¿Ma elpe tiʼn Tito jun tiʼ at kyeye? ¿Nyapetzun junx qximbʼetze ten tukʼil Tito? ¿Nyapetzun junx o qo bʼete?
19 Jakulo kubʼ kyximane qa ma txi qqʼamaʼne tkyaqil jlu kyeye tuʼn qklonte qibʼe kywitze. Pero nya ikju, oʼkx in xi qqʼamaʼne axix tok twitz Dios noq tuʼnju okslal qoʼye tiʼj Cristo. Maske ikju, aqeye erman kʼujlaʼn qeye quʼne, tkyaqilju in bʼant quʼne, in bʼant quʼne tuʼntzun kychiʼye toj kyokslabʼile.
20 Pero in chin xobʼe, porke aj npone kyukʼile, nya yajku miʼn che kanete wuʼne ik tzeʼn wajbʼile ex nya yajku nya ik qine ik tzeʼn kyajbʼile. In chin xobʼe, porke nya yajku che kanete wuʼne in che iline kyxole, in txʼaʼl tiʼj kykʼuʼje kyxole, in tzaj nim kytxʼuʼjile, at qʼoj kyxole, in che yoline nya bʼaʼn kyiʼje kyxole, in che jukʼuʼne yol kyxole, in jaw kynimsan kyibʼe ex mintiʼ orden kyxole.
21 Ax ikx in chin xobʼe, porke aj npone juntl maj kyukʼile, nya yajku kubʼ tqʼoʼn Dios nchʼixwiye kywitze ex nya yajku tzaj nbʼise kyiʼj qeju o che bʼinchan il ojtxe naʼmx tanjtz tiʼj kyanmi tiʼj tzʼil o kubʼ kybʼinchaʼn, tiʼj yaẍbʼil* ex tiʼj nya bʼaʼn kybʼinchbʼen mintiʼ in tzaj kychʼixwi tiʼj.*
Tqanil
^ Toj junjuntl lugar «ichan».
^ Moqa «tuʼntzun nbʼaj golpearine tuʼn».
^ Toj griego «señal».
^ Toj griego pornéia. Qʼonka twitza tiʼj diccionario.
^ Toj griego asélgueia. Qʼonka twitza tiʼj diccionario.
