Samuẹle Ọsosuọ 2:1-36

  • Olẹ Hana (1-11)

  • Izieraha emezae ivẹ Ilai (12-26)

  • Jihova o bruoziẹ uwou Ilai (27-36)

2  Kẹsena Hana ọ tẹ lẹ nọ: “Udu mẹ o be ghọghọ fiki Jihova;+Jihova ọ kpare uzei* mẹ kpehru no. Unu mẹ u rovie fihọ kẹkẹe be ta ẹme kẹ ewegrẹ mẹ,Keme iruẹru esiwo ra i bi ru omẹ ghọghọ.   Ohwo ọvo nọ ọ rrọ ọrẹri wọhọ Jihova ọ rrọ họ,Ohwo ọvo ọ wọhọ owhẹ hẹ,+Yọ utho ọvo nọ o wọhọ Ọghẹnẹ mai o rrọ họ.+   Whọ gbẹ rọ omorro ta ẹme he;Jọ ẹme omoya ọvo o no unu ra ze he,Keme Jihova họ Ọghẹnẹ nọ ọ riẹ eware kpobi,+Yọ ọye ọ rẹ sae kiẹ otọ iruẹru ahwo-akpọ gbagba.   A wiri ize egba na no,Rekọ a tẹ kẹ enọ i bi zoruẹ ẹgba.+   Enọ e jẹ re eva vọ a be rọ omarai ru iruo re a tẹ ruẹ emu re,Rekọ enọ ohọo u je kpe, ohọo u gbe bi kpe ai hi.+ Ọga na o yẹ emezae ihrẹ no,+Rekọ ọnọ o wo emezae buobu vẹre na o zihe ruọ ababọ no.*   Jihova ọ rẹ sai kpe jẹ sai siwi uzuazọ;*Ọ rẹ sae rehọ ohwo kpobọ Uki* jẹ sae kpare ohwo ze.+   Jihova ọ rẹ sai ru ohwo yogbe jẹ sai ru ohwo fe;+Ọ rẹ sai hrẹ ohwo kpotọ jẹ sae kpare ohwo kpehru.+   Ọ rẹ kpare oruori no ovu;Ọ rẹ wọ oyogbe no enwo,*+Re a keria kugbe ikpahwo-esuo,Re a kẹ ae agbara nọ o wo ọghọ. Jihova họ ọnọ o wo eware nọ i kru otọakpọ na,+Yọ ehru rai o fi otọakpọ na họ.   Ọ be kpọ ithihi ahwo nọ a be romakpotọ kẹe,+Rekọ o ti ru irumuomu na fibo evaọ ebi,+Keme orọnikọ ogaga o rẹ lẹliẹ ohwo kparobọ họ.+ 10  Jihova ọ te raha enọ e be họre iẹe;*+Ọ te va ku ai no obọ idhiwu na ze.+ Jihova o ti bruoziẹ otọakpọ na soso,+Ọ te kẹ ovie riẹ ogaga,+Ọ te kpare uzei* ọriẹ nọ o wholo na kpehru.”+ 11  Kẹsena Ẹlkena o te kpobọ uwou riẹ evaọ Rema, rekọ ọmọ na ọ tẹ jọ ọgbodibo* Jihova+ evaọ aro Ilai ozerẹ na. 12  Whaọ emezae Ilai a jọ ahwo omuomu;+ a wo adhẹẹ kẹ Jihova ha. 13  Enẹ a jẹ hai ru ẹkẹ nọ o re te izerẹ na evaọ eware nọ ahwo na a wha ze:+ Oke kpobi nọ ohwo o te bi dhe idhe, odibo ozerẹ na jọ ọ vẹ nyaze avọ ododo egha esa nọ o kru họ obọ okenọ arao na ọ be jọ erae họrọ na, 14  o ve du rie họ odhe na, uwho nọ u wo abọ-ivẹ na, ẹbẹro na, hayo uwho nọ u wo obọ-ọvo na. Oware kpobi nọ u lele ododo na ze, ozerẹ na ọ vẹ rehọ iẹe kẹ omariẹ. Ere a je ru ahwo Izrẹl kpobi nọ a jẹ nyaze Shailo. 15  U no ere no, taure ohwo nọ o bi dhe idhe na ọ tẹ te mahe iwhri na dede,+ odibo ozerẹ na jọ ọ vẹ nyaze, ọ vẹ ta kẹe nọ: “Kẹ ozerẹ na arao re ọ rọ tọ. Ọ te rehọ arao nọ a there no mi owhẹ hẹ, ajokpaọ arao ọkpokpọ ọvo.” 16  Nọ ohwo na ọ tẹ ta kẹe nọ: “Jọ a kake mahe iwhri na tao,+ kẹsena whọ vẹ rehọ oware kpobi nọ whọ gwọlọ kẹ omara,”* ọ vẹ ta nọ: “Ijo, rehọ iẹe kẹ omẹ obọnana; o gbẹ rrọ ere he, mẹ te rọ ogaga tọlọ iẹe!” 17  Fikiere uzioraha idibo na u te ti yoma thesiwa evaọ aro Jihova,+ keme a jẹ rọ idhe nọ ahwo a je dhe kẹ Jihova jijehwẹ. 18  Whaọ evaọ oke yena Samuẹle ọ jẹ gbodibo+ evaọ aro Jihova, yọ o je ku ẹfọd nọ a rọ ohọ-olọlọhọ ko họ,+ dede nọ ọ jọ ọmaha gheghe. 19  Ofariẹ, oni riẹ ọ jẹ hai ko emewu nọ o wo abọ họ ro sei kukpe kukpe nọ o te lele ọzae riẹ ziọ Shailo re a dhe idhe ẹgbukpe na.