Magdiretso sa kaundan

Magdiretso sa listahan sang kaundan

Tahura ang mga Nagapangabudlay sing Lakas sa Tunga Ninyo

Tahura ang mga Nagapangabudlay sing Lakas sa Tunga Ninyo

 Tahura ang mga Nagapangabudlay sing Lakas sa Tunga Ninyo

“Tahuron ang mga nagapangabudlay sing lakas sa tunga ninyo kag nagadumala sa inyo sa Ginuo kag nagalaygay sa inyo.”—1 TES. 5:12.

1, 2. (a) Ano ang sitwasyon sa kongregasyon sang Tesalonica sang ginsulat ni Pablo ang iya una nga sulat sa ila? (b) Ano ang ginpalig-on ni Pablo nga himuon sang mga taga-Tesalonica?

HANDURAWA nga katapo ka sang kongregasyon sang Tesalonica sang unang siglo, ang isa sa nauna nga mga kongregasyon sa Europa. Nagtener diri si Pablo agod palig-unon ang mga kauturan. Mahimo nagtangdo sia sang gulang nga mga lalaki nga manguna, subong sang ginahimo sa iban nga kongregasyon. (Binu. 14:23) Apang sa tapos matukod ang kongregasyon, nag-organisar ang mga Judiyo sang akig nga guban agod pahalinon sanday Pablo kag Silas sa siudad. Ang nabilin nga mga kauturan mahimo ginsubuan kag hinadlukan pa gani.

2 Sang makahalin na sia, natural lang nga nabalaka gid si Pablo sa bag-o lang natukod nga kongregasyon sa Tesalonica. Gintilawan niya nga magbalik, apang “ginbalabagan ni Satanas” ang iya banas. Gani ginpadala niya si Timoteo agod palig-unon ang kongregasyon. (1 Tes. 2:18; 3:2) Bangod sa maayo nga report ni Timoteo, ginsulatan ni Pablo ang mga taga-Tesalonica. Lakip sa iya ginsulat amo ang pagpalig-on nga ‘tahuron nila ang mga nagadumala sa tunga nila.’—Basaha ang 1 Tesalonica 5:12, 13.

3. Ngaa dapat gid tahuron sing daku sang mga Cristiano sa Tesalonica ang mga gulang?

3 Ang mga kauturan nga nagapanguna sa Tesalonica indi eksperiensiado kaangay nanday  Pablo kag sang iya mga kaupod; ukon pareho ka hangkilan sa mga gulang sa Jerusalem. Kay man, wala pa matuigan ang ila kongregasyon! Apang, dapat sila magpasalamat sa ila mga gulang nga “nagapangabudlay sing lakas” kag “nagadumala” sa kongregasyon kag “nagalaygay” sa mga kauturan. Gani, dapat gid nila ‘tahuron sing daku ining mga gulang tungod sa gugma.’ Ini nga pangabay ginsundan ni Pablo sang laygay nga “magpakighidait kamo sa isa kag isa.” Kon didto ka sa Tesalonica sadto, ipakita mo man bala ang hanuot nga apresasyon sa ginahimo sang mga gulang? Paano mo ginatamod ang “mga dulot nga mga lalaki” nga ginaaman sang Dios paagi kay Cristo sa inyo kongregasyon?—Efe. 4:8.

“Nagapangabudlay sing Lakas”

4, 5. Ngaa nagapangabudlay gid sing lakas ang mga gulang sa pagtudlo sa kongregasyon sang panahon ni Pablo, kag ngaa ginahimo man ini sang mga gulang subong?

4 Sang makalakat na sanday Pablo kag Silas pakadto sa Berea, paano ‘nagpangabudlay sing lakas’ ang mga gulang sa Tesalonica? Wala sing duhaduha nga gin-ilog nila si Pablo nga nagagamit sing Kasulatan sa pagtudlo sa kongregasyon. Mahimo ka mamangkot, ‘Ginaapresyar bala sang mga Cristiano sa Tesalonica ang Pulong sang Dios’? Siling sa Biblia “mas maayo ang panghunahuna sang mga [taga-Berea] sangsa mga taga-Tesalonica, . . . nga ginausisa sing maayo ang Kasulatan sa adlaw-adlaw.” (Binu. 17:11) Ang ginapaanggid sa sini nga teksto amo ang mga Judiyo sa Tesalonica kag indi ang mga Cristiano. Ang mga tumuluo ‘nagbaton sang pulong sang Dios, indi subong pulong sang mga tawo, kundi subong pulong sang Dios.’ (1 Tes. 2:13) Mahimo nga nangabudlay gid sing lakas ang mga gulang agod mapakaon sila sa espirituwal.

