Divilu 30:1-38

  • Kisōkelo kya ensense (1-10)

  • Kubalwa ne lupeto lwa kupūta bubi (11-16)

  • Kyoilo kya mukuba mwa koila (17-21)

  • Mwa kusambakenya māni a kushinga (22-33)

  • Mwa kulongela ensense ijila (34-38)

30  “Ukalonga kisōkelo bu kifuko pa kusōkela ensense;+ ukekilonga na mutyi wa akashia.+  Kikekala na mitamba iná ya bula bumo, kuboko kumo mu bula, kuboko* kumo mu bunkimbwa, ne maboko abidi mu bwimwa. Masengo akyo akekala kintu kimo na akyo.+  Ukekilamika na olo yonkayonka: peulu pakyo, ku mitamba yakyo yonso kufulakufula, ne ku masengo akyo; kadi ukalonga kamulomo* ka olo kufulakufula.  Kadi ukekilongela nzenze ibidi ya olo munshi mwa kamulomo* ku mitamba ibidi koku ne koku, mukakwata mitembo ikengidijibwa pa kwikisela.  Kadi ukalonga mitembo ya mutyi wa akashia ne kulamika’ko olo.  Ukekitūla kumeso kwa mpashila idi kubwipi na sanduku wa Bukamoni,+ kumeso kwa mpūto idi pangala pa Bukamoni, ponkelombwela kodi.+  “Alone+ ukasōkela’po+ ensense ya mananshi,+ ukeisōka pa kisōkelo kitatyi kyalongolola binanu+ lubanga ne lubanga.  Kadi Alone shi kaakija binanu kapita i kāni,* ukasōka ensense. I kyamulambu kya ensense kya nyeke ku meso a Yehova, mu nkongo yenu yonso.  Kufwaninwepo kulambula’po ensense yampikwa kupebwa lupusa,+ nansha kyamulambu kisōkwe, nansha kyamulambu kya miseke, kadi kufwaninwepo kupungulwila’po kyamulambu kya bitomibwa. 10  Alone ukapūta bubi pangala pa masengo akyo musunsa umo ku mwaka.+ Na mashi amo a kyamulambu kya bubi kya kupūta nakyo bubi,+ ukekipūtyila bubi musunsa umo ku mwaka mu nkongo yenu yonso. I kijila nakampata kudi Yehova.” 11  Kupwa Yehova wanena Mosesa amba: 12  “Ponso pobala bana ba Isalela,+ muntu ense ukaleta kinkūlwa mwanda wa būmi bwandi* kudi Yehova pa kitatyi kya kubalwa. I mwanda wa kutyina’mba kipupo kyakebaponena pa kubalwa’pa. 13  Bino’bi byo bikaleta boba bonso bakabalwa: kipindi kimo kya shekele* mungya shekele ya ku kifuko kijila.*+ Mangela* makumi abidi i shekele imo. Kipindi kimo kya shekele i kyabuntu kudi Yehova.+ 14  Muntu ense mubalwe wa myaka 20 ne kupita ukaletela Yehova kyabuntu.+ 15  Mpeta kakaletapo bingi, mulanda nandi kakaletapo bityetye kutabuka kipindi kimo kya shekele* bu kyabuntu kudi Yehova pa kupūta bubi mwanda wa būmi bwenu.* 16  Ukayata ku bene Isalela lupeto lwa ndalama lwa kupūta nalo bubi ne kuleta’lo mwanda wa mwingilo wa pema wa kubungakena’ko, amba lwikale bu kivulukilo ku meso a Yehova ku bene Isalela, ne kupūta bubi mwanda wa būmi bwenu.”* 17  Yehova wanena monka Mosesa amba: 18  “Longa kyoilo kya mukuba ne kitako kyakyo mwa koila;+ kupwa wikitūle pa bukata bwa pema wa kubungakena’ko ne kisōkelo, wele’mo ne mema.+ 19  Alone ne bandi bana bakoya’mo ku makasa ne ku maulu.+ 20  Shi kebatwela mu pema wa kubungakena’ko nansha kufwena ku kisōkelo mwanda wa kwingila ne kulambula byamulambu byelwe na mudilo ne mwishi kudi Yehova, bakoya mema kutyina’mba bakafwa. 