Divilu 8:1-32
8 Penepo Yehova wanena Mosesa amba: “Katwele kudi Felo umulombole amba, ‘Yehova wanena namino amba: “Leka bantu bami bende bakañingidile.+
2 Shi upele’nka nankyo kwibaleka bende, nsa kuponeja kipupo kya byula pa ntanda yobe yonso.+
3 Kadi Munonga wa Nile ukayula byula, bikakanda ne kutwela mu yobe njibo, mu kyumba kyolālanga’mo, pa kitanda kyobe, mu mobo a bengidi bobe ne pa bantu bobe, mu mafūlu obe a mikate ne mu bintu byomusambakenyanga’mo mikama.*+
4 Byula bikakukanda abe, ne bantu bobe, ne bengidi bobe.”’”
5 Kupwa Yehova wanena Mosesa amba: “Nena Alone amba, ‘Olola kuboko kobe na mukombo obe pa minonga, ne pa mikola ya Nile, ne pa bijiba, amba ukandije byula pa ntanda ya Edipito.’”
6 Ebiya Alone waolola kuboko kwandi pa mema a Edipito, byula byashilula kukanda ne kupūta ntanda ya Edipito.
7 Ino babitobo ba maleñanya balonga bintu bimo byonka na bya maleñanya byabo, nabo bakandija byula pa ntanda ya Edipito.+
8 Penepo Felo waita ba Mosesa ne Alone kanena’mba: “Zenzai Yehova atalule byula pondi ne padi bami bantu,+ mwanda nsa kuleka bantu bende bakele kitapwa kudi Yehova.”
9 Ebiya Mosesa wanena Felo amba: “Nakushila bulēme bwa kunombola kitatyi kyomfwaninwe kuzenza batalule byula podi, ne pa bantu bobe, ne pa mobo obe. Ino bikashala enka mu Munonga wa Nile.”
10 Nandi watentulula’mba: “Kesha.” Ebiya wanena’mba: “Bikalongeka enka mowanenena mwanda wa uyuke amba i kutupu muntu mukwabo udi pamo bwa Yehova Leza wetu.+
11 Byula bikafunduka podi abe, pa mobo obe, pa bengidi bobe, ne pa bantu bobe. Bikashala’nka mu Nile.”+
12 Penepo ba Mosesa ne Alone batamba kudi Felo, Mosesa wazenza Yehova pa mwanda wa byula byaaletele padi Felo.+
13 Kupwa Yehova walonga monka mwalombele Mosesa, byula byaanza kufwa mu mobo, mu bipango, ne mu ntanda.
14 Badi bebibunga milwi na milwi, kadi ntanda yadi keinunka luvumba lubi.
15 Felo pa kumona’mba abatūja’ko, waumija mutyima wandi,+ wapela kwibevwana, monka mwanenene Yehova.
16 Ebiya Yehova wanena Mosesa amba: “Nena Alone amba, ‘Olola mukombo obe ukupile luvumbi lwa panshi, lusa kwalamuka ke tumwe* mu ntanda yonso ya Edipito.’”
17 Nabo balongela monka. Alone waolola kuboko kwandi na mukombo wandi, wakupila luvumbi lwa panshi, tumwe twaiya pa muntu ne pa nyema. Luvumbi lonso lwa panshi lwaalamuka ke tumwe mu ntanda yonso ya Edipito.+
18 Babitobo ba maleñanya batompa kulongela monka, amba balupule tumwe na bya maleñanya byabo,+ ino bakomenwa. Tumwe twaiya pa muntu ne pa nyema.
19 Penepo babitobo ba maleñanya balombola Felo amba: “I munwe wa Leza!”+ Ino mutyima wa Felo wadi’nka mūmu, kadi kebevwenepo, monka mwanenene Yehova.
20 Penepo Yehova wanena Mosesa amba: “Būka lubanga bwē ukemane ku meso a Felo. Tala! Usa kutamba kwenda ku mema! Ufwaninwe kumusapwila’mba, ‘Yehova wanena namino amba: “Leka bantu bami bende bakañingidile.
21 Ino shi kulekelepo bantu bami bende, nankyo nsa kutuma mpekepeke* padi abe, ne pa bengidi bobe, ne pa bantu bobe, ne mu mobo obe; kadi mobo a Edipito akayula mpekepeke, ikajika’nka ne nshi pobemene abo.*
22 Mu dyodya difuku, bine nkapandula’mo ntanda ya Ngoshena, mwikalanga bantu bami. Kemukekalapo mpekepeke,+ kadi e pomukayukila’mba, ami Yehova ngidi mu ino ntanda.+
23 Kadi nsa kusansanya bantu bami na bantu bobe. Kino kiyukeno kisa kulongeka kesha.””
24 Penepo Yehova walongela monka, milwi ne milwi ya mpekepeke yaandabila mu njibo ya Felo ne mu mobo a bengidi bandi ne mu ntanda yonso ya Edipito.+ Ntanda yasalwa na mpekepeke.+
25 Ku mfulo, Felo waita ba Mosesa ne Alone kaebanena’mba: “Endai, kelei kitapwa kudi Leza wenu mu ino ntanda.”
26 Ino Mosesa watentulula’mba: “Ke kyendele’mopo kulonga nankyo, mwanda kitapwa kyotukela kudi Yehova Leza wetu kikekala kya munyanji kudi bene Edipito.+ Le shi twele kitapwa kya munyanji ku bene Edipito mu meso abo, babulwepo kwitwasa mabwe?
27 Tusa kwenda lwendo lwa mafuku asatu mu ntanda mutuputupu, tukele kitapwa kudi Yehova Leza wetu mwine’mwa, monka mwaetunenene.”+
28 Penepo Felo wanena’mba: “Nsa kwimuleka mwende mukele kitapwa kudi Yehova Leza wenu mu ntanda mutuputupu. Inoko kemwakyendai kulampe bininge. Zenzai pa mwanda wami.”+
29 Ebiya Mosesa wanena’mba: “Nsa kutaluka ku meso obe, nkazenze Yehova, kadi mpekepeke isa kufunduka padi Felo, pa bengidi bandi, ne pa bantu bandi kesha. Ino Felo kafwaninwepo kwitukaila* monka, apele kuleka bantu bende bakele kitapwa kudi Yehova.”+
30 Penepo Mosesa watamba kwa Felo, wakazenza Yehova.+
31 Ebiya Yehova walonga monka mwanenene Mosesa, mpekepeke yafunduka padi Felo, pa bengidi bandi, ne pa bantu bandi. Kekwashelepo nansha lumo.
32 Inoko Felo waumija monka mutyima wandi, kadi kalekelepo bantu bende.
Kunshi kwa Dyani
^ Nansha’mba “ngeso.”
^ Tuno i twishi tutyetutye twiifwene na tumwe twādi tuvudile mu Edipito.
^ Musaka wa nji isumana.
^ Ko kunena’mba, bene Edipito.
^ Nansha’mba “kukaya makayo.”