5 Sa karon, ang matutom kag mainandamon nga ulipon amo ang nagaaman sing “pagkaon sa nagakaigo nga tion” sa panong sang Dios. (Mat. 24:45) Sa panuytoy sang ulipon, nagapangabudlay sing lakas ang mga gulang agod mapakaon sa espirituwal ang ila kauturan. Bugana ang suplay sang mga literatura, kag sa pila ka lenguahe may yara pa gani Watch Tower Publications Index kag Watchtower Library sa CD-ROM. Para maaman ang kinahanglanon sang kongregasyon sa espirituwal, ginahandaan gid sang mga gulang ang ila mga bahin agod mahatag nila ini sing maayo. Nahunahuna mo na bala kon pila ka oras ang ginahinguyang sang mga gulang sa paghanda sang ila mga bahin sa mga miting, asembleya, kag mga kombension?

6, 7. (a) Ano nga halimbawa ang ginpahamtang ni Pablo sa mga gulang sa Tesalonica? (b) Ngaa mahimo mabudlay para sa mga gulang subong nga ilugon si Pablo?

6 Gindumdom gid sang mga gulang sa Tesalonica ang halimbawa ni Pablo sa pagbantay sa panong. Wala niya ini ginhimo bangod lamang sa obligasyon ukon rutina. Subong sang ginbinagbinag sa nagligad nga artikulo, si Pablo “nangin malulo . . . , subong sang nagabatiti nga iloy nga nagapalangga sang iya kaugalingon nga mga anak.” (Basaha ang 1 Tesalonica 2:7, 8.) Handa pa gani sia nga ‘ipaambit ang iya kaugalingon nga kalag’! Dapat gid sia ilugon sang mga gulang sa ila pagbantay sa panong.

7 Ginailog sang Cristianong mga manugbantay ang pagpalangga ni Pablo sa panong. Kinaandan na nga may mga karnero nga nagapasaway kag maila. Pero ginatinguhaan gid sang mga gulang nga pangitaon ang ‘maayo’ sa ila. (Hulu. 16:20) Matuod, mahimo nabudlayan man ang gulang nga tamdon sing positibo ang kada isa kay sia mismo indi man himpit. Apang, samtang ginatinguhaan niya nga mangin malulo sa tanan, indi bala nagakabagay nga dayawon sia sa iya panikasog nga mangin maayo nga manugbantay sa idalom ni Cristo?

8, 9. Sa ano nga mga paagi nga ‘ginabantayan sang mga gulang subong ang aton kalag’?

8 May rason gid kita nga “mangin mapinasakupon” sa mga gulang. Suno kay Pablo, ‘ginabantayan nila ang aton kalag.’ (Heb. 13:17) Ini nga ekspresyon nagapahanumdom sa aton sang manugbantay sang karnero nga nagapulaw para maamligan ang iya panong. Ang mga  gulang sa karon mahimo indi man makatulog kon may problema sa pisikal, emosyonal, kag espirituwal ang mga kauturan. Halimbawa, ang mga gulang sa mga Hospital Liaison Committee ginapukaw kon may mga problema parte sa medikal. Kon kita ang yara sa amo sini nga sitwasyon, pasalamatan gid naton ang ila bulig!

9 Ang mga gulang sa mga Regional Building Committee kag sa mga relief committee nagapanikasog sing lakas agod buligan ang mga kauturan. Takus gid sila sang aton kinabubut-on nga pagsakdag! Binagbinaga ang bulig nga ginhimo pagkatapos sang Bagyo Nargis sa Myanmar sang 2008. Agod makalab-ot sa kongregasyon sang Bothingone sa naapektuhan gid nga rehiyon sang Irrawaddy Delta, ang isa ka relief team dapat mag-agi sa guba nga mga alagyan nga may nagalinapta nga mga bangkay. Sang nag-abot ang una nga relief team sa Bothingone kag nakita sang kauturan nga ara ang ila manugtatap sang sirkito sadto, nagsiling sila: “Ara ang aton C.O.! Ginluwas kita ni Jehova!” Ginaapresyar mo bala ang adlaw-gab-i nga pagpangabudlay sang mga gulang? Ang pila ka gulang gintangdo sa pinasahi nga mga komite agod mag-uyat sing mabudlay nga hudisyal nga mga kaso. Ini nga mga gulang wala nagapabugal sang ila nahimo; apang ang mga nagabenepisyo sa sini nagapasalamat gid sa ila.—Mat. 6:2-4.

