Magdiretso sa kaundan

Magdiretso sa listahan sang kaundan

Ngaa Ginsikway Nila ang Mesias?

Ngaa Ginsikway Nila ang Mesias?

 Ngaa Ginsikway Nila ang Mesias?

SANG ari si Jesus sa duta, interesado gid ang mga tawo sa iya ginahambal kag nagdayaw gid sila sa iya mga milagro. Bilang resulta, madamo ang “nagtuo sa iya” kag nagbaton nga sia ang gintagna nga Mesias, ukon Cristo. Nagsiling sila: “Kon mag-abot ang Cristo, magahimo bala sia sang mas madamo nga tanda sangsa nahimo sini nga tawo?”—Juan 7:31.

Bisan pa madamo ang ebidensia nga si Jesus ang Mesias, ang kalabanan nga nakakita kag nakabati sa iya wala magtuo. Pati ang iban nga nagpati sang primero, nagbiya sang ulihi. Ngaa madamo ang wala nagpati nga si Jesus ang Mesias bisan pa mabakod ang mga ebidensia? Hambalan naton ang mga rason, kag pamangkuton ang aton kaugalingon, ‘Puede ayhan nga magpareho man ako sa sini nga mga tawo?’

Wala Matabo ang Ila Ginapaabot

Sang matawo si Jesus, ginapaabot na sang mga Judiyo ang pag-abot sang Mesias. Sang gindala ang lapsag nga si Jesus sa templo, ginsugata sia sang mga “nagahulat sang pagluwas sa Jerusalem” paagi sa ginpromisa nga Mesias. (Lucas 2:38) Sang ulihi, madamo sa nakakita sa mga ginhimo ni Juan nga Manugbawtismo ang nagsiling: “Sia ayhan ang Cristo?” (Lucas  3:15) Kon amo, ano ang ginapaabot sang mga Judiyo sang unang siglo nga himuon sang Mesias?

Nagapati gid ang mga Judiyo sadto nga ang Mesias magaabot kag magahilway sa ila sa mga Romano kag magapasag-uli sang ginharian sang Israel sa duta. Antes ginsugdan ni Jesus ang iya pagwali, madamo nga lider ang nanguna sa pagbato sa gobierno sadto. Ang ila ginhimo may daku gid nga impluwensia sa kon ano ang ginapaabot sang mga tawo sa Mesias.

Lain gid si Jesus sa butig nga mga Mesias. Wala niya ginsugo ang iya mga tagpalamati nga magbato kundi higugmaon ang ila kaaway kag magpasakop sa mga awtoridad. (Mateo 5:41-44) Nangindi sia sang gusto sia himuon sang mga tawo nga hari. Sa baylo, gintudlo niya nga ang iya ginharian “indi bahin sini nga kalibutan.” (Juan 6:15; 18:36) Pero ang sala nga pagpati parte sa Mesias may daku gihapon nga impluwensia sa mga tawo.

Nakita mismo kag nabatian ni Juan nga Manugbawtismo ang mga milagro nga nagapamatuod nga si Jesus amo ang Anak sang Dios. Pero, sang napriso si Juan, nagpadala sia sing mga disipulo para mamangkot kay Jesus: “Ikaw bala ang Isa nga Magakari, ukon magapaabot kami sang iban pa?” (Mateo 11:3) Mahimo naligban si Juan kon si Jesus gid man ang ginpromisa nga Manluluwas, nga ginapaabot sang mga Judiyo.

Indi maintiendihan sang mga apostoles ni Jesus kon ngaa patyon sia kag banhawon. Isa ka bes, sang ginpaathag ni Jesus nga dapat mag-antos kag mapatay ang Mesias, “gindala sia ni Pedro sa higad kag ginsabdong sia.” (Marcos 8:31, 32) Wala pa maintiendihan ni Pedro nga dapat mapatay si Jesus para matuman ang iya papel bilang Mesias.

