Divilu 17:1-16
17 Kitango kyonso kya bene Isalela kyataluka mu ntanda mutuputupu ya Shina+ kebenda, badi papa ke papa mwendele musoñanya wa Yehova,+ batūla nkambi ku Lefidimi.+ Ino kekwadipo mema a kutoma bantu.
2 Penepa bantu baanza kupotomeja Mosesa+ kebamunena’mba: “Witupe mema a kutoma.” Ino Mosesa webalondolola’mba: “Le i kika le kyomumpotomejeja? Le i kika kyomutūdila’nka kutūla Yehova pa ditompo?”+
3 Ino kwine’kwa, bantu badi’ko na kyumwa kikatampe kya mema, kebeuningila Mosesa+ amba: “I kika kyowetulupwidile mu Edipito mwanda wa kwitwipaya pamo ne betu bana ne bimunanwa byetu na kyumwa?”
4 Ebiya Mosesa waabija Yehova amba: “Le nsa kulonga namani na bano bantu? Shi peje’tu nansha bityetye basa kungasa mabwe!”
5 Penepo Yehova wanena Mosesa amba: “Pita ku meso a bantu, usele ne bakulumpe bamo ba Isalela ne mukombo owakupile nao Munonga wa Nile.+ Sela’o mu kuboko kobe wende.
6 Tala! Kwine’kwa, nkemananga ku meso obe pa dibwe mu Holeba. Ufwaninwe kukupila ku dibwe, ebiya mema akatamba’ko, kadi bantu bakeatoma.”+ Mosesa walongela monka ku meso a bakulumpe ba Isalela.
7 Penepo wainika kifuko’kya bu Masa*+ ne bu Mediba,*+ mwanda bene Isalela bamupotomeje kadi batūdile Yehova pa ditompo+ kebanena’mba: “Le Yehova udi mu bukata mwetu’ni kadi’mopo?”
8 Penepo bene Amaleke+ baiya kulwa na Isalela mu Lefidimi.+
9 Ebiya Mosesa wanena Yoshua+ amba: “Witutongele’ko bana-balume wende ukalwe na bene Amaleke. Kesha nkemananga pa nsongo ya mukuna na mukombo wa Leza wa bine mu kuboko kwami.”
10 Ebiya Yoshua walonga monka mwamusoñaninye Mosesa,+ wakalwa na bene Amaleke. Ino Mosesa, Alone ne Hula+ bakanda pa nsongo ya mukuna.
11 Kitatyi kyonso kyadi kitulwile Mosesa maboko mūlu, bene Isalela badi banekenya, ino shi watūkija maboko andi, bene Amaleke bo badi banekenya.
12 Maboko a Mosesa pa kuswelela, bayata dibwe, beditūla munshi, nandi washikata’po. Penepo ba Alone ne Hula bamukwata ku maboko yeu koku yeu koku, o mwanda maboko andi ashele maninge nkē kufika ne ku kupona kwa dyuba.
13 Enka nenki Yoshua wanekenya Amaleke ne bantu bandi ku kipete.+
14 Ebiya Yehova wanena Mosesa amba: “Andika kino’ki bu kivulukilo* mu mukanda kadi upitulukile’mo Yoshua amba, ‘Nkajimankanyanga fututu Amaleke munshi mwa diulu,+ kakavulukwapo monka.’”
15 Penepo Mosesa waubaka kisōkelo, wekinika bu Yehova-Nisi,*
16 kanena’mba: “Mwanda kuboko kwandi kudi mu lwana na lupona lwa Yah,+ Yehova nandi ukalwa na Amaleke ku lukongo ne lukongo.”+
Kunshi kwa Dyani
^ Ko kushintulula’mba “Kutompa; Ditompo.”
^ Ko kushintulula’mba “Kwipotomeja.”
^ Nansha’mba “kivulujo.”
^ Ko kushintulula’mba “Yehova I Mutyi Wami wa Kiyukeno.”
