Tkabʼin a los Corintios 13:1-14
13 Atzun toxin maj lu ma bʼaj nbʼinchaʼne ntene tuʼn nxiʼye kyukʼile. «Tuʼn tel kynikʼe tiʼj qa ax tok jun tiʼ moqa nya, il tiʼj tuʼn kyten kabʼe moqa oxe testiw».
2 Maske najchaq atine kyiʼje jaʼlo, kyqʼonke qa in che ok nyole ik tzeʼn atine tkabʼin maj kyukʼile. Tuʼntzunju, in xi nqʼamaʼne jlu kye qeju o kubʼ kybʼinchaʼn jun il ojtxe ex kyeye kykyaqile: qa ma bʼant tuʼn npone kyukʼile, nijun ktzaqpajel tuʼn tkubʼ nkawine.
3 Porke atzun kyajbʼile tuʼn tel kynikʼe tiʼj, qa axix tok in chin ajbʼene tuʼn Cristo tuʼn nyoline kyukʼile. Ex nya mintiʼwt tipumal Cristo kyxole, sino in kubʼ tyekʼin nimxix tipumal.
4 Ax tok, mintiʼtoq tipumal* Cristo tej tkubʼ bʼyoʼn twitz tzeʼ, pero jaʼlo itzʼ noq tuʼn tipumal Dios. Ax ikx qeye jaʼlo, mintiʼ qipumale ik tzeʼn te tnejel, pero ok qo anqʼile junx tukʼil noq tuʼn tipumal Dios at kyukʼile.
5 Kukx che ximane kyiʼjxe qa waʼl qeye toj kyokslabʼile, kukx tzʼel kynikʼe tiʼj qa in che bʼete bʼaʼn. ¿Moqa mintiʼpe in nel kynikʼe tiʼj qa junx taʼ Jesucristo kyukʼile? Bueno, nyalo junx taʼ kyukʼile qa mintiʼ in tzalaj Dios kyiʼje.
6 Pero wajxixe tuʼn tel kynikʼe tiʼj qa ax tok in tzalaj Dios qiʼje.
7 Jaʼlo, in qo kubʼsane twitz Dios tuʼn miʼn tkubʼ kybʼinchaʼne jun nya bʼaʼn. Nya tuʼnju wajbʼile tuʼn tkubʼ kyximen txqantl qa in tzalaj Dios qiʼje, sino tuʼnju wajbʼile tuʼn tkubʼ kybʼinchaʼne aju bʼaʼn, maske in kubʼ kyximen junjun qa mintiʼ in tzalaj Dios qiʼje.
8 Porke mlay bʼant tuʼn tok qbʼinchaʼne jun nya bʼaʼn tiʼj axix tok, noq oʼkx jaku qo onine tiʼj.
9 Ex in qo tzalaje qa aqoʼye mintiʼ qipumale, atzun kyeye at kyipumale. Ex in qo naʼne Dios kyiʼje tuʼn tchʼexpaj kynabʼile.
10 Tuʼntzunju, ma chex ntzʼibʼine qe yol lu kyeye naʼmxtoq npone kyukʼile. Tuʼntzun aj npone kyukʼile, miʼn chin oke kyuw aj tajbʼen woklene wuʼne o tzaj tqʼoʼn Qajaw weye. Ex jaku tzʼajbʼen woklene wuʼne tuʼn kychiʼye toj kyokslabʼile ex nya tuʼn ttzaj kybʼise.
11 De último, aqeye erman, kukx che tzalaje, kychʼexpum kynabʼile, kyqʼonke toklen qʼuqbʼil kykʼuʼje in xi qʼoʼn, junxwit kyximbʼetze ex che anqʼine bʼaʼn kyxolxe. Ex aju Dios at tkʼujlabʼil ex taj tuʼn qten toj bʼaʼn, ktel kyukʼile.
12 Kyqʼolbʼem kyibʼe kyxolxe, ex kytzʼubʼan el kywitze tukʼil tkyaqil kykʼuʼje.
13 Qʼolbʼebʼil kyeye kyuʼn kykyaqil okslal.*
14 Awttzun t-xtalbʼil Qajaw Jesucristo kyaj ten kyukʼile junx tukʼil tkʼujlabʼil Dios, ex junx tukʼil espíritu santo o tzaj qʼoʼn kyeye kykyaqile.