+ 20  Ilai ọ tẹ lẹ ẹro eghale kẹ Ẹlkena avọ aye riẹ inọ: “Jọ Jihova ọ rọ ẹkwoma aye ra nana kẹ owhẹ ọmọ ọfa ro nwene ọnọ whọ rehọ* kẹ Jihova na.”+ Kẹsena a te zihe kpo. 21  Jihova ọ tẹ wariẹ kareghẹhọ Hana, o te mu emọ họ eyẹ;+ o yẹ emezae esa efa gbe emetẹ ivẹ. Samuẹle ọ tẹ gbẹ jẹ rro evaọ aro Jihova.+ 22  Whaọ Ilai ọ kpako gaga no, rekọ o yo kpahe eware kpobi nọ emezae riẹ a je ru+ ahwo Izrẹl kpobi gbe epanọ a je ro lele eyae nọ e jẹ gbodibo evaọ obọ unuẹthẹ uwou-udhu omakugbe na wezẹ.+ 23  Ọ jẹ hae ta kẹ ae nọ: “Fikieme wha bi ro ru eware itienana? Eware nọ ahwo kpobi a be ta kpahe owhai nọ wha bi ru na e rrọ yoyoma. 24  Ijo, emezae mẹ, usi nọ me bi yo kpahe owhai nọ u bi do evaọ udevie ahwo Jihova na u woma ha. 25  Otẹrọnọ ohwo o ru omọfa thọ, ohwo ọfa ọ sae lẹ Jihova kẹe;* rekọ otẹrọnọ ohwo ọ thọ uzi Jihova,+ ono ọ rẹ sae lẹ kẹ ohwo yena?” Rekọ a gaviezọ kẹ ọsẹ rai ghele he, keme Jihova ọ jiroro no inọ o ti kpe ai no.+ 26  Evaọ oke yena yọ Samuẹle ọ gbẹ be rro je bi wo aruoriwo evaọ obọ Jihova gbe evaọ obọ ahwo na.+ 27  Ohwo Ọghẹnẹ jọ ọ tẹ nyabru Ilai ze, ọ tẹ ta kẹe nọ: “Enẹ Jihova ọ ta: ‘Kọ ogbẹrọnọ mẹ o dhesẹ oma mẹ vevẹ kẹ uwou ọsẹ ra okenọ a jọ erigbo kẹ uwou Fẹro evaọ obọ Ijipti?+ 28  Mẹ tẹ salọ iẹe no erua Izrẹl kpobi ze+ re ọ jọ ozerẹ kẹ omẹ, re ọ hae jọ agbada-idhe mẹ+ dhe idhe, mahe insẹnse,* je ku ẹfọd họ evaọ aro mẹ; mẹ tẹ jẹ kẹ uwou ọsẹ-esẹ ra udu nọ a rẹ rọ rehọ ẹkẹ jọ evaọ erao nọ ahwo Izrẹl* a rehọ ze ti dhe idhe.+ 29  Kọ fikieme wha be rọ rehọ idhe nọ a bi dhe kẹ omẹ gbe okẹ nọ me jie uzi nọ a rẹ kẹ omẹ evaọ oria nọ mẹ be rria ro jijehwẹ?*+ Kọ fikieme whọ gbẹ be rọ kẹ emezae ra ọghọ vi omẹ, nọ wha be rọ rehọ ẹkẹ nọ ọ mai woma evaọ idhe ahwo mẹ Izrẹl ro ru omarai jọ poriẹ poriẹ?+ 30  “‘Oyejabọ nọ Jihova Ọghẹnẹ Izrẹl ọ rọ ta nọ: “Mẹ ta nọ uwou ra avọ uwou ọsẹ-esẹ ra e te gbodibo evaọ aro mẹ ẹsikpobi.”+ Rekọ enẹna Jihova ọ ta nọ: “Mẹ te gbẹ kuvẹ re o jọ ere vievie he, keme ahwo nọ a be kẹ omẹ ọghọ, mẹ rẹ kẹ ọghọ,+ ahwo nọ a be jẹ omẹ kufiẹ, a ti rri rai vo.” 31  Rri! Edẹ e be tha nọ me ti mi owhẹ avọ unuwou ọsẹ-esẹ ra ẹgba* rai no, ohwo ọvo ọ gbẹ te jọ unuwou ra kpako ho.+ 32  Ghelọ eware iwoma kpobi nọ i bi te Izrẹl, whọ te jọ oria nọ mẹ be rria wo ọwegrẹ evaọ aro ra,+ yọ ohwo nọ ọ kpako no ọ gbẹ te jọ uwou ra ofa vievie he. 33  Ohwo uwou ra nọ me ti si no ho, nọ ọ te gbẹ jọ agbada-idhe mẹ ru iruo, o ti ru ibiaro ra tu jẹ te wha uweri se owhẹ,* rekọ ọgbọdọ ahwo a ti ro kpe ahwo uwou ra buobu.+ 34  Oware nọ o te via kẹ emezae ivẹ ra, Hofini avọ Finihas o te jọ oka kẹ owhẹ: Aimava a ti whu evaọ ẹdẹ ọvo.+ 35  Kẹsena mẹ vẹ te rehọ ozerẹ nọ a re fievahọ mu kẹ omamẹ.+ O ti ru oware nọ o rọwokugbe udu mẹ;* mẹ te bọ uwou nọ o rẹ tọ kẹe, yọ ọ te jọ ozerẹ kẹ ọnọ me wholo na ẹsikpobi. 36  Ohwo kpobi nọ o ti kiọkọ uwou ra ọ te nyaze ti guzou kpotọ kẹe re a sae hwae umugho jọ jẹ kẹe ukulu ebrẹdi, ọ te ta kẹe nọ: “Ivie, fi omẹ họ ọkwa-ozerẹ na jọ re mẹ sae ruẹ ẹwẹ ebrẹdi nọ mẹ rẹ re.”’”+

