Tkabʼin a los Corintios 11:1-33
11 Jaʼlo, wajbʼile tuʼn tikʼx chʼin nyole kyuʼne maske in kubʼ kyximane qa mintiʼ nnabʼle. ¡Bueno, ya in che ikʼx qe kyuʼne!
2 Porke in chin ximane kyiʼje ik tzeʼn in ximen Dios kyiʼje. Ex o chex nqʼoʼne tuʼn kykubʼ mojeʼye tukʼil junx kychmile, aju Cristo, ex wajbʼile tuʼn kyxi nqʼoʼne te ik tzeʼn jun txin* mintiʼ tpaltil.
3 Pero in tzaj bʼaj nkʼuʼje kyiʼje, porke nya yajku tzʼel txalpuj kynabʼle tuʼn jun xjal ik tzeʼn te Eva tej tkubʼ tkʼuʼj tuʼn tsbʼubʼil kan,* ex ya miʼn tzʼok kykʼujlaʼne Cristo tuʼn tkyaqil kykʼuʼje ex mintiʼ kypaltile.
4 Porke in nok nkeʼyine qa jurat jaku tzʼok qeʼ kykʼuʼje tiʼj tyol jun xjal aju in yolin tiʼj junxitl Jesús mintiʼ ma qo yoline tiʼj kyukʼile, qa bʼaʼn jaku tzʼela toj kywitze qa ma tzaj qʼoʼn junxitl espíritu kyeye twitzju ya ma tzaj qʼoʼn kyeye, ex qa jurat jaku txi kynimane junxitl tbʼanel noticia twitzju o txi kyokslaʼne.
5 Pero qʼuqli nkʼuʼje tiʼj qa o kubʼ nyekʼine qa nya mas chʼin weye woklen kywitz qeju apóstol ateʼ kyxole, aqeju in kyqʼamaʼn qa nim kyoklen.
6 Porke maske kwest in nela weye tuʼn nyoline, at wojtzqibʼile, ex o txi qyekʼine jlu kyeye toj tkyaqilju in bʼant quʼne.
7 ¿Moqa jun ilpe bʼant wuʼne tej t-xi nqʼamaʼne tbʼanel noticia tiʼj Dios kyeye tukʼil tkyaqil nkʼuʼje ex noq kukx, ex tej tkubʼ win wibʼe tuʼn kyjaw nnimsaʼne?
8 Porke tuʼn wajbʼene kyeye, tzaj qʼoʼn onbʼil weye kyuʼn junjuntl congregación ex ok ik tzeʼn el welqʼane aju at kye.
9 Pero maske in nikʼe toj necesidad tej ntene kyukʼile, mintiʼ in noke te jun iqtz te nijun kyxole. Porke tuʼn tten aju at tajbʼen weye, e onin erman e tzaj toj Macedonia wiʼje. Ikju, kukx o tzʼok tilil wuʼne tuʼn miʼn woke te jun iqtz kyeye ex kukx kʼokel tilil wuʼne.
10 Ex akux okslal qine tiʼj Cristo, kukx kjawil nnimsan wibʼe tiʼj jlu toj txʼotxʼ te Acaya.
11 ¿Tiquʼn in chin yoline ikju? ¿Tuʼnpetzulo nya kʼujlaʼn qeye wuʼne? Ojtzqiʼn tuʼn Dios qa kʼujlaʼn qeye wuʼne.
12 Pero aju in nbʼinchaʼne, kukx kbʼantel wuʼne, tuʼntzun miʼn tjaw kynimsan kyibʼ qeju kyajbʼil tuʼn kyok ik tzeʼn qeye, aqeju in jaw kynimsan kyibʼ tiʼjju in bʼant kyuʼn.
13 Porke aqeju xinaq* lu falso apóstol qeʼ, aqʼunal qeʼ noq in che sbʼun kyiʼj txqantl ex noq in nok kyqʼon kyibʼ te t-apóstol Cristo.
14 Pero mintiʼ in chin jaw labʼine tiʼj jlu, porke ax ikx te Satanás in nok tqʼon tibʼ ik tzeʼn jun anjel in qoptzʼaj.
15 Tuʼntzunju, mintiʼ in qo jaw labʼin tiʼj qa ax ikx kye tmajen in nok kyqʼon kyibʼ ik tzeʼn qeju in kubʼ kybʼinchaʼn aju tzʼaqlixix. Pero aju kbʼajel kyiʼj te bʼajsbʼil, kbʼajel ik tzeʼnx kybʼinchbʼen.
16 Kxel nqʼamaʼne juntl maj kyeye: miʼn kubʼ kyximane qa mintiʼ nnabʼle. Pero qa in kubʼ kyximane qa mintiʼ nnabʼle, chin kybʼinkuye maske mintiʼ nnabʼle toj kywitze, tuʼntzun ax ikx weye tuʼn tbʼant tjaw nnimsaʼn chʼin wibʼe.
