Tkabʼin a los Corintios 4:1-18
4 Tuʼntzunju, mintiʼ in qo kubʼ numje porke ma tzaj qʼoʼn qoklene lu noq tuʼn t-xtalbʼil Dios o kubʼ tyekʼin qiʼje.
2 Ex o tzʼel qpan qibʼe tiʼjju chʼixbʼajilx in bʼant kyuʼn xjal toj ewaj, mintiʼ in qo sbʼuʼne ex mintiʼ in bʼaj qchʼexpuʼne tyol Dios. Ex aj t-xi qqʼoʼne xnaqʼtzbʼil tiʼj axix tok, twitz Dios, in qo oke te jun tbʼanel ejemplo kywitz kykyaqil xjal.
3 Qa ewin ateʼ tbʼanel noticia in qo yoline tiʼj tukʼil jun xbʼalun, ewin taʼ kye qeju in che naj.*
4 Ikju, o kubʼ ewin kye qeju nya okslal, aqeju o kubʼ moẍsaʼn kynabʼil tuʼn dios in kawin toj ambʼil jaʼlo,* tuʼntzun miʼn tok kykeʼyin spikʼun in qoptzʼaj kyibʼaj, aju tspikʼumal tbʼanelxix noticia tiʼj Cristo, aju tilbʼilal Dios.
5 Porke mintiʼ in qo yoline qiʼjxe, sino in xi qqʼamaʼne qa a Jesucristo Qajaw ex qa o qo oke te kymajene noq tuʼn Jesús.
6 Porke axte Dios qʼamante jlu: «Kqoptzʼajel spikʼun toj qlolj». Ex o qoptzʼaj spikʼun toj qanmiye tuʼn Dios tukʼil tbʼanelxix ojtzqibʼil tiʼj aju in qoptzʼaj tiʼj twitz Cristo.
7 Noqtzun tuʼnj, ma tzaj qʼoʼn qʼinumabʼil lu qeye, maske ik qoʼye ik tzeʼn jun xar, tuʼntzun tel toj qʼanchaʼl qa tuʼn Dios at nimxix qipumale ex nya quʼnx qibʼe.
8 In qo ok weʼye kywitz nim nya bʼaʼn, pero kukx in qo exe kywitz. At maj mintiʼ ojtzqiʼn quʼne tiʼ tuʼn t-xi qbʼinchaʼne, pero kukx at jun tumel tzeʼn tuʼn qtzaqpaje.*
9 In nok bʼinchaʼn nya bʼaʼn qiʼje, pero nya qjunalxe atoʼye. In qo kubʼ xoʼne twitz txʼotxʼ, pero mintiʼ in qo naje.
10 Kukx in qo ok weʼye twitz kamik noq jaxku tumel ik tzeʼn te Jesús, tuʼntzun tel kynikʼ xjal tiʼj qa in qo sufririne ik tzeʼn sufririn Jesús.
11 Porke akux itzʼ qoʼye, kukx qo okel weʼye twitz kamik noq tuʼnju in qo ok lepeʼye tiʼj Jesús, tuʼntzun tel kynikʼ xjal tiʼj qa in qo sufririne ik tzeʼn sufririn Jesús.
12 Ikju, aqoʼye in qo ok weʼye twitz kamik, atzun kyeye at kychwinqlale.
13 Porke ax ikx qeye in kubʼ qyekʼine qa at qokslabʼile ik tzeʼn in tzaj kyqʼamaʼn qe yol lu e kyaj tzʼibʼin: «Xi wokslaʼne, tuʼntzunju in yoline». Ikju, ax ikx qeye, tuʼnju at qokslabʼile in qo yoline.
14 Porke ojtzqiʼn quʼne qa ax ikx qeye qo jawil anqʼine tuʼn Dios, aju jaw anqʼin Jesús tuʼn, tuʼntzun qtene junx tukʼil Jesús, ex qa qo xel qʼiʼne junx kyukʼile tuʼntzun qten twitz Jesús.
15 Porke bʼaj tkyaqil jlu te jun bʼaʼn te kyeye tuʼntzun tkubʼ tyekʼin Dios t-xtalbʼil kyiʼj mas xjal. Iktzun tten kxel kyqʼoʼn mas xjal chjonte te Dios tuʼntzun tjaw kynimsaʼn.
16 Tuʼntzunju, mintiʼ in qo kubʼ numj. Maske xi tbʼaj tipumal qxmilal, mas in nok tipumal qanmi junjun qʼij.
17 Porke aqeju nya bʼaʼn* in qo ok weʼ twitz jaʼlo, noq te jun rat ex mlayx che pon ik tzeʼn oklenj tzul qʼoʼn qe. Porke aju oklenj tzul qʼoʼn qe, kʼokel te mas tbʼanel* junjun qʼij ex ktel te jumajx.
18 Tuʼntzunju, atz tok qwitz tiʼjju nya qʼanchaʼl ex nya tiʼjju qʼanchaʼl. Porke aju qʼanchaʼl noq te jteʼ qʼij, pero aju nya qʼanchaʼl te jumajx.
