Magdiretso sa kaundan

Magdiretso sa listahan sang kaundan

‘Dalha ang mga Linukot, Ilabi Na ang mga Pergamino’

‘Dalha ang mga Linukot, Ilabi Na ang mga Pergamino’

 ‘Dalha ang mga Linukot, Ilabi Na ang mga Pergamino’

NANGABAY si Pablo sa iya masigkamisyonero nga si Timoteo nga dalhan sia sang pila ka sinulatan. Ano nga mga linukot kag pergamino ang ginapatuhuyan ni Pablo? Ngaa gintugon gid niya ini? Kag ano ang aton matun-an sa iya tugon?

Ginsulat ini ni Pablo sang tungatunga sang unang siglo C.E. Sadto, ang 39 ka tulun-an sang Hebreo nga Kasulatan natunga sa 22 ukon 24 pa lang ka tulun-an, kag posible nga sa lainlain ini nga mga linukot. Si Propesor Alan Millard nagsiling nga bisan mahal ining mga linukot, ‘mabakal ini sang mga manggaranon.’ Indi lang isa ang ginapanag-iyahan sang iban. Halimbawa, ang Etiopianhon nga eunuco may dala nga linukot sa iya karwahe kag “ginabasa niya sing mabaskog ang libro ni manalagna Isaias.” ‘Mataas sia nga opisyal sa idalom ni Candace nga rayna sang mga Etiopianhon kag sia ang nagadumala sa tanan nga bahandi sang rayna.’ Manggaranon sia gani may kopya sia sang pila ka bahin sang Kasulatan.—Binu. 8:27, 28.

Sa iya sulat kay Timoteo, si Pablo nangabay: “Kon magkari ka, dalha ang kunop nga ginbilin ko sa Troas kay Carpo, kag ang mga linukot, ilabi na ang mga pergamino.” (2 Tim. 4:13) Ginapakita sini nga madamo sing libro nga ginapanag-iyahan si Pablo. Kag ang pinakaimportante sa tanan amo ang Pulong sang Dios. Parte sa tinaga nga “mga pergamino” sa sini nga bersikulo, ang iskolar sa Biblia nga si A. T. Robertson nagsiling: “Mahimo nga mga kopya ini sang mga tulun-an sang Daan nga Testamento, mga pergamino nga mas mahal sangsa mga papiro.” Halin sang bata pa si Pablo, “nagbaton [sia] sang edukasyon . . . sa tiilan ni Gamaliel,” nga manunudlo sang Mosaikong Kasuguan kag ginatahod sang tanan. Gani, indi katingalahan nga may personal sia nga kopya sang mga linukot sang Pulong sang Dios.—Binu. 5:34; 22:3.

Paggamit sang mga Cristiano sang mga Linukot

Daku gid nga pribilehiyo para sa may kopya sang mga linukot sang Balaan nga Kasulatan. Apang, paano mabasa sang kalabanan nga Cristiano sadto ang Pulong sang Dios? Ang una nga sulat ni Pablo kay Timoteo nagahatag sa aton sing ideya. Sia nagsulat: “Samtang manug-abot ako, mag-ukod ka sa pagbasa sing dayag.” (1 Tim. 4:13) Ang pagbasa sing dayag nangin bahin na sang mga miting sa Cristianong kongregasyon, nga nagsugod pa sang tion ni Moises.—Binu. 13:15; 15:21; 2 Cor. 3:15.

Bilang gulang, dapat ‘mag-ukod si Timoteo sa pagbasa sing dayag,’ agod makabenepisyo ang mga wala sing kopya sang tulun-an sang Kasulatan. Pat-od nga samtang ginabasa sing dayag ang Pulong sang Dios nagapamati gid sing maayo  ang mga ginikanan kag kabataan agod wala sila sing malaktawan, kag mahimo nga ginaistoryahan sa ila balay ang napamatian nila sa mga miting.

