Magdiretso sa kaundan

Magdiretso sa listahan sang kaundan

Ginarekomendar sang Dios ang Iya Gugma sa Aton

Ginarekomendar sang Dios ang Iya Gugma sa Aton

 Ginarekomendar sang Dios ang Iya Gugma sa Aton

“Ang wala tupong nga kaayo magagahom subong hari paagi sa pagkamatarong nga nagadul-ong sa kabuhi nga walay katapusan.”—ROMA 5:21.

1, 2. Anong duha ka dulot ang ginsambit, kag diin sa duha ang mas malahalon?

‘ANG labing daku nga palanublion nga ginabilin sang mga Romano sa nagabulos sa ila amo ang ila kasuguan kag ang pagkabuhi suno sa sini.’ (Dr. David J. Williams, University of Melbourne, Australia) Bisan matuod pa ini, may palanublion ukon dulot nga labaw pa sa sini. Ini nga dulot amo ang paagi sang Dios agod mabaton naton ang iya kahamuot kag ang matarong nga tindog sa iya atubangan kag ang paglaum nga kaluwasan kag kabuhi nga walay katapusan.

2 Buot silingon, may legal nga paagi ang Dios agod matigayon ini nga dulot. Sa Roma kapitulo 5, ginpakita ni Pablo nga indi lamang ini isa ka pormal ukon legal nga kasugtanan. Sa baylo, ginsugdan niya ini sa isa ka pasalig: “Ginpahayag kita nga matarong pasad sa pagtuo, [gani] huptan naton ang aton paghidait sa Dios paagi sa aton Ginuong Jesucristo.” Ang mga nakabaton sini nga dulot sang Dios napahulag nga balusan ang iya gugma, kag isa sa ila si Pablo. Sia nagsulat: “Ang gugma sang Dios ginpasagahay sa aton tagipusuon paagi sa balaan nga espiritu.”—Roma 5:1, 5.

3. Ano nga mga pamangkot ang nag-utwas?

3 Apang ngaa kinahanglan ining mahigugmaon nga dulot? Paano ini natanyag sang Dios sa makatarunganon kag walay pinasulabi  nga paagi? Kag ano ang dapat himuon sang indibiduwal agod matigayon ini? Binagbinagon naton ang sabat kag tan-awon kon paano sini ginapadaku ang gugma sang Dios.

Gugma sang Dios Batok sa Sala

4, 5. (a) Sa anong daku nga paagi ginpakita ni Jehova ang iya gugma? (b) Ano ang makabulig sa aton nga mahangpan ang Roma 5:12?

4 Bilang pagpakita sang daku nga gugma, ginpadala ni Jehova ang iya bugtong nga Anak agod buligan ang mga tawo. Amo sini ang ginsiling ni Pablo: “Ginarekomendar sang Dios ang iya mismo gugma sa aton amo nga samtang mga makasasala pa kita, si Cristo napatay para sa aton.” (Roma 5:8) Hunahunaa ang isa ka kamatuoran nga ginsambit: “Makasasala pa kita.” Dapat mahibaluan sang tanan kon paano kita nangin makasasala.

5 Ginpaathag ini ni Pablo, nga nagasiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Mahangpan naton ini bangod ginpasulat sang Dios kon paano nagsugod ang kabuhi. Gintuga ni Jehova sanday Adan kag Eva. Ang Manunuga himpit, amo man ang aton una nga mga ginikanan. Isa lamang ka butang ang gindumili sang Dios sa ila kag ginpahibalo sila nga kon supakon nila ini, mapatay sila. (Gen. 2:17) Apang ginpili nila nga supakon ang makatarunganon nga sugo sang Dios, kag ginsikway sia subong ang Manughatag sing Kasuguan kag ang Soberano.—Deut. 32:4, 5.

6. (a) Ngaa nagakapatay ang kaliwatan ni Adan, kag nagbag-o bala ini sang yara na ang Mosaikong Kasuguan? (b) Ano ang sarang mailustrar sang balatian nga hemophilia?

6 Indi na himpit si Adan sang nangin amay sia, gani ang iya kaliwatan nakapanubli sang sala kag sang mga epekto sini. Huo, ang ila sala indi pareho sang kay Adan, kay indi sila ang hungod nga naglapas sa sugo sang Dios kag wala pa sing kasuguan nga para sa ila. (Gen. 2:17) Apang napanubli nila gihapon ang sala ni Adan. Gani, ang sala kag kamatayon nagagahom na sang ginhatag sang Dios sa mga Israelinhon ang kasuguan, nga amo ang nagpamatuod nga sila tanan makasasala. (Basaha ang Roma 5:13, 14.) Ang epekto sang napanubli nga sala mailustrar sa ginapanubli nga balatian pareho sang Mediterranean anemia ukon hemophilia. Mahimo nabasa ninyo nga ang anak nga lalaki ni Hari Nicholas II kag Alexandra sang Rusya nga si Alexis nakapanubli sang hemophilia. Huo, bisan pa gani sa mga pamilya nga may amo sini nga balatian, may mga bata nga indi mag-antos sa sini bisan pa nga mahimo yara ini sa ila dugo. Pero, indi amo sini ang sala nga halin kay Adan kay wala sing makalikaw sa epekto sini. Ginagamhan kita sini. Makamamatay ini kag napanubli sang tanan. Malampuwasan pa bala ini?

Ang Gin-aman sang Dios Paagi kay Jesucristo

7, 8. Paano nangin magkatuhay ang dalanon sang duha ka himpit nga tawo?

7 May mahigugmaon nga aman si Jehova para maluwas ang mga tawo sa napanubli nga sala. Ginpaathag ni Pablo nga posible ini paagi sa isa pa ka himpit nga tawo, ang ikaduha nga Adan. (1 Cor. 15:45) Apang ang dalanon sining duha ka himpit nga tawo may magkatuhay nga resulta. Paano?—Basaha ang Roma 5:15, 16.

