‘Gik ma Notimo Luwo Bang’e’

THEODORE JARACZ, mosebedo ka en jakanyo mar Bura Maduong’ mar Joneno mag Jehova, nyocha otieko wuodhe mar pinyka, okinyi mar Tich Adek Jun 9, 2010. Ne en jahigini 84, kendo oweyo chien Melita ma en chiege mosedakgo kuom higini 53. Wedene mabende oweyo chien gin kaka nyamin-gi kaachiel gi nyikepene, achiel mawuowi kod ma nyiri ariyo.

Ne onyuole Septemba 28, 1925, kama iluongo ni Pike County, Kentucky, e piny Amerka, kendo Owadwa Jaracz nochiwore ne Jehova e batiso ka en jahigini 15, e Agost 10, higa 1941. Higini ariyo bang’e, kane ojahigini 17, nochako tiyo kaka painia mapile, kendo mano ne en chakruok mar tije ne Nyasaye kuom thuolone duto, ma en gima osetimo kuom chiegni higini 67.

E higa 1946, kane ojahigini 20, Owadwa Jaracz ne odhi e klas mar abiriyo mar Watchtower Bible School of Gilead. Bang’ skundno, Owadwa Jaracz noyudo migawo mar tiyo kaka jarit malworo e gweng’ Cleveland, Ohio, e piny Amerka. E higa 1951, ne oore e Bethel ma Australia, kama ne omiye migawo mar tayo weche mag ofisno. Bug 1983 Yearbook of Jehovah’s Witnesses, nonyiso ni Owadwa Jaracz “nojiwo owete ahinya e pinyno mangima kokalo kuom kinda ma ne en-go e luwo chenro mag Nyasaye koda keto ranyisi maber e tij lendo.”

Bang’ dok Amerka, Owadwa Jaracz nokendo Melita Lasko e Desemba 10, 1956. Ne gichako ngimagi mar kend e tij lworo, ka gidhi e alwora koda distrikt mogwaro ma kwako kama lach e Amerka. Ka nochomo giko higa 1974, ne ogwel Owadwa Jaracz mondo obed achiel kuom jokanyo mag Bura Maduong’ mar Joneno mag Jehova.

Owadwa Jaracz en ng’at mibiro par ahinya kuom kaka ne en jatich Jehova mochiworene kendo mochung’ motegno, ma ne keto chunye duto e tije Nyasaye. Ne en dichwo ma jahera kendo morito ode e yo maber, bende ne en ng’at moluoro Nyasaye, kendo mano ne miyo oketo dwach jomoko motelo ne mage owuon. (1 Kor. 13:4, 5) Chuny ma ne en-gono ne nenore kuom kaka kinde duto nodwaro ni otim ne ji duto machalre, e yo makare kendo mang’won. E wi mano, herane mosiko koda kaka nodewo ji ne nenore e kinda ma nonyiso ne tij lendo.

Kata obedo ni wan gi lit nikech lalo jatich ma jakinda ma ne en achiel kuom jood Bethel koda riwruok duto mar owete e piny mangima, wamor kuom tich majaber ma Owadwa Jaracz notimo ne Jehova kuom higini pieche mang’eny. Wan gi geno motegno ni osebedo ‘jadier nyaka tho, mi osemiye osimbo mar ngima.’ (Fwe. 2:10) Wan gadier bende ni ‘gik ma notimo luwo bang’e.’—Fwe. 14:13.