Eme-Obotọ

Hayo “ẹgba.” Rri oria Otofa Eme.
Evaọ Hibru, “ọ ya fia no.”
Hayo “sae rehọ ziọ uzuazọ.”
Hayo “Sheol.” Rri oria Otofa Eme.
Hayo o sae jọ nọ, “ezuzu.”
Hayo o sae jọ nọ, “Ozọ ogaga u ti mu enọ i bi lele Jihova họre.”
Hayo “ẹgba.” Rri oria Otofa Eme.
Hayo “o te je ru iruo kẹ.”
Evaọ Hibru, “u si nifẹsh ra urru.” Rri oria Otofa Eme.
Evaọ Hibru, “who momo.”
Hayo o sae jọ nọ, “Ọghẹnẹ ọ sai dhe oma họ ẹme na kẹe.”
Evaọ Hibru, “emezae Izrẹl.”
Hayo o sae jọ nọ, “re o ru iwiri idhe kuye kpehru.”
Evaọ Hibru, “rọ zaharo.”
Evaọ Hibru, “abọ.”
Evaọ Hibru, “o ti ru oma lọhọ nifẹsh ra.” Rri oria Otofa Eme.
Evaọ Hibru, “nọ o rrọ udu mẹ gbe nifẹsh mẹ.” Rri oria Otofa Eme.