Divilu 11:1-10
11 Penepo Yehova wanena Mosesa amba: “Nsa kuleta kipupo kikwabo padi Felo ne pa Edipito. Kupwa ukemuleka mutaluke kuno mwende.+ Shi wemuleka mwende, usa kwimupangididila kuno.+
2 Shi ke pano lombola bantu amba, bana-balume ne bana-bakaji bonso bafwaninwe kulomba mulondakani nabo bintu bya ndalama ne bya olo.”+
3 Ebiya Yehova walengeja bene Edipito batōkelwe bantu mutyima. Kadi Mosesa waikala na bulēme bukatampe mu ntanda ya Edipito umbukata mwa bengidi ba Felo ne mu bantu.
4 Penepo Mosesa wanena’mba: “Yehova wanena namino amba, ‘Dya mu bukata bwa bufuku nsa kutambila umbukata mwa Edipito,+
5 umbedi ense mu ntanda ya Edipito usa kufwa,+ kushilwila ku umbedi wa Felo ushikete pa lupona lwandi kutūla ne ku umbedi wa umpika mwana-mukaji wingila na mpelo, ne umbedi ense wa bimunanwa.+
6 Mu ntanda yonso ya Edipito, mukekala miyoa mikatampe keyamwekele kashā kadi keikamwekapo monka.+
7 Nansha ke mbwa mwine kakabulukilapo* bene Isalela, bantu nansha bimunanwa byabo, mwanda wa muyuke amba Yehova ukokeja kusansanya bene Edipito na bene Isalela.’+
8 Kadi bine bengidi bobe bonso bakatūkila kondi kebevukwila, kebanena’mba, ‘Enda, abe ne bantu bonso bakulonda.’+ Kupwa nkatambanga.” Ponkapo watamba kwa Felo na bulobo bukatampe.
9 Penepo Yehova wanena Mosesa amba: “Felo kakakwivwanapo,+ mwanda wa bingelengele byami bivudijibwe mu ntanda ya Edipito.”+
10 Ba Mosesa ne Alone balonga bino bingelengele byonso ku meso a Felo,+ ino Yehova waleka mutyima wa Felo ūme, kalekelepo bene Isalela bataluke mu yandi ntanda bende.+
Kunshi kwa Dyani
^ Kishima pa kishima i, “kusongola ludimi lwandi.”
