ဘၣ်ဃးဒီး တၢ်ဂ့ၢ်အံၤန့ၣ်​ ပှၤတနီၤသံကွၢ်ဝဲလၢ ကျဲလၢအဂၤတဖၣ်လီၤ. အဝဲသ့ၣ်​ သံကွၢ်ဝဲလၢ ဘၣ်မနုၤအဃိ ပဘၣ်ဟဲအိၣ်ဖျဲၣ်ထီၣ်လဲၣ်​ မ့တမ့ၢ် မ့ၢ်ယတၢ်အိၣ်မူန့ၣ်​ အတၢ်ပညိၣ်အိၣ်ဧါ. ဒ်သိး ပတၢ်အိၣ်မူ ကပှဲၤဒီး တၢ်သးခုအဂီၢ် လံာ်စီဆှံတဲဝဲလၢ ပကဘၣ်အိၣ်ဒီး တၢ်ရ့လိာ်သးဒီး ကစၢ်ယွၤလီၤ. ပကကွၢ်သကိး လံာ်စီဆှံ တၢ်မ့ၢ်တၢ်တီ အခီၣ်ထံးခီၣ်ဘိတနီၤ လၢဘၣ်ဃးဒီး တၢ်ဂ့ၢ်အံၤ.

•    ကစၢ်ယွၤန့ၣ်မ့ၢ်ဝဲ ပတၢ်ဘၣ်တ့ကစၢ်, မ့ၢ်လၢ လံာ်စီဆှံတဲဝဲလၢ “အဝဲဒၣ်န့ၣ်တ့ပှၤ, တမ့ၢ်ဘၣ်​ ပကစၢ်ဒၣ်ပဝဲဘၣ်.”—စံးထီၣ်ပတြၢၤ ၁၀၀:၃; လီၣ်ဖျါ ၄:၁၁.

•    ကယဲၢ်တၢ်တမံၤလၢ်လၢ်လၢ ကစၢ်ယွၤတ့လီၤဝဲန့ၣ် အိၣ်ဒီးအတၢ်တိာ်ပာ် ဒီးအတ့လီၤပှၤစ့ၢ်ကီး အိၣ်ဒီးတၢ်တိာ်ပာ်လီၤ.—ယၡါယၤ ၄၅:၁၈.

•    ကစၢ်ယွၤတ့လီၤပှၤဃုာ်ဒီး တၢ်မိၢ်န့ၢ်သးလီ လၢအမ့ၢ်ပ “လိၣ်ဘၣ်​ ကစၢ်ယွၤ အတၢ်ဟံးစုနဲၣ်ကျဲ” လီၤ. လၢတၢ်လိၣ်ဘၣ်အံၤ အကျါန့ၣ်​ ပၣ်ဃုာ်ဒီး ပအဲၣ်ဒိးသ့ၣ်ညါ ပတၢ်အိၣ်မူကပှဲၤဒီး တၢ်သးခုအဂီၢ် ပကဘၣ်မၤဒ်လဲၣ်. (မးသဲ ၅:၃) ဒီးကစၢ်ယွၤ အဲၣ်ဒိးလၢ ပတၢ်မိၢ်န့ၢ်သးလီအံၤ ကလၢပှဲၤထီၣ်လီၤ.—စံးထီၣ်ပတြၢၤ ၁၄၅:၁၆.

•    ပလိၣ်ဘၣ်​ ကစၢ်ယွၤအတၢ်ဟံးစုနဲၣ်ကျဲအဃိ ဒ်သိး ပတၢ်လိၣ်ဘၣ်အံၤ ကလၢပှဲၤထီၣ်အဂီၢ် ပကဘၣ်ဒုးအိၣ်ထီၣ်​ ပတၢ်ရ့လိာ်သးဒီး ကစၢ်ယွၤလီၤ. ပကကဲထီၣ်​ ကစၢ်ယွၤအသကိးန့ၣ်​ လီၤဂာ်လၢ အကဲထီၣ်သး တသ့ဘၣ်. ဘၣ်ဆၣ်​ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသးဆူသုအိၣ်လီၤ.”—ယၤကိာ် ၄:၈; ၂:၂၃.

•    ပမ့ၢ်အဲၣ်ဒိးကဲထီၣ်​ ကစၢ်ယွၤအသကိးန့ၣ်​ ပကဘၣ်အိၣ်မူ ဒ်ကစၢ်ယွၤ အတၢ်ဘၣ်သးအသိးလီၤ. စံၣ်တဲၤတဲလီၤတၢ် ၁၂:၁၃ န့ၣ်ပာ်ဖျါထီၣ်ဝဲ ကစၢ်ယွၤ အတၢ်ဘၣ်သးတခါအံၤလီၤ. ဖဲန့ၣ်တဲဝဲလၢ “ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်ပှၤကညီအတၢ်ခဲလၢာ်လီၤ.”

•    ခါဆူညါန့ၣ်​ ကစၢ်ယွၤ ကမၤလီၤမၢ်ကွံာ် တၢ်ကီတၢ်ခဲတဖၣ်​ ဒီးကဟ့ၣ်လီၤ အသကိးလၢ အဘူၣ်ထီၣ်ဘါထီၣ်အီၤတဖၣ်​ လၢတၢ်မူအထူအယိာ်လီၤ. ဒီးဖဲန့ၣ်အဆၢကတီၢ် အဝဲကမၤလၢပှဲၤ အတၢ်တိာ်ပာ် ဒ်အခီၣ်ထံးအိၣ်ဝဲအသိး ဒီးပအိၣ်မူဘၣ်ဖဲန့ၣ်​ သ့ဝဲလီၤ.—စံးထီၣ်ပတြၢၤ ၃၇:၁၀, ၁၁.