Tkabʼin a los Corintios 5:1-21
5 Porke aju qja lu bʼinchaʼn twitz txʼotxʼ, aju tal ranch lu, ojtzqiʼn quʼn qa kbʼel xitj ex qa tzul tqʼoʼn Dios juntl qja toj kyaʼj aju mlay kubʼ xitj, jun ja nya bʼinchan kyuʼn xjal.
2 Ax tok, in qo oqʼ tuʼn bʼis tuʼnju kukx atoʼ toj ja lu, ex qajbʼil tuʼn tok qqʼoʼn qiʼj aju o kubʼ bʼinchaʼn qe toj kyaʼj.
3 Iktzun tten, aj tok qqʼoʼn qiʼj, ya mlay qo ten ik tzeʼn mintiʼ qxbʼalun.
4 Porke, aqoʼ in qo anqʼin toj tal ranch lu, mintiʼ in qo oqʼ tuʼn bʼis ex mintiʼ in qo sufririn tuʼnju qaj tuʼn tel qiʼn qiʼj, sino tuʼnju qaj tuʼn tok qqʼoʼn juntl qiʼj, tuʼntzun tchʼexpaj aju qxmilal kkyimel lu tuʼn jun qchwinqlal te jumajx.
5 Porke a Dios o bʼaj bʼinchante qten tuʼn ttzaj qʼoʼn jlu qe ex o tzaj tqʼoʼn espíritu santo qe ik tzeʼn jun garantía tiʼjju tuʼn tul.*
6 Tuʼntzunju, kukx qʼuqli qkʼuʼj tiʼj ex ojtzqiʼn quʼn qa ok qo tel najchaq tiʼj Qajaw mientras in qo anqʼin toj qxmilal lu.*
7 Porke in qo anqʼin ik tzeʼn in tzaj tqʼamaʼn qokslabʼil ex nya ik tzeʼn aju in nok qkeʼyin.
8 Pero qʼuqlixix qkʼuʼj tiʼj ex mas bʼaʼn toj qwitz tuʼn qnajan tukʼil Qajaw twitzju tuʼn qnajan toj qxmilal lu.
9 Tuʼntzunju, noq jaxku tumel in qo najan, qa tukʼil Qajaw moqa nya, kukx in nok tilil quʼn tuʼn ttzalaj qiʼj.
10 Porke qkyaqilx ok qo pol twitz Cristo tuʼn qok toj xjel tuʼn tuʼntzun ttzaj tqʼoʼn chojbʼilte qaqʼunbʼen. Ikju, tzul tqʼoʼn chojbʼilte taqʼunbʼen teyele junjun ik tzeʼnx tbʼinchbʼen, qa bʼaʼn moqa nya bʼaʼn, tej tnajan toj t-xmilal lu.
11 Tuʼntzunju, kukx in nok tilil quʼne tuʼn tkubʼ tiʼj kykʼuʼj xjal quʼne, porke o tzʼel qnikʼe tiʼj tiʼ tzʼelpuna tuʼn qxobʼ te Qajaw. Ex ojtzqiʼnxix qoʼye tuʼn Dios,* ax ikx kyeye wajbʼile tuʼn tel kynikʼe tiʼj tzeʼnxix qoʼye.*
12 Nya qajbʼile tuʼn t-xi qqʼamaʼne juntl maj kyeye tzeʼn qoʼye, noq oʼkx in xi qqʼamaʼne tkyaqil jlu kyeye tuʼntzun tjaw kynimsan kyibʼe qiʼje ex tuʼn tbʼant tuʼn t-xi kyqʼoʼne jun tzaqʼwebʼil kye qeju in jaw kynimsan kyibʼ tiʼjju in nok kykeʼyin ex nya tiʼjju tkuʼx toj tanmi jun xjal.
13 Porke qa o bʼant junjun tiʼ quʼne ik tzeʼn te jun xjal loc, bʼant quʼne tuʼnju in qo ajbʼene te Dios. Qatzun bʼaʼn taʼ qnabʼile, te jun bʼaʼn te kyeye.
14 Porke aju tkʼujlabʼil Cristo in qo ok t-obligarine tuʼn qaqʼunane, porke o tzʼel qnikʼe tiʼj jlu: qa kyim jun xinaq* tuʼn kyklet kykyaqil xjal, porke kykyaqil xjal ya otoq che kyim.
15 Kyim tuʼn kyklet kykyaqil xjal. Tuʼntzunju, aqeju itzʼx qeʼ ya mintiʼ in che anqʼin tuʼn tkubʼ kybʼinchaʼn aju kyex kyajbʼil, sino in che anqʼin tuʼn tkubʼ kybʼinchaʼn aju tajbʼil kyim te kyxel ex jaw anqʼin.
16 Tuʼntzunju, desde jaʼlo, mintiʼ in che ok qkeʼyine txqantl ik tzeʼn in bʼant kyuʼn xjal. Ex qa at junjun qxole ok qkeʼyine Cristo tnejel ik tzeʼn in bʼant kyuʼn xjal, jaʼlo ya mintiʼ in bʼant quʼne.
17 Tuʼntzunju, alkye junx taʼ tukʼil Cristo, in nok te jun akʼaj tbʼinchbʼen Dios. Tkyaqilju at ojtxe ma bʼaj. Jaʼlo, tkyaqil ma tzʼok te akʼaj.
18 Pero atz tukʼil Dios in tzaj tkyaqil, aju o bʼant qten juntl maj tukʼil noq tuʼn Cristo. Ex a Dios o tzaj qʼonte qoklene tuʼn t-xi qqʼamaʼne kye xjal tuʼn tbʼant kyten juntl maj tukʼil.
19 Toj juntl yol, in najbʼen Cristo tuʼn Dios tuʼn kyten xjal bʼaʼn juntl maj tukʼil ex nya qʼiʼn kwent tuʼn tiʼj kyil xjal. Ex o tzaj tqʼoʼn qoklene tuʼn t-xi qqʼamaʼne tqanil kye xjal qa jaku bʼant kyten bʼaʼn juntl maj tukʼil.
20 Tuʼntzunju, ma qo tzaj samaʼne tuʼn Dios te t-xel Cristo, ik tten jlu ik tzeʼn in kubʼsan Dios kywitz xjal noq tuʼn qyole. Tuʼnju aqoʼye ma qo tzaj samaʼn te t-xel Cristo, in qo kubʼsane kywitz xjal: «Kybʼincham kytene juntl maj tukʼil Dios».
21 Maske mintiʼ bʼinchan Cristo il, xi tqʼoʼn Dios ik tzeʼn jun sacrificio tuʼn tchjet qil tuʼntzun qten tzʼaqli twitz Dios noq tuʼn.