17 Jaʼlo, ya mintiʼ in chin yoline kyukʼile ik tzeʼn te Qajaw, sino ik tzeʼn te jun xjal mintiʼ tnabʼil, aju in nok qeʼ tkʼuʼj tiʼjx ex in jaw tnimsan tibʼ.
18 Ya que nim qe xjal in jaw kynimsan kyibʼ tiʼjju kyex xjal, ax ikx weye kbʼantel wuʼne.
19 Qa in kyqʼamaʼne qa at kynabʼle, ¿tiquʼntzun in che tzalaje kyiʼj xjal mintiʼ kynabʼl?
20 Nya oʼkxju, ax ikx in che tzalaje tiʼj jun xjal maske in che ok qʼoʼne te majen tuʼn, in kubʼ tnajsaʼn aju at kyeye, in nel tiʼn aju at kyeye, in jaw tniman tibʼ kyibʼaje moqa in nok tzʼajin toj kywitze tuʼn.
21 Chʼixbʼajilx qeye aju ma txi nqʼamaʼne, pero in bʼant wuʼne tuʼnju ateʼ junjun kyxole in kubʼ kyximen qa in qo xobʼe.
Pero qa mintiʼ in tzaj kychʼixwi junjun xjal tuʼn tjaw kynimsan kyibʼ, ax ikx weye mlay tzaj nchʼixwiye tuʼn tjaw nnimsan wibʼe, maske ma kubʼ kyximen junjun qa mintiʼ nnabʼle.
22 ¿Ma hebreo qeʼ? Ax ikx weye hebreo qine. ¿Ma israelita qeʼ? Ax ikx weye israelita qine. ¿Ma tyajil Abrahán qeʼ? Ax ikx weye tyajil Abrahán qine.
23 ¿Ma ajbʼel qe te Cristo? Maske ma chin yoline ik tzeʼn jun xjal loc, o kubʼ nyekʼine qa mas o chin ajbʼene te Cristo kywitz. Mas nim o chin aqʼunane kywitz, mas nim maj o chin okx qʼoʼne toj cárcel kywitz, mas nim maj o chin bʼaj golpearine kywitz ex mas nim maj o chin ok weʼye twitz kamik kywitz.
24 Jweʼ maj in bʼaj golpearine 39 maj kyuʼn judiy,
25 oxe maj in bʼaj golpearine tukʼil tzeʼ, jun maj ok xoʼn abʼj wiʼje, oxe maj kubʼ xitj bark jatumel in xiʼye, ex in tene jun enter qonikʼan ex jun enter qʼij toj mar.
26 Nimku maj o chin viajarine, o tzaj nya bʼaʼn wiʼje kyoj río, o tzaj nya bʼaʼn wiʼje kyuʼn eleqʼ, o tzaj nya bʼaʼn wiʼje kyuʼn nxjalile, o tzaj nya bʼaʼn wiʼje kyuʼn xjal te junjuntl nasyon, o tzaj nya bʼaʼn wiʼje toj tnam, o tzaj nya bʼaʼn wiʼje toj desierto ex toj mar, ex kyuʼn qeju in kyqʼamaʼn qa erman qeʼ.
27 O chin aqʼunane kyuw ex mintiʼ o chin ojlane chʼin, nimku maj mintiʼ o chin jtane te qonikʼen, o tzikʼx weʼyaj ex kʼaj wuʼne, nimku maj mintiʼ o chin waʼne, o tzikʼx nim cheʼw wuʼne ex at maj o chin kyaje mintiʼ nxbʼalune.
28 Pero nya oʼkxju, porke ax ikx in chin ximane tkyaqil qʼij* kyiʼj erman ateʼ kyoj kykyaqil congregación.
29 Qa at jun in tzaj bʼaj tkʼuʼj, ax ikx weye in tzaj bʼaj nkʼuʼje. Ex qa in kubʼ tzʼaq jun erman tuʼn juntl, ax ikx in tzaj nqʼoje.
30 Pero qa il tiʼj tuʼn tjaw nnimsan wibʼe, kjawil nnimsan wibʼe tiʼj tkyaqilju in tzaj tyekʼin qa mintiʼ wipune.
31 Ex ojtzqiʼn tuʼn Dios qa axix tok aju in nqʼamaʼne, aju Tdios ex Tman Qajaw Jesús, aju il tiʼj tuʼn tjaw nimset tbʼi te jumajx.
32 Ik tzeʼn toj tnam Damasco, tajtoq gobernador tokxtoq tjaqʼ tkawbʼil rey Aretas tuʼn ntzyete tuʼn, tuʼntzunju e kubʼ tqʼoʼn guardia ttzi tnam.
33 Pero tuʼn miʼn ntzyete tuʼn, in kutz qʼoʼne toj jun chiʼl ttzi tventanil muro kyuʼn erman.
