Ginarespeto namon ang mga nahimo sang science kag ginapatihan namon ang mga butang nga natukiban sang science, basta ginasuportahan ini sang mabakod nga ebidensia.

 “Ang science amo ang pagtuon sa kinaugali kag kinaiya sang mga butang sa palibot kag ang ihibalo nga matun-an naton sa sini.” (Collins Cobuild Advanced Learner’s English Dictionary) Ang Biblia indi isa ka libro parte sa science, pero nagapalig-on ini sa mga tawo nga tun-an ang mga butang sa palibot kag hibaluon ang mga natukiban sang iban base sa science para makabenepisyo kita. Ari ang pila ka halimbawa:

•   Astronomy: “Magtangla kamo sa langit kag tan-awa. Sin-o ang nagtuga sini nga mga butang? Sia nga nagasugo sa ila hangaway suno sa ila kadamuon; tanan sila ginatawag niya sa ila ngalan.”​—Isaias 40:26.

•   Biology: “Nagahambal sia [si Solomon] tuhoy sa mga kahoy, halin sa sedro sa Lebanon tubtob sa hisopo nga nagapamuhi sa pader; nagahambal sia tuhoy sa mga sapat, sa mga pispis, sa nagakamang nga mga sapat, kag sa mga isda.”​—1 Hari 4:​33.

•   Medicine: “Ang mga mapagros wala nagakinahanglan sing manugbulong, kundi ang mga masakiton.”​—Lucas 5:​31.

•   Meteorology: “Nakasulod ka na bala sa ginataguan sang niebe, ukon nakita mo na bala ang talaguan sang ulan nga yelo . . . ? Diin nagaagi ang hangin halin sa sidlangan kon maghuyop ini sa duta?”​—Job 38:22-​24.

 Ginapalig-on sang amon mga balasahon ang pagrespeto sa science kay may mga artikulo ini parte sa kinaugali kag mga nahimo sang science. Ginapalig-on man sang mga Saksi nga ginikanan nga magtuon sing maayo ang ila kabataan para mas maintiendihan nila ang nagakatabo sa ila palibot. Madamo sang Saksi ni Jehova nga ang ila obra konektado sa science, pareho sang biochemistry, mathematics, kag physics.

 Wala kami nagapati nga masabat sang science ang tanan nga pamangkot sang tawo. a Halimbawa, ginausisa sang mga geologists kon human sa ano ang duta, kag ginatun-an sang mga human biologist kon paano naga-function ang lawas sang tawo. Pero ngaa ang desinyo sang duta insakto gid para makasuportar sang kabuhi, kag ngaa nagapanghikot gid sing maayo ang mga bahin sang aton lawas?

 Nagapati gid kami nga ang Biblia makahatag sing makapakumbinsi nga sabat sa sina nga mga pamangkot. (Salmo 139:13-​16; Isaias 45:18) Gani, nagapati kami nga ang maayo nga edukasyon indi lang pagtuon sa science, kundi sa Biblia man.

 Kon kaisa, daw wala nagasantu ang science sa ginasiling sang Biblia. Pero ang matuod, madamo gali ang wala lang nakaintiende sa kon ano gid ang ginatudlo sang Biblia. Halimbawa, wala ginatudlo sang Biblia nga ang duta gintuga sa sulod sang anom ka adlaw nga may tig-24 ka oras.​—Genesis 1:1; 2:4.

 May popular nga mga teoriya sang science nga wala sing mabakod nga basihan kag wala ginasuportahan sang kilala nga mga scientist. Halimbawa, makita sa mga butang sa palibot nga may ara gid maalam nga nagdesinyo sini. Gani ang amon pagpati pareho sa pagpati sang madamo nga biologist, chemist, kag iban pa, nga ang buhi nga mga butang wala lang nagtuhaw paagi sa proseso nga random mutation kag natural selection.