Divilu 2:1-25
2 Mu kine kitatyi’kya, mwana-mulume umo wa mu njibo ya Levi wasongele mwanā Levi umo mwana-mukaji.+
2 Ebiya mwana-mukaji’wa waimita, wabutula mwana mwana-mulume. Aye pa kumona’mba i muyampe, wamufya myeji isatu.+
3 Byakadipo ukibwanya kumufya,+ wayata kisaku* kya mbuba wekishinga kabudimbo ne bubanda kupwa waela’mo mwana wakekitūla mu mabungu dya ku lubungo lwa Munonga wa Nile.
4 Ino kaka wandi+ waimana dya kulampe utala bisa kumufikila.
5 Mwanā Felo mwana-mukaji pa kwiya koya ku Nile, bengidi bandi bana-bakaji badi bananga kufula kwa Nile. Penepo wamona kisaku mu bukata mwa mabungu. Wātuma umpika wandi mwana-mukaji kukekisela.+
6 Aye pa kupūtula’kyo, wamona’mo mwana, kadi mwana wadi udila. Wamwivwanina lusa, ino kanena’mba: “Uno’u i mwanā Bahebelu.”
7 Penepa kaka wandi wanena mwanā Felo mwana-mukaji amba: “Lelo ñende nkakwityile mwana-mukaji wamisha wa ku Bahebelu aye akwamishishe uno mwana?”
8 Ebiya mwanā Felo wamunena’mba: “Enda!” Ponkapo nsongwakaji waenda, waketa inandya mwana.+
9 Penepo mwanā Felo wamunena’mba: “Sela uno mwana uñamishishe’ye, nsa kukufuta.” Penepa mwana-mukaji’wa wasela mwana wakamwamisha.
10 Mwana pa kutama, wakapa’ye mwanā Felo, waikala ke wandi mwana.+ Nandi wamwinika bu Mosesa* kanena’mba: “I mwanda namwabwile mu mema.”+
11 Ino mu mene mafuku’a, Mosesa pa kutama,* watambila kudi banababo kukatala biselwa bilēma byobadi basela,+ wamona mwine Edipito umo ukupila Muhebelu mwanabo.
12 Ebiya watala koku ne koku, kamwene’ko muntu, waipaya mwine Edipito kupwa wamufya mu musenga.+
13 Ino watamba difuku dyalondele’po, kwadi Bahebelu babidi badi bekupila. Ebiya wanena yewa wadi mulube amba: “I kika kyokupidila mukwenu?”+
14 Nandi wamulondolola’mba: “I ani wakutūla bu mfumu ne bu mutyibi wetu? Lelo kokimbe kungipaya na mowaipaile mwine Edipito?”+ Ebiya Mosesa wakwatwa moyo kanena’mba: “Na bubine uno mwanda ubayukana!”
15 Penepo Felo waivwana uno mwanda, kakimbe kwipaya Mosesa; ino Mosesa wanyema Felo waenda kukekala mu ntanda ya Midyana,+ washikata kubwipi na mushimwa.
16 Ino kitobo wa Midyana+ wadi na bana basamba-babidi bana-bakaji, ebiya baiya kuteka mema ne kuyuja mvwa ya kutomeja’mo luombe lwa shabo.
17 Ino bakumbi baiya kebebapanga, monka mobadi balongela. Penepo Mosesa waimana kukakwasha* bana-bakaji kadi watomeja ne luombe lwabo mema.
18 Abo pa kujokela ku njibo kudi shabo Leuele,*+ watulumuka kanena’mba: “Le i namani dyalelo mubajokela bukidibukidi ku njibo?”
19 Nabo bamulondolola’mba: “Mwine Edipito+ umo wadi wetukūla ku bakumbi, wetutekela’nka ne mema, watomeja ne luombe.”
20 Wanena bandi bana’mba: “Le udi kwepi? Mwanda waka mubashiye yao muntu? Kamwitei, tudye nandi.”
21 Kupwa Mosesa waitabija kushikata na muntu’wa, nandi wasongeja wandi mwana Zipola+ kudi Mosesa.
22 Mwenda mafuku, wabutula mwana mwana-mulume, wamwinika bu Ngelashoma,*+ mwanda wanenene amba, “Kendi mweni wa kibundi mu ntanda-bene.”+
23 Kitatyi* kilampe pa kupita’po, mulopwe wa Edipito wafwa,+ ino bene Isalela badi nyeke babinza mwanda wa bupika, kebadila batompola, kadi madilo abo a kulomba bukwashi pa mwanda wa bupika adi akanda nyeke kudi Leza wa bine.+
24 Ebiya Leza waivwana kubinza kwabo,+ kadi Leza wavuluka kipwano kyaāsambile na Abalahama, Izake, ne Yakoba.+
25 Penepo Leza watala bene Isalela, kadi Leza webamona.
Kunshi kwa Dyani
^ Nansha’mba “sanduku.”
^ Ko kushintulula’mba “Mwabulwe,” ko kunena’mba, mupandijibwe ku mema.
^ Nansha’mba “Mosesa pa kwikala ke mukomo.”
^ Nansha’mba “kukalwila.”
^ Ko kunena’mba, Yefelo.
^ Ko kushintulula’mba “Mweni wa Kibundi Kokwa.”
^ Kishima pa kishima i, “Mafuku mavule.”