10. Ano nga mga hilikuton sang mga gulang ang daw indi naton matalupangdan?

10 May iban pa gid nga hilikuton ang mga gulang. Halimbawa, ang koordenitor sang hubon sang mga gulang amo ang nagahanda sang mga iskedyul sang mga miting. Ang sekretaryo ang nagatipon sang mga report kada bulan kag para sa bug-os nga tuig. Ang manugtatap sang eskwelahan amo ang nagahanda sing maayo sang iskedyul para sa sini. Kada tatlo ka bulan, ginaawdit ang rekord sang kongregasyon. Ang mga gulang man ang nagabasa sang mga sulat halin sa sanga talatapan kag ginasunod ang panuytoy nga makabulig sa “pag-isa sa pagtuo.” (Efe. 4:3, 13) Bangod sa panikasog sang mapisan nga mga gulang, nahimo ang “tanan nga butang sing disente kag suno sa kahimusan.”—1 Cor. 14:40.

“Nagadumala sa Inyo”

11, 12. Sin-o ang nagadumala sa kongregasyon, kag ano ang nalakip sa sini?

11 Ginlaragway ni Pablo ang mga gulang sa Tesalonica nga nagapangabudlay sing lakas subong “nagadumala” sa kongregasyon. Ang orihinal nga tinaga sini nagapahangop sang “pagtindog sa atubangan” kag sarang mabadbad nga “nagatuytoy; nagapanguna sa tunga.” (1 Tes. 5:12) Suno kay Pablo ini man nga mga gulang “nagapangabudlay sing lakas.” Ang ginapatuhuyan niya indi lang ang “nagadumala nga manugtatap,” kundi ang tanan nga gulang sa kongregasyon. Ang kalabanan nga gulang karon nagatindog sa atubangan sang kongregasyon kag nagadumala sang mga miting. Ang bag-o nga pagtawag nga “koordenitor sang hubon sang mga gulang” nagabulig sa aton nga tamdon ang tanan nga gulang subong mga miembro sang nahiusa nga hubon.

12 Ang “nagadumala” sa kongregasyon wala lamang nagatudlo. Ini nga ekspresyon gingamit man sa 1 Timoteo 3:4. Suno kay Pablo ang manugtatap “isa ka lalaki nga nagadumala sang iya panimalay sa maayo nga paagi, may mga anak nga nagapasakop upod ang bug-os nga pagkaserioso.” Ginapakita sini nga ang “nagadumala” wala lamang nagatudlo sa iya kabataan kundi nagapanguna man sa pamilya kag “may mga anak nga nagapasakop.” Huo, ang mga gulang ang nagapanguna sa kongregasyon agod ang tanan magpasakop kay Jehova.—1 Tim. 3:5.

13. Ngaa mahimo nagakinahanglan sing tion antes makadesisyon ang mga gulang sa ila miting?

13 Agod madumalahan sing maayo ang panong, ginamitingan sang mga gulang kon ano ang kinahanglanon sang kongregasyon kag kon ano ang dapat nila himuon. Madasig kuntani kon isa lang ka gulang ang nagadesisyon. Apang bilang pag-ilog sa halimbawa sang nagadumala nga hubon sang unang siglo, ang mga hubon sang mga gulang karon nagamiting kag nagabinagbinag  sing maayo sang panuytoy sang Kasulatan. Tulumuron nila nga iaplikar ang mga prinsipio sang Biblia sa mga kinahanglanon sang kongregasyon. Epektibo gid ini kon handaan sang kada gulang ang ila mga miting, nga ginabinagbinag ang Kasulatan kag mga panuytoy gikan sa matutom kag mainandamon nga ulipon. Siempre nagakinahanglan ini sang tion. Kon may magkatuhay nga opinyon, subong sang natabo sang unang siglo sang ginbinagbinag sang nagadumala nga hubon ang isyu parte sa pagtuli, dugang nga tion kag pagpanalawsaw ang kinahanglan agod makadesisyon pasad sa Kasulatan.—Binu. 15:2, 6, 7, 12-14, 28.

14. Nagapasalamat ka bala nga ang hubon sang mga gulang nagabuligay sing nahiusa? Ngaa amo sina ang imo nabatyagan?

14 Ano ang matabo kon ipilit sang isa ka gulang ang iya luyag ukon impluwensiahan ang iban sang iya opinyon? Ukon ano abi kon may isa nga kaangay ni Diotrefes sang unang siglo, nga magtuga sang pagbinangig? (3 Juan 9, 10) Pat-od gid nga magaantos ang kongregasyon. Kon gingamo ni Satanas ang kongregasyon sang unang siglo, sigurado gid nga gusto man niya nga gamuhon ang kongregasyon subong. Mahimo niya gamiton ang tawhanon nga huyog subong sang handum nga mangin prominente. Gani, dapat gid palambuon sang mga gulang ang pagkamapainubuson kag magbuligay subong isa ka nahiusa nga hubon. Ginaapresyar gid naton ang pagkamapainubuson sang mga gulang nga nagabuligay subong isa ka hubon!

