E higa mar 2020, ne nitie masiche mang’eny ma notimore e piny mangima moriwo nyaka tuo mar COVID-19. Ang’o ma Joneno mag Jehova osetimo mondo gikony joma masichego osemulo achiel kachiel?

 E higa mar tijwa ma 2020, a Komiti mar Jocheno mar Bura Matayo nopwodho mondo oti gi siling’ b ma dirom bilion 2.8 e konyo joma noyudo masira. Pesago nokonyo kuonde mokalo 200 ma masiche notimoree. Moko kuom masichego ne gin tuo mar COVID-19, yembe mager, ohula ma nokwako pinje mag Afrika, nok mar chiemo e piny Venezuela, kod oro ma nokwako piny Zimbabwe. Pesago notigo e nyiewo chiemo, pi, lewni, yedhe, chulo kuonde dak, kaachiel gi nyiewo gige gedo. Ne ane moko kuom ranyisi motudore gi wach chiwo kony.

 Tuo mar COVID-19. Tuoni osekelo pek mang’eny ne owetewa gi nyiminewa e yore mag ringruok kod e weche yuto. Bende, osenyoso chunygi ahinya. Ne olos Komiti Makonyo e Kinde Masiche (DRC) mokalo 800 mondo okony owete gi nyimine modak kuonde ma masichego notimoree. Komitigo nonoga chal kod gik ma owete gi nyimine ochando, kendo gioroga ripodego mapiyo ne Komiti mar Jocheno. Ripode kaka mago konyoga Komiti mar Jocheno ng’eyo kit kony ma owete gi nyimine dwaro.

 E higa mokalo duto, Komiti Makonyo e Kinde Masiche nokonyo owete gi nyimine yudo chiemo, pi, gige timo ler, kod yedhe. Nitie kuonde ma Komiti Makonyo e Kinde Masiche tiyoga gi jodong-kanyakla modak e alwora ma masira otimoree mondo gikony owete yudo kony ma sirkal chiwo.

 Joma ok gin Joneno mag Jehova osenonegoga kaka wachiwo kony kuonde ma masira otimore. Kuom ranyisi, jatelo moro miluongo ni Field Simwinga, mochung’ ne distrikt mar Nakonde, e piny Zambia, nowacho ne owetewa kama: “Wamor ahinya gi kony muchiwo e sa mowinjore ne joma oyudo masira.”

 Nok mar Chiemo e Piny Angola. Tuo mar COVID-19 nomiyo chiemo obedo ma nok ahinya e piny Angola kendo nengo mar chiemo ma ne yudore noidho ahinya. Thoth owetewa gi nyiminewa noyudo ka nyiewo chiemo en gima tek ahinya nikech ne gionge gi pesa moromo.

 Ne okwa ofis ma Brazil mondo okow bege ma noting’o chiemo mopogore opogore ne owete manie piny Angola. Owete notimo nonro matut mondo gine kaka ne ginyalo ng’iewo chiemo kendo kowogi kuonde ma ne gidwarore ma ok ochuno ni gi ti gi pesa mang’eny. Timo kamano, nomiyo bag ka bag ma noting’o chiemo mopogore opogore moriwo ochele, oganda, kod mor chiedo nonyiew kendo okow kuonde ma gidwarore gi pesa ma dirom siling’ 2,200 kende. Bag achiel ne nyalo ting’o chiemo ma romo kilo 20 kama. Chop sani, osekow bege 33,544 ma romo kilo 654,000. Chiemogo duto koriw gi ma nonyiew e alwora ma joma noyudo masichego odakie nopidho ji mohingo 50,000!

 Owetewa winjo nade nikech kony ma ne giyudono? Alexandre, modak e gweng’ moro mosokore e piny Angola wacho kama: “Aneno ma kaka yo ma Jehova nyisogo ni ohera kendo ni ok an kenda. En adier ni riwruok mar oganda Jehova dewa!” Mariza, miyo moro ma pidho nyithinde kende wacho kama: “Jehova nowinjo ywakna. Agoyone erokamano kaachiel gi riwruokne!”

 Chiwo Kony e Kinde Oro e Piny Zimbabwe. E higa mar tijwa ma 2020, oro malich nomako piny Zimbabwe moweyo ji tara gi tara ka onge chiemo. Joneno mag Jehova mang’eny e piny Zimbabwe ne onge chiemo moromo.

 Nolos komiti abich makonyo e kinde masiche mondo okony owetewa e yudo chiemo. Nitie jolendo ma nokonyo e pango chiemo e bege, ketogi e mtoka, kendo nitie jolendo ma nochiwo mtoknigi mondo otigo e tije kaka mago. c E higa mar tijwa ma 2020, noti gi pesa mokalo siling’ 69,156,100 e pidho ji mokalo 22,700!

 Chiemo ma ne ikowogo ne nyalo yudo ka owete gi nyimine osetieko chiemo ma ne gin-go ma gidong’ nono. Ka chiemo nochoponegi, owetewago nopako Jehova kendo moko kuomgi nochako wero wende mag Pinyruoth.

 E gweng’ moro, mine moko ariyo ma ne gin Joneno mag Jehova kendo ma ne gin mond liete nodhi e romo moro ma ne idhi wuoye e wi kaka inyalo chiw kony mar chiemo ma ne idhi oor gi riwruok moro ma ok mar sirkal. Kata kamano, romono nochako bedo gi weche siasa e iye, omiyo nyiminego nong’ado ni ok gibi luwo chike ma noket mondo eka ng’ato oyudo chiemo ma ne idhi chiwgo. Sama ne giwuok e romono, nochak banegi wach kinyisogi niya, “Kik ubi tem riwoe kae ni udwaro chiemo!” Kata kamano, bang’ jumbe ariyo owetewa nochopo e gweng’no ma gimiyo nyiminewa ariyogo chiemo. Kony mar owetewago nochopo kata ka mar riwruogcha pok ochopo!

 Chiwo kony e piny Zimbabwe e yo ma kamano osemiyo ji mathoth ogombo winjo wach maber. Kuom ranyisi, ne ane gima notimore ne Nyaminwa Prisca, modak e gweng’ moro matin. Kata obedo ni oro ma nomako piny Zimbabweno nokelo pek mang’eny, Nyaminwa Prisca to nochiwore dhi lendo chieng’ Tich Adek gi chieng’ Tich Abich, kendo notimo kamano kata e kinde ma ne ji puroe. Jogweng’gi nosiko ka jare ka giwachone niya: “In ibiro nego joodi gi kech nikech wachni mar lendoni.” Prisca ne dwokogiga niya: “Jehova pok noweyoga jotichne.” Mana machuok bang’ mano, noyudo kony koa e riwruokwa. Moko kuom jirende Prisca ne mor gi wachno, kendo ne ginyise niya: “Nyasachi pok oweyiga, omiyo wan be wadwa ng’e Nyasayeno.” Jirendege abiriyo sani winjoga chokruoge mag kanyakla e redio.

 Kaka wamedo sudo e giko mar ndalo, pod wabiro dhi nyime romo gi masiche. (Mathayo 24:3, 7) Wagoyonu erokamano ahinya kuom chiwo mugologa kutiyo gi yore mopogore opogore moler e websaitwa mar donate.jw.org. Chiwo konyo kama duong’ ahinya, moriwo nyaka konyo joma oyudo masira.