Sang magsulod si Jesus sa Jerusalem sang Paskua sang 33 C.E., ginsugata sia sang malipayon nga mga tawo nga nagadayaw sa iya bilang Hari. (Juan 12:12, 13) Pero gulpi lang nagbag-o ang kahimtangan! Sina nga semana, gindakop kag ginpamatbatan si Jesus. Sang patay na sia, ang duha niya ka disipulo nagsiling: “Naglaum kami nga ini nga tawo amo ang gintalana nga magaluwas sa Israel.” (Lucas 24:21) Bisan pa sang ginbanhaw na sia kag nagpakita sa iya mga disipulo, nagapati gihapon sila nga ang Mesias magatukod sang ginharian diri sa duta. Namangkot sila: “Ginuo, ipasag-uli mo bala ang ginharian sa Israel sa sini nga tion?” Maathag nga ang sala nga mga pagpati parte sa Mesias nanggamot gid sa tagipusuon kag hunahuna sang mga tagpalamati ni Jesus.—Binuhatan 1:6.

Sang makakayab na si Jesus sa langit kag sang nabubo na ang balaan nga espiritu, amo pa lang naintiendihan sang mga disipulo niya nga ang Mesias magagahom bilang Hari sa langit. (Binuhatan 2:1-4, 32-36) May kaisog nga ginwali sang mga apostoles nga sanday Pedro kag Juan ang pagkabanhaw ni Jesus kag naghimo sila sing mga milagro bilang ebidensia nga ginasuportahan sila sang Dios. (Binuhatan 3:1-9, 13-15) Linibo sa Jerusalem ang nagpati kag nangin mga tumuluo. Pero naakig ang mga lider sang relihion sang mga Judiyo. Pareho sang ila paghingabot kay Jesus, ginhingabot man nila ang iya mga apostoles kag mga disipulo. Ngaa grabe gid ang ila pagsikway kay Jesus?

Ginsikway sang mga Lider sang Relihion

Sang magkari si Jesus sa duta, ang ginatudlo kag ginahimo sang mga lider sang relihion naglisa na sa ginatudlo sang Kasulatan nga ginpasulat sang Dios. Ginauna sang mga lider sang relihion sadto—mga Saduceo, Fariseo, kag mga escriba—ang mga tradisyon sang tawo sangsa nasulat nga Pulong sang Dios. Pirme nila ginaakusar si Jesus nga nagsupak sang Kasuguan bangod nagpang-ayo sia paagi sa milagro sa Adlaw nga Inugpahuway. Ginhangkat ni Jesus ang ila awtoridad kag pagpangangkon nga nahamut-an sila sang Dios paagi sa pagbali sang ila butig nga mga panudlo. Sa pihak  nga bahin, si Jesus naghalin sa imol nga pamilya kag wala makaeskwela sa eskwelahan sang mga relihion. Amo kon ngaa indi gid mabaton sining bugalon nga mga tawo nga si Jesus ang Mesias! Naakig gid sila amo nga “nagplano sila kon paano nila mapatay si Jesus.”—Mateo 12:1-8, 14; 15:1-9, APD.

Ano naman ang reaksion sang mga lider sang relihion sa mga milagro ni Jesus? Wala nila ini ginpanghiwala. Pero, gintinguhaan nila nga gub-on ang pagtuo kay Jesus paagi sa pagsiling nga ang iya gahom halin kay Satanas. Nagsiling sila: “Ini nga tawo nagatabog sang mga demonyo paagi kay Beelzebub, ang manuggahom sang mga demonyo.”—Mateo 12:24.

May isa pa ka rason kon ngaa determinado gid sila nga sikwayon si Jesus bilang Mesias. Sang ginbanhaw ni Jesus si Lazaro, ang mga lider sang lainlain nga relihion nagtipon kag nagsiling: “Ano ang aton himuon, kay ini nga tawo nagahimo sang madamo nga tanda? Kon pabay-an naton sia, sila tanan magatuo sa iya, kag ang mga Romano magakari kag magaagaw sang aton duog sang pagsimba kag sang aton pungsod.” Sa kahadlok nga madula ang ila awtoridad kag poder, nagplano sila nga patyon si Jesus kag si Lazaro!—Juan 11:45-53; 12:9-11.

Ginhingabot sang Iban nga mga Judiyo

Ginhingabot ang mga nagabaton kay Jesus bilang Mesias bangod sa impluwensia sang Judiyo nga mga lider sang relihion sang unang siglo. Ginapabugal nila ang ila posisyon kag ginapakanubo ang mga nagatuo kay Jesus, nga nagasiling: “Wala sing isa sa mga manugdumala ukon sa mga Fariseo ang nagtuo sa iya, indi bala?” (Juan 7:13, 48) Ang iban nga Judiyo nga lider, pareho ni Nicodemo kag ni Jose nga taga-Arimatea, nangin disipulo ni Jesus, pero ginsekreto lang nila ini bangod sa kahadlok. (Juan 3:1, 2; 12:42; 19:38, 39) Nagmando ang Judiyo nga mga lider nga “ang bisan sin-o nga magpahayag nga si Jesus amo ang Cristo, sikwayon sa sinagoga.” (Juan 9:22) Likawan sila kag ikahuya sang komunidad.

