Mangin Suod sa Dios

Nakilala Niya ang “Tagiposoon sang mga Anak sang mga Tawo”

2 CRONICA 6:29, 30

SIN-O lang bala ang wala nakaagi sang mga kabudlayan kag mga problema? Kon kaisa, mahimo magbatyag kita nga daw wala gid sing nakaintiende sang aton mga kasakit. Pero may isa nga nakaintiende gid sa aton—si Jehova nga Dios. Malugpayan kita sang ginsiling ni Solomon sa 2 Cronica 6:29, 30.

Nangamuyo si Solomon sang gin-inagurahan ang templo sa Jerusalem sang 1026 B.C.E. Sa iya pangamuyo, nga mahimo napulo ka minuto, gindayaw ni Solomon si Jehova subong Dios sang katutom, Manugtuman sang mga promisa, kag Manugpamati sang mga pangamuyo.—1 Hari 8:23-53; 2 Cronica 6:14-42.

Nangabay si Solomon sa Dios nga pamatian ang pangamuyo sang iya mga sumilimba. (Bersikulo 29) Bisan pa ginsambit ni Solomon ang madamo nga kabudlayan (bersikulo 28), nagsiling sia nga ang tagsa ka sumilimba nakahibalo sang iya “kalalat-an” kag nagabatyag sang “kalisud.” Ang isa ka tawo mahimo ginasubuan, samtang lain naman ang problema sang iban.

Bisan ano man ang ila problema, wala nagaisahanon ang mga nagakahadlok sa Dios. Sa pangamuyo ni Solomon, ginapensar niya ang tagsa ka sumilimba nga mahimo ‘magbayaw sang iya mga kamut’ kag tinagipusuon nga mangamuyo kay Jehova. * Ayhan nadumduman niya nga sang nasubuan gid ang iya amay nga si David, nagsiling ini: “Itungtung sa GINOO ang imo lulan.”—Salmo 55:4, 22.

Paano sabton ni Jehova ang mga nagapakitluoy sa iya? Si Solomon nangabay kay Jehova: “Pamati ka kutub sa langit nga imo puluy-an, kag patawara, kag ihatag sa tagsa ka tawo sono sa iya mga pagginawi.” (Bersikulo 30) Nahibaluan ni Solomon nga ang “nagapamati sang pangamuyo” nagaulikid sa iya mga sumilimba indi lamang subong isa ka grupo kundi subong indibiduwal. (Salmo 65:2) Nagabulig si Jehova kag nagapatawad sa nakasala nga gusto magbalik sa iya.—2 Cronica 6:36-39.

Ngaa sigurado gid si Solomon nga sabton ni Jehova ang pakitluoy sang iya mahinulsulon nga mga sumilimba? Sa sugpon sang iya pangamuyo, si Solomon nagsiling: “Nakilala nimo [Jehova] ang iya tagiposoon (kay ikaw, ikaw gid lamang, ang nakakilala sang mga tagiposoon sang mga anak sang mga tawo).” Nahibaluan ni Jehova ang kabudlayan ukon kasakit nga ginabatyag sang tagsa niya ka sumilimba, kag indi Niya sila pagpabay-an sa ila kasubo.—Salmo 37:4.

Malugpayan kita sang pangamuyo ni Solomon. Mahimo nga indi bug-os nga maintiendihan sang mga tawo kon ano gid ang aton ginabatyag—ang aton “kalalat-an” kag “kalisud.” (Hulubaton 14:10) Pero naintiendihan gid kita ni Jehova, kag nagaulikid sia sa aton. Kon ipangamuyo naton ang aton mga ginabatyag, mas masarangan naton ang aton mga problema. “[Itugyan] ninyo sa iya ang tanan ninyo nga kabalaka,” siling sang Biblia, “bangod nagaulikid sia sa inyo.”—1 Pedro 5:7.

[Nota]