Ang bantog nga Dead Sea Scroll of Isaiah mga 7.3 metros ang kalabaon. Buot silingon, ang isa ka linukot mabug-at kay may kahoy pa ini sa kada punta kag may suludlan. Mahimo nga diutay lang ang madala sang mga Cristiano kon nagabantala sila. Bisan pa may mga linukot sang Kasulatan si Pablo, mahimo nga indi niya ini tanan madala kon maglakbay sia. Gani, ginbilin niya ang iban sa iya abyan nga si Carpo sa Troas.

Ano ang Matun-an Naton sa Halimbawa ni Pablo?

Nabilanggo si Pablo sa Roma sa ikaduha nga tion, kag antes sia mangabay kay Timoteo, nagsiling sia: “Nakapakig-away na ako sang maayo nga pagpakig-away, nadalagan ko na ang dalaganon tubtob sa katapusan . . . Sugod karon natigana sa akon ang purongpurong sang pagkamatarong.” (2 Tim. 4:7, 8) Mahimo nga ginsulat niya ini sang mga 65 C.E., sang pagpanghingabot ni Nero. Grabe ang pagpaantos sa mga bilanggo sadto kag nahibaluan ni Pablo nga madali na lang sia patyon. (2 Tim. 1:16; 4:6) Gani, maintiendihan naton kon ngaa gintugon gid niya ang iya mga linukot. Bisan pa bug-os ang iya pagsalig nga nakapakig-away na sia sing maayo tubtob sa katapusan, gusto niya gihapon palig-unon ang iya pagtuo paagi sa pagtuon sa Pulong sang Dios.

Mahimo nga sa Efeso pa si Timoteo sang nabaton niya ang sulat ni Pablo. (1 Tim. 1:3) Mga 1,600 kilometros halin sa Efeso pa Roma kon sa Troas mag-agi. Sa amo man nga sulat, ginsugo ni Pablo si Timoteo: “Himua ang imo bug-os nga masarangan nga makaabot antes ang tigtulugnaw.” (2 Tim. 4:21) Wala ginsambit sa Biblia kon bala nakakita si Timoteo sing barko nga masakyan, kag nakaabot sa Roma antes ang tigtulugnaw.

Ano ang matun-an naton gikan sa pagpangabay ni Pablo sang “mga linukot, ilabi na ang mga pergamino”? Padayon niya nga ginhandum ang Pulong sang Dios bisan sa iya labing mabudlay nga kahimtangan. Indi bala maathag nga amo ini ang rason kon ngaa padayon sia nga mapagsik sa espirituwal kag makapalig-on sa iban?

Bulahan gid kita kon may kompleto kita nga Biblia! Ang iban sa aton may pila pa gani ka kopya kag sarisari nga edisyon. Kaangay ni Pablo, dapat palambuon naton ang gana sa madalom nga paghangop sa Kasulatan. Nakapribilehiyo si Pablo nga magsulat sang 14 ka inspirado nga tulun-an kag ang katapusan sini amo ang iya ikaduha nga sulat kay Timoteo. Sa hingapusan nga bahin sini ginsambit niya ang iya pangabay. Ang matuod, isa sa katapusan niya nga mga panugontugon ang pangabay niya kay Timoteo nga ‘dal-on ang mga linukot, ilabi na ang mga pergamino.’

Handum mo bala nga tapuson ang imo maayo nga pagpakig-away sa pagtuo tubtob sa katapusan pareho ni Pablo? Luyag mo bala nga mangin mapagsik sa espirituwal kag aktibo sa pagbantala samtang ginapahanugot pa ini sang Ginuo? Kon amo, ngaa indi mo paghimuon ang ginpalig-on ni Pablo sa mga Cristiano? “Hatagi sang dalayon nga igtalupangod ang imo kaugalingon kag ang imo panudlo” paagi sa pagtuon sa Biblia. Mas mahapos ini tun-an kag kombeniente sangsa mga linukot, kag matigayon na sang madamo nga tawo subong.—1 Tim. 4:16.

[Mapa/Mga Retrato sa pahina 18, 19]

(Para sa aktual nga pormat, tan-awa ang publikasyon)

Efeso

Troas

Roma