Divilu 3:1-22
3 Mosesa waikele ke mukumbi wa luombe lwa muko wandi Yefelo,+ kitobo wa Midyana. Paadi ukatwala luombe kushika kwa mu ntanda mutuputupu, wafika ku lūlu lwa Leza wa bine, ku Holeba.+
2 Penepo mwikeulu wa Yehova wamumwekela mu lubimbi lwa mudilo umbukata mwa kimuna kya miba.+ Paadi wikitala, wamona’mba kimuna kya miba kyadi kyaka mudilo, ino kimuna kya miba’kya kushinika mpika.
3 Ebiya Mosesa wanena’mba: “Keñenda’ko nkatale kino kimonwa kitulumukwa ndyuke i mwanda waka kimuna kya miba kekishinikapo.”
4 Yehova pa kumona’mba kaenda’ko kukatala, Leza wamwita mu kimuna kya miba kanena’mba: “Mosesa! Mosesa!” nandi amba: “Kalombo.”
5 Penepo wanena’mba: “Kokafwena kubwipi bininge. Vūla bikwabilo ku maulu obe, mwanda pa kifuko poimene’po i pa nshi ijila.”
6 Wanena monka’mba: “Ami ne Leza wa shobe, Leza wa Abalahama,+ Leza wa Izake,+ ne Leza wa Yakoba.”+ Ebiya Mosesa wefya mpala yandi, mwanda wakwetwe moyo kutala kudi Leza wa bine.
7 Yehova wabweja’ko amba: “Bine namone malwa a bantu bami badi mu Edipito, kadi naivwana kudila kwabo mwanda wa boba bebengidija ku bukomo; ndyukile biyampe masusu obasusuka.+
8 Nsa kutūka kukebakūla ku kuboko kwa bene Edipito+ nebalupule mu yoya ntanda nebatweje mu ntanda miyampe kadi mikatampe, ntanda ikuka mabele ne būki,+ ntanda ya bene Kenani, ne bene Hiti, ne bene Amole, ne bene Pedizi, ne bene Hivi, ne bene Yebushi.+
9 Pano tala! Kudila kwa bantu ba Isalela kubafika kondi, kadi namone ne muswelo mubi obebamwesha malwa kudi bene Edipito.+
10 Shi ke pano iya, nsa kukutuma kudi Felo, kadi abe ukalupulanga bantu bami bene Isalela mu Edipito.”+
11 Ino, Mosesa wanena Leza wa bine amba: “Le amiwa nami ne ani amba ñende kudi Felo ne kukalupula bene Isalela mu Edipito?”
12 Ponkapo wanena’mba: “Ami nkekalanga nobe,+ kadi kino kyo kiyukeno kikalombola’mba i ami wakutumine: Shi ubapu kulupula bantu mu Edipito, mukengidilanga* Leza wa bine mu luno lūlu luno’lu.”+
13 Ino Mosesa wanena Leza wa bine amba: “Langa’po bidi shi naenda kudi bene Isalela nkenebanena’mba, ‘Leza wa bakulutuba benu wauntume komudi,’ nabo bangipangule amba, ‘Le dijina dyandi i ani?’+ Nsa kwibalondolola namani?”
14 Ebiya Leza wanena Mosesa amba: “Nkekalanga Kyokya Kyontonga* Kwikala.”*+ Wabweja’ko amba: “Bino e byofwaninwe kulombola bene Isalela amba, ‘Nkekalanga wantume komudi.’”+
15 Penepo Leza wanena Mosesa monka’mba:
“Bino e byofwaninwe kulombola bene Isalela amba, ‘Yehova Leza wa bakulutuba benu, Leza wa Abalahama,+ Leza wa Izake,+ ne Leza wa Yakoba,+ wantume komudi.’ Dino’di dyo dyami dijina dya nyeke,+ kadi e mo mwa kumvulukila ku lukongo ne lukongo.
16 Enda, kakongakanye bakulumpe ba Isalela wibalombole amba, ‘Yehova Leza wa bakulutuba benu waumwekēle, Leza wa Abalahama, wa Izake, ne Yakoba, kadi wanenene amba: “Bine nemumone banwe+ ne byobemulonga mu Edipito.
17 Shi ke pano nanena’mba, nsa kwimutambija mu malwa+ omumona ku maboko a bene Edipito nkemutweje mu ntanda ya bene Kenani, ne bene Hiti, ne bene Amole,+ ne bene Pedizi, ne bene Hivi, ne bene Yebushi,+ ntanda ikuka mabele ne būki.”’+
18 “Bine bakevwananga diwi dyobe,+ kadi ukenda, abe ne bakulumpe ba Isalela, kudi mulopwe wa Edipito, kadi mukamulombola’mba: ‘Yehova Leza wa Bahebelu+ wesambile netu. Tubakwisāshila, wituleke twende lwendo lwa mafuku asatu mu ntanda mutuputupu tukele kitapwa kudi Yehova Leza wetu.’+
19 Ino ami mwine ndyukile biyampe amba mulopwe wa Edipito kakemupepo lupusa lwa kwenda poso kuboko kwa bukomo kumuningile.+
20 Penepa bikanomba kōlola kuboko kwami ne kukupila Edipito na bilongwa byami bitulumukwa byonkalonga’mo, kupwa ukemutambija’mo.+
21 Nkalengeja bene Edipito batōkelwe bano bantu mutyima, kadi pomukenda, kemukendapo makasa nansha dimo.+
22 Mwana-mukaji ense ufwaninwe kulomba mulondakani nandi ne mwana-mukaji ushikatanga mu yandi njibo bintu bya ndalama ne bya olo* pamo ne bisandi, kadi mukavwika’byo benu bana bana-balume ne bana-bakaji; kadi mukatūta bene Edipito.”+