21  Bafwaninwe koya ku makasa ne ku maulu kutyina’mba bakafwa, kadi uno musoñanya ukekala wa nyeke kobadi, kudi aye ne ku lutundu lwandi, mu nkongo yabo yonso.”+ 22  Yehova wanena Mosesa monka’mba: 23  “Yata mananshi malumbuluke kutabuka: bipimo 500 bya mpakwa myūmijibwe, ne kipindi kya bwabo bungi, bipimo 250 bya shinamona inunka biya, bipimo 250 bya malao anunka biya, 24  ne bipimo 500 bya mutyi wa kasia, bipimwe na shekele ya ku kifuko kijila,*+ pamo ne hina* umo wa māni a impafu. 25  Kupwa longa’byo māni ajila a kushinga; akekala masobakanibwe na bwino.*+ Afwaninwe kwikala māni ajila a kushinga. 26  “Ukashinga’o pema wa kubungakena’ko+ ne sanduku wa Bukamoni, 27  pamo ne meza ne bipungwa byao byonso, ne kitūlwa-binanu ne bipungwa byakyo, ne kisōkelo kya ensense, 28  ne kisōkelo kya kyamulambu kisōkwe ne bipungwa byakyo byonso, ne kyoilo ne kitako kyakyo. 29  Ufwaninwe kwibipandula amba bikale bijila nakampata.+ Muntu ense wa kwibitenga ufwaninwe kwikala ujila.+ 30  Kadi abe ukashinga Alone+ māni ne bandi bana+ ne kwibapandula amba bañingidile bu babitobo.+ 31  “Ukesamba na bene Isalela amba, ‘Ano māni akekalanga nyeke kondi bu māni ajila a kushinga mu nkongo yenu yonso.+ 32  Keakafukanibwapo pa ngitu ya muntu, kadi kemufwaninwepo kulonga makwabo pamo bwa ano’a. I kintu kijila. Akekalanga nyeke kintu kijila komudi. 33  Muntu ense ulonga māni pamo bwa ano’a ne kwela’o pa muntu* kapelwepo lupusa ufwaninwe kutyibwa’ko* mu bantu bandi.’”+ 34  Kupwa Yehova wanena Mosesa amba: “Yata bungi bumo bonka bwa ano mananshi:+ mano a natafu, ne shekeletyi, ne shelebena ya mananshi, ne ensense itōka tō. 35  Longa’o ensense;+ binunka mwenye bisambakanye bifwaninwe kwikala bisobakanibwe na bwino,* mwele mwepo,+ bitōka tō, kadi bijila. 36  Ukatwa’ko bimo ke bukula bupēla ne kutūla’ko bumo ku meso a Bukamoni mu pema wa kubungakena’ko, ponkelombola kodi. Ensense ikekala ijila nakampata kodi. 37  Kufwaninwepo kwilongela ensense pamo bwa ino’i ya kwingidija abe mwine.+ Ukeimona bu kintu kijila kudi Yehova. 38  Yewa ense ulonga ensense pamo bwa ino’i mwanda wa kwivwana luvumba lwayo ufwaninwe kutyibwa’ko* mu bantu bandi.”

Kunshi kwa Dyani

Kintu kya masantimetele 44,5. Tala Mbwejo B14.
Nansha’mba “mombololo.”
Nansha’mba “mombololo.”
Kishima pa kishima i, “pa bukata bwa byolwa bibidi.”
Nansha’mba “muya wandi.”
Shekele imo i mangalame 11,4. Tala Mbwejo B14.
Nansha’mba “na shekele ijila.”
Ngela imo i mangalame 0,57. Tala Mbwejo B14.
Nansha’mba “myuya yenu.”
Shekele imo i mangalame 11,4. Tala Mbwejo B14.
Nansha’mba “myuya yenu.”
Nansha’mba “na shekele ijila.”
Hina umo i malitele 3,67. Tala Mbwejo B14.
Nansha’mba “pamo bwa mwingilo wa muntu weñanga māni a kwishinga.”
Kishima pa kishima i, “mweni,” ko kunena’mba, muntu ke wa mu kisakapo kya Alone.
Nansha’mba “kwipaibwa.”
Nansha’mba “pamo bwa mwingilo wa muntu weñanga māni a kwishinga.”
Nansha’mba “kwipaibwa.”