“Nagalaygay sa Inyo”

15. Ano ang motibo sang mga gulang sa paglaygay sa mga utod?

15 Ginpadaku man ni Pablo ang mabudlay apang importante nga hilikuton sang mga  gulang: ang paglaygay sa panong. Sa Cristianong Griegong Kasulatan, si Pablo lang ang naggamit sang Griegong tinaga nga ginbadbad “laygay.” Mahimo magpatuhoy ini sa mabaskog nga laygay apang wala nagapangakig. (Binu. 20:31; 2 Tes. 3:15) Halimbawa, si Pablo nagsulat sa Corinto: “Ginasulat ko ini nga mga butang, indi agod pakahuy-an kamo, kundi agod laygayan kamo subong akon hinigugma nga mga anak.” (1 Cor. 4:14) Nagalaygay sia bangod sang iya kabalaka sa mga kauturan.

16. Ano ang dapat dumdumon sang mga gulang kon nagalaygay sila?

16 Ginadumdom sang mga gulang nga ang ila paagi sa paglaygay importante gid. Ginatinguhaan nila nga ilugon si Pablo nga malulo, mahigugmaon, kag mabinuligon. (Basaha ang 1 Tesalonica 2:11, 12.) Huo, ang mga gulang ‘nagapanguyapot sing malig-on sa masaligan nga pulong agod makalaygay sila paagi sa panudlo nga makapapagros.’—Tito 1:5-9.

17, 18. Ano ang dapat mo dumdumon kon ginalaygayan ka sang gulang?

17 Ang mga gulang indi man himpit kag kon kaisa makahambal sila sang mga butang nga ginahinulsulan nila. (1 Hari 8:46; Sant. 3:8) Nahibaluan man sang mga gulang nga ang pagbaton sang laygay ‘indi makalilipay kundi makapasubo’ sa ila espirituwal nga mga kauturan. (Heb. 12:11) Gani, antes laygayan sang gulang ang isa ka utod, nagapamensar sia anay sing maayo kag nagapangamuyo. Kon ikaw ang ginalaygayan, ginaapresyar mo bala ang mahigugmaon nga kabalaka sang gulang?

18 Halimbawa, may balatian ka nga daw indi maisplekar sang medisina. Dayon natukiban ini sang isa ka doktor, apang daw kabudlay sini batunon. Maakig ka bala sa doktor? Indi! Bisan pa manugda sia nga operahan ka, mahimo nga mapasugot ka kay nagapati ka nga para ini sa imo kaayuhan. Mahimo makaapektar sa imo ang paagi sang doktor sa pagsugid, apang amo bala ini ang basihan mo sang imo desisyon? Indi. Sing kaanggid, indi pagtuguti nga ang paagi sa paglaygay ang magapugong sa imo nga pamatian ang ginagamit ni Jehova kag ni Jesus sa pagbulig kag sa pag-amlig sa imo sa espirituwal.

Apresyaha ang Gin-aman ni Jehova nga mga Gulang

19, 20. Paano naton mapakita ang aton apresasyon sa “mga dulot nga mga lalaki”?

19 Ano ang himuon mo kon makabaton ka sing regalo nga gindesinyo para gid sa imo? Ipakita mo bala ang imo apresasyon paagi sa paggamit sini? Ang “mga dulot nga mga lalaki” amo ang gin-aman ni Jehova paagi kay Jesucristo para sa imo. Mapakita mo ang apresasyon sa sini nga mga dulot kon pamatian mo sing maayo ang ila mga pamulongpulong kag tinguhaan nga iaplikar ini. Ang isa pa amo ang pagkomento sing makapalig-on sa mga miting kag pagsakdag sa hilikuton nga ginapangunahan sang mga gulang, subong sang ministeryo sa latagon. Kon nakabenepisyo ka sa laygay sang isa ka gulang, isugid ini sa iya. Dugang pa, pasalamati ang iya pamilya. Dumduma nga agod makapangabudlay sing maayo ang gulang sa kongregasyon, ginasakripisyo sang pamilya ang tion nga para kuntani sa ila.

20 Huo, madamo kita sing rason nga magpasalamat sa mga gulang nga nagapangabudlay sing lakas, nagadumala, kag nagalaygay sa aton. Ining “mga dulot nga mga lalaki” mahigugmaon gid nga aman ni Jehova!

Madumduman Mo Bala?

• Sa ano nga mga rason dapat apresyahon sang mga Cristiano sa Tesalonica ang nagapanguna sa ila?

• Paano nagapangabudlay sing lakas ang mga gulang sa inyo kongregasyon para sa imo?

• Paano ka nakabenepisyo sa pagdumala sang mga gulang?

• Kon ginalaygayan ka sang gulang, ano ang dapat mo dumdumon?

[Mga Pamangkot sa Pagtinuon]

[Retrato sa pahina 27]

Ginaapresyar mo bala ang mga paagi sang mga gulang sa pagbantay sa kongregasyon?