Divilu 38:1-31
38 Ebiya walonga kisōkelo kya kyamulambu kisōkwe na mutyi wa akashia. Kyadi na mitamba iná ya bula bumo, maboko* atano mu bula, maboko atano mu bunkimbwa ne maboko asatu mu bwimwa.+
2 Penepo walonga masengo ku mafinko akyo aná. Kadi masengo akyo adi kintu kimo nakyo. Walamika’ko mukuba.+
3 Kupwa walonga bipungwa byonso bya kisōkelo, mambeketyi, bipawa, ngeso, nkanya, ne bininga bya mudilo. Bipungwa byakyo byonso webilonga bya mukuba.
4 Walongela ne kisōkelo seketa, nsambo misuke ya mukuba, munshi mwa mulomo wakyo, yatūkila dya pa bukata.
5 Walonga nzenze iná ku mafinko aná kubwipi na seketa wa mukuba, bu mwa kukwata mitembo.
6 Kupwa walonga mitembo ya mutyi wa akashia, walamika’ko mukuba.
7 Wakuja mitembo mu nzenze ya mu mbavu ya kisōkelo mwa kwikiselela. Walonga kisōkelo bwa sanduku wa mbao udi pululu.
8 Kupwa walonga kyoilo kya mukuba+ ne kitako* kyakyo kya mukuba; waingidija biyo bya bana-bakaji badi balongololwe mwa kwingidila ku kibelo kya pema wa kubungakena’ko.
9 Ebiya walonga kipango.+ Dya kunshi kwa kipango, mutamba wa kunshi, walonga’ko mampashila ayela a bukonge bulumbuluke bujinge, a maboko 100.+
10 Kwadi bikomo 20 ne bitako 20 bya mapuki bya mukuba, kadi malobo a bikomo ne bikwatyijo* byabyo byadi bya ndalama.
11 Kadi ku mutamba wa kungala nako, kwadi mampashila ayela a maboko 100. Bikomo byao 20 ne bitako byao 20 bya mapuki byadi bya mukuba. Malobo a bikomo ne bikwatyijo* byabyo byadi bya ndalama.
12 Ino ku mutamba wa kushika, mampashila ayela adi a maboko 50. Kwadi bipanda dikumi ne bitako dikumi bya mapuki, kadi malobo a bipanda ne bikwatyijo* byabyo byadi bya ndalama.
13 Bunkimbwa bwa mutamba wa kutunduka, dya kutambanga dyuba, i maboko 50.
14 Kwadi maboko 15 a mampashila ayela ku mutamba umo wa kibelo, na bikomo bisatu ne bitako bisatu bya mapuki.
15 Kadi ku mutamba mukwabo wa kibelo kya kipango, kwadi maboko 15 a mampashila ayela, ne bikomo bisatu ne bitako bisatu bya mapuki.
16 Mampashila onso adi ayela kufulakufula kwa kipango adi a bukonge bulumbuluke bujinge.
17 Bitako bya mapuki bya bikomo byadi bya mukuba, malobo a bikomo ne bikwatyijo* byabyo byadi bya ndalama, ku nsongo kwadi kulamike ndalama, kadi kwadi bya kukwatyija nabyo bya ndalama ku bikomo byonso bya kipango.+
18 Kya kukinga* ku kibelo kya kipango kyadi kisuke na nyushi ifītuluka, ne myoya ityilakana, ne bityila pyā, ne bukonge bulumbuluke bujinge. Kyadi na bula bwa maboko 20 ne maboko 5 mu bwimwa, mu ludingo lumo na mampashila ayela a kipango.+
19 Bikomo byao biná ne bitako byabyo biná bya mapuki byadi bilongwe na mukuba. Malobo abyo ne bikwatyijo* byadi bya ndalama, kadi nsongo yadi milamike’ko ndalama.
20 Bikomo byonso bya kipema ne bya kufulakufula kwa kipango byadi bya mukuba.+
21 Bino’bi byo bintu byaingidijibwe pa kūbaka kipema, kipema kya Bukamoni,+ byabadilwe mungya musoñanya wa Mosesa, kiselwa kya bene Levi+ mu bwendeji bwa Itamala+ mwanā Alone kitobo.
22 Bezalela+ mwanā Udi mwanā Hula wa ku kisaka kya Yuda walonga byonso byobasoñenye Mosesa kudi Yehova.
23 Wadi pamo na Ohodiaba+ mwanā Ahisamaki wa ku kisaka kya Dani, sendwe kadi muntu utungulanga ne kusuka bisandi bya nyushi ifītuluka, myoya ityilakana, bityila pyā, ne bukonge bulumbuluke.
24 Olo yonso yaingidijibwe ku mwingilo onso wa kifuko kijila yafikile pa olo ya kyamulambu kya kupēpeja,+ talenta* 29 ne mashekele* 730 mungya shekele ya ku kifuko kijila.*
25 Kadi ndalama ya boba babadilwe mu kitango yadi talenta 100 ne mashekele 1 775 mungya shekele ya ku kifuko kijila.*
26 Kipindi kya shekele ya muntu ne muntu kyadi kipindi kya shekele mungya shekele ya ku kifuko kijila* ku muntu ense wadi mu bukata mwa boba babadilwe kushilwila ku wa myaka 20 kokanda,+ yafikila pa 603 550.+
27 Kulongwa kwa bitako bya mapuki bya kifuko kijila ne bitako bya mapuki bya mpashila kwalombele talenta 100; bitako bya mapuki 100 i talenta 100, talenta imo ku kitako ne kitako kya mapuki.+
28 Na mashekele 1 775, walonga malobo a bikomo, walamika ku nsongo yabyo ne kwibilunga pamo.
29 Mukuba wa kyamulambu* wadi talenta 70 ne mashekele 2 400.
30 E waalongele nao bitako bya mapuki bya kibelo kya pema wa kubungakena’ko, kisōkelo kya mukuba ne seketa wakyo wa mukuba, ne bipungwa byonso bya kisōkelo,
31 bitako bya mapuki kufulakufula kwa kipango, bitako bya mapuki bya kibelo kya kipango, ne bikomo byonso bya kipema ne bikomo byonso+ bya kufulakufula kwa kipango.
Kunshi kwa Dyani
^ Kuboko kumo i masantimetele 44,5. Tala Mbwejo B14.
^ Ko kunena’mba, biyo bya kyuma bisenejibwe biyampe shē.
^ Nansha’mba “nzenze; nkano” bya kukwatyija nabyo.
^ Nansha’mba “nzenze; nkano” bya kukwatyija nabyo.
^ Nansha’mba “nzenze; nkano” bya kukwatyija nabyo.
^ Nansha’mba “nzenze; nkano” bya kukwatyija nabyo.
^ Nansha’mba “mpashila.”
^ Nansha’mba “nzenze; nkano” bya kukwatyija nabyo.
^ Talenta imo i makilo 34,2. Tala Mbwejo B14.
^ Shekele imo i mangalame 11,4. Tala Mbwejo B14.
^ Nansha’mba “na shekele ijila.”
^ Nansha’mba “na shekele ijila.”
^ Nansha’mba “na shekele ijila.”
^ Nansha’mba “kyamulambu kya kupēpeja.”
