Tkabʼin a los Corintios 1:1-24
1 Aqine Pablo, t-apóstol Cristo Jesús qine noq tuʼn tvoluntad Dios, tukʼil qerman Timoteo. Qʼolbʼebʼil kyeye aqeye okslal tiʼj Dios toj tnam Corinto ex kye kykyaqil okslal* ateʼ toj tnam Acaya:
2 Awt Qman Dios ex Qajaw Jesucristo kubʼ tyekʼin t-xtalbʼil kyiʼje ex che oninwt kyiʼje tuʼn kytene bʼaʼn.
3 Nimanxwit tbʼi Dios aju Tman Qajaw Jesucristo, aju Mambʼaj in tzaj qʼaqʼan tkʼuʼj qiʼj ex aju Dios kukx in tzaj tqʼuqbʼaʼn qkʼuʼj.
4 A in tzaj qʼuqbʼante qkʼuʼj toj tkyaqil nya bʼaʼn* in qo ok weʼ twitz, tuʼntzun tbʼant qqʼuqbʼante kykʼuʼj qeju in che ok weʼ twitz alkyexku nya bʼaʼn* tukʼil qʼuqbʼil qkʼuʼj in tzaj tqʼoʼn.
5 Porke ik tzeʼn in qo ok weʼ twitz nim nya bʼaʼn noq tuʼnju okslal qoʼ tiʼj Cristo, ax ikxtzun nim in qʼuqbʼanjtz qkʼuʼj tuʼn Dios noq tuʼn Cristo.
6 Jaʼlo, qa in qo ok weʼye kywitz nya bʼaʼn,* in qo ok weʼye kywitz tuʼn tqʼuqbʼanjtz kykʼuʼje ex tuʼn kyklete. Ex qa ma qʼuqbʼanjtz qkʼuʼje, ax ikx kyeye in qʼuqbʼanjtz kykʼuʼje. Ex kʼonil qʼuqbʼil kykʼuʼje lu kyiʼje tuʼn tikʼx kyuʼne aj kyok weʼye kywitz aʼyex nya bʼaʼn in qo ok weʼye kywitz.
7 Tuʼntzunju, qʼuqli qkʼuʼje kyiʼje. Porke ojtzqiʼn quʼne qa ik tzeʼn in che ok weʼye kywitz aʼyex nya bʼaʼn in qo ok weʼye kywitz, ax ikxtzun tzul qʼuqbʼan kykʼuʼje ik tzeʼn qeye.
8 Aqeye erman, jaʼlo qajbʼile tuʼn tok kybʼiʼne alkyeqe nya bʼaʼn o ok weʼye twitz toj txʼotxʼ te Asia. Aqeju nya bʼaʼn o ok weʼye twitz, mlayxtoq che ikʼx quʼne tukʼil qexe qipumal, axpe ikx nyatoq ojtzqiʼn quʼne qa oktoq qo kjel anqʼine moqa mlay.
9 Kubʼ qximane qa oktoq qo kyimele. Pero bʼaj tkyaqil jlu tuʼn miʼn tok qeʼ qkʼuʼje qiʼjxe, sino tiʼj Dios aju in che jaw anqʼin kyimni tuʼn.
10 O klete tuʼn Dios tiʼj kamik, ex qo kletele juntl maj tuʼn. Ex qʼuqli qkʼuʼje tiʼj qa kukx qo kletele tuʼn.
11 Ax ikx kyeye jaku che onine qiʼje, aj kykubʼsane twitz Dios qiʼje. Porke qa nim qe ma che kubʼsan twitz Dios qiʼje, che tzajel bʼiʼn tuʼn Dios ex kʼonil Dios qiʼje, ax ikx nim qe kxel kyqʼoʼn chjonte te Dios tuʼn onbʼil tzul tqʼoʼn qeye.
12 Ex in qo tzalaje, porke in tqʼamaʼn qanmiye qa in qo bʼete bʼaʼn kyxol xjal ex mas kyxole, mintiʼ qile ex in qo ok lepeʼye tiʼj axix tok in tzaj tukʼil Dios. Mintiʼ in qo ok lepeʼye tiʼj kynabʼil xjal, noq oʼkx in kubʼ qyekʼine t-xtalbʼil Dios.
13 Porke mintiʼ in xi qtzʼibʼine jun yol kyeye aju mlay bʼant tuʼn tjaw kyleerine* ex aju mlay tzʼel kynikʼe tiʼj. Ex qʼuqli nkʼuʼje tiʼj qa kʼokel tilil kyuʼne tuʼn tel kynikʼe tiʼj tkyaqil jlu,
14 ik tzeʼn o tzʼel kynikʼ junjun kyeye tiʼj qa jun tzalajbʼil qoʼye te kyeye, ax ikxtzun kyeye che okele te jun tzalajbʼil qeye toj tqʼijlalil aj tul Qajaw Jesús.
15 Atzun jlu qʼuqli nkʼuʼje tiʼj, tuʼntzunju kubʼ nximane tuʼn nxiʼye tnejel kyukʼile tuʼntzun kytzalaje kabʼe maj.*
16 Atoq nxime tuʼn wikʼe kyukʼile aj nxiʼye Macedonia ex tuʼn wikʼe juntl maj kyukʼile aj tajtz wiʼje Macedonia, tuʼntzun kyxiʼye wabʼil weye toj jun part bʼe aj nxiʼye Judea.
17 Pero tej tkubʼ nximane tuʼn tbʼant jlu wuʼne, nya noq kukx kubʼ nximane. Moqa, ¿oʼkxpe in chin ximane wiʼjxe aj tbʼant jun tiʼ wuʼne, tuʼntzunju in xi nqʼamaʼne «ok» ex después in xi nqʼamaʼne «mlay»?
18 Pero ik tzeʼn jaku tzʼok qeʼ qkʼuʼj tiʼj Dios, ax ikx kyeye jaku tzʼok qeʼ kykʼuʼje kyiʼj qyole. Porke mintiʼ in xi qqʼamaʼne «ok» ex después in xi qqʼamaʼne «mlay».
19 Ik tzeʼn te Jesucristo aju Tkʼwal Dios, aju xi nqʼamaʼne tqanil kyeye tiʼj tukʼil Silvano* ex Timoteo, mintiʼ tqʼama ok ex después tqʼama mlay. Mintiʼ ikʼ tibʼaj tyol.
20 Porke tkyaqil tyol Dios, o japun twi noq tuʼn Jesús. Ex noq tuʼn Jesús, jaku txi qqʼamaʼn amén te Dios, tuʼntzun tjaw qnimsaʼn tbʼi Dios.
21 Pero ate Dios in tzaj yekʼinte qa te Cristo qoʼ, tanto aqeye ex aqoʼye, ex a Dios in jaw skʼon qe.
22 Ax ikx, o kubʼ tqʼoʼn Dios jun sello qibʼaj, o tzaj tqʼoʼn espíritu santo toj qanmi ik tzeʼn jun garantía tiʼjju tuʼn tul.*
23 Jaʼlo kʼokel nqʼoʼne Dios te testiw wiʼje, naʼmx nxiʼye juntl maj kyukʼile Corinto tuʼntzun miʼn ttzaj kybʼise wuʼne.
24 Mintiʼ in xi nqʼamaʼne qa aqoʼye tajaw kyokslabʼile, noq oʼkx qajbʼile tuʼn qonine kyukʼile tuʼn kytzalaje, porke waʼl qeye toj kyokslabʼile.