Sang ulihi, ginpintasan na ang mga apostoles kag mga disipulo ni Jesus. Bangod maisog sila nga nagwali, ginpaantos sila sang Sanhedrin, ang mataas nga korte sang mga Judiyo. (Binuhatan 5:40) Ginsumbong nila ang disipulo nga si Esteban sang pagpasipala. Ginkondenar sia sang Sanhedrin kag ginbato asta mapatay. Dayon, may “daku nga paghingabot sa kongregasyon sa Jerusalem; ang tanan luwas sa mga apostoles nag-alaplaag sa bug-os nga mga rehiyon sang Judea kag Samaria.” (Binuhatan 6:8-14; 7:54–8:1) Si Saulo, nga nangin si apostol Pablo, nag-entra sa paghingabot nga ginsuportahan sang mataas nga saserdote kag sang “bug-os nga katilingban sang mga tigulang nga lalaki.”—Binuhatan 9:1, 2; 22:4, 5.

Sa pihak sang mga kabudlayan, madasig nga nag-uswag ang Cristianismo sa sulod sang mga tinuig sa tapos napatay si Jesus. Pero bisan linibo ang nangin Cristiano, diutay lang sila sa Palestina sang unang siglo. Ang nagapakilala nga sumulunod ni Cristo ginasikway kag ginapintasan pa gani.

Kon Ano ang Matun-an Naton sa mga Nagsikway kay Jesus

Nakita naton nga bangod sa kahadlok, paghingabot, kag sala nga pag-intiende, madamo ang wala nagtuo kay Jesus sang unang siglo. Subong, nagakatabo man ini bangod sa sala nga mga ideya parte kay Jesus kag sa iya mga panudlo. Halimbawa, madamo ang gintudluan nga ang Ginharian sang Dios ara sa ila tagipusuon ukon matuman ini paagi sa panikasog sang tawo. Ang iban naman naengganyo nga magsalig sa siensia ukon teknolohiya para masolbar  ang mga problema. Suno pa gid sa madamo nga kritiko, ang mga rekord sa Biblia parte sa pagwali ni Jesus indi matuod, gani ginbalewala nila ang pagtuo kay Jesus bilang Mesias.

Ini nga mga ideya kag teoriya nagpalibog sa madamo kon ano ang papel sang Mesias kag kon bala kinahanglan pa nga usisaon ini. Pero sa mga gusto mag-usisa, mas madamo ang ebidensia subong nga si Jesus ang Mesias sangsa unang siglo. Kompleto na ang Hebreong Kasulatan nga may mga tagna parte sa pagahimuon sang Mesias kag ang apat ka Ebanghelyo sang Biblia nga nagrekord sang ginhimo ni Jesus bilang katumanan sining mga tagna. *

Bastante gid ang mga ebidensia para makadesisyon kita kon bala patihan naton ini ukon indi. Kag dapat subong na kita madesisyon. Ngaa? Suno sa Biblia, bilang Mesias nga Hari sang Ginharian sang Dios, laglagon ni Jesus ang mga nagaguba sa duta kag mangin matarong ang iya paggahom. Ang matinumanon nga mga sakop sini magaistar sa isa ka paraiso nga duta asta san-o. (Daniel 2:44; Bugna 11:15, 18; 21:3-5) Amo sini katahom ang imo palaabuton kon manikasog ka subong nga tun-an ang parte kay Jesus kag magtuo sa iya. Dumduma ang ginsiling ni Jesus: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:16.

[Nota]

^ par. 22 Tan-awa ang tsart nga “Mga Tagna Tuhoy sa Mesias” sa pahina 200 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

[Blurb sa pahina 20]

Kilalahon mo bala ang Mesias kon nabuhi ka sang panahon ni Jesus?

[Retrato sa pahina 21]

Indi pagtuguti ang sala nga mga pagpati nga magpugong sa imo nga tun-an ang kamatuoran parte kay Jesus