8 Si Pablo nagsulat: “Ang resulta sang dulot indi kaangay sa resulta sang paglapas.” Naglapas si Adan, gani natigayon niya ang makatarunganon kag mabug-at nga pamatbat—napatay sia. Pero indi lang sia ang napatay. Aton mabasa: “Bangod sa paglapas sang isa ka tawo madamo ang napatay.” Ang kaliwatan ni Adan, lakip kita, dapat mapatay bangod nakapanubli man sang sala. Apang makalilipay mahibaluan nga ini nga sitwasyon mabag-o sang himpit nga tawo, si Jesus. Ano ang mangin resulta sini? Ang sabat amo ang ginsambit ni Pablo nga “pagpahayag nga matarong sa tanan nga sahi sang tawo para sa kabuhi.”Roma 5:18.

9. Suno sa Roma 5:16, 18, paano ginpahayag sang Dios nga matarong ang tanan nga sahi sang tawo?

 9 Ano ang kahulugan sang Griego nga mga tinaga nga ginhalinan sang ekspresyon nga “pagpahayag nga matarong”? Ang isa ka manugbadbad sang Biblia nagsulat: “Ginalaragway sini ang nagakatabo sa korte. Nagapatuhoy ini sa pagbag-o sang pagtamod sang Dios sa isa ka tawo, indi sa pagbag-o nga ginhimo sang tawo . . . Ginapaanggid sini ang Dios subong hukom nga nagpamatbat sing pabor sa ginsumbong, nga malaragwayon nga ginbista sa hukmanan sang Dios sa sala nga pagkadimatarong. Apang ginhilway sang Dios ang ginsumbong.”

10. Ano ang ginhimo ni Jesus nga nangin basihan agod mapahayag nga matarong ang mga tawo?

10 Ano ang basihan sang matarong nga “Hukom sang bug-os nga duta” sa paghilway sa di-matarong nga tawo? (Gen. 18:25) Una, ginpadala sang mahigugmaon nga Dios ang iya bugtong nga Anak sa duta. Gintuman ni Jesus ang kabubut-on sang iya Amay sa himpit nga paagi, bisan pa sa mga pagsulay, tuman nga pagyaguta, kag pagpaantos. Ginhuptan niya ang iya integridad tubtob sa iya kamatayon sa usok sang pag-antos. (Heb. 2:10) Sa paghalad sang iya himpit nga kabuhi, ginhatag ni Jesus ang gawad nga mahimo maghilway, ukon magtubos, sa kaliwatan ni Adan gikan sa sala kag kamatayon.—Mat. 20:28; Roma 5:6-8.

11. Ano ang gintumbasan sang gawad?

11 Sa iban nga teksto, gintawag ini ni Pablo nga “katumbas nga gawad.” (1 Tim. 2:6) Ano ang dapat tumbasan? Bangod kay Adan napanubli sang tanan niya nga kaliwatan ang pagkadihimpit kag kamatayon. Bilang himpit nga tawo, posible nga mangin Amay si Jesus sang binilyon ka himpit nga kaliwatan. * Gani, ginhangop sadto nga ang kabuhi ni Jesus kag sang iya posible nga himpit nga kaliwatan amo ang mangin gawad nga katumbas ni Adan kag sang iya di-himpit nga kaliwatan. Apang wala magsiling ang Biblia nga ang posible nga mangin kaliwatan ni Jesus bahin sang gawad. Ginpadaku sang Roma 5:15-19 nga ang kamatayon sang “isa ka tawo” amo ang makahatag sing kahilwayan. Huo, ang himpit nga kabuhi ni Jesus amo ang katumbas sang kay Adan. Gani, si Jesucristo lamang ang ginapatuhuyan sini. Pero puede matigayon sang tanan nga sahi sang tawo ang wala bayad nga dulot kag kabuhi bangod sang “isa ka buhat sang pagpakamatarong” ni Jesus paagi sa iya pagkamatinumanon kag integridad tubtob kamatayon. (2 Cor. 5:14, 15; 1 Ped. 3:18) Paano?

Kahilwayan Pasad sa Gawad

12, 13. Ngaa kinahanglan sang mga ginpahayag nga matarong ang kaluoy kag gugma sang Dios?

12 Ginbaton ni Jehova nga Dios ang halad gawad sang iya Anak. (Heb. 9:24; 10:10, 12) Apang ang mga disipulo ni Jesus, lakip ang iya matutom nga mga apostoles, indi gihapon himpit. Bisan pa ginatinguhaan nila nga indi makasala, pirme sila nagakapaslawan. Ngaa?  Bangod nakapanubli sila sang sala. (Roma 7:18-20) Apang may ginhimo ang Dios parte sa sini. Ginbaton niya ang “katumbas nga gawad” kag handa sia nga ipadapat ang mga benepisyo sini sa iya mga alagad.

13 Wala ini ginhimo sang Dios bangod sa maayo nga binuhatan sang mga apostoles kag sang iban pa. Sa baylo, ginhimo niya ini bangod sang iya kaluoy kag daku nga gugma. Ginhilway niya ang mga apostoles kag ang iban pa sa pamatbat nga kamatayon kag sa napanubli nga sala. Si Pablo nagpaathag: “Sa pagkamatuod, paagi sa sining wala tupong nga kaayo ginluwas kamo paagi sa pagtuo; kag indi ini bangod sa inyo, dulot ini sang Dios.”—Efe. 2:8.

14, 15. Ano nga padya ang nagahulat sa mga ginpahayag sang Dios nga matarong, apang ano anay ang dapat nila himuon?

14 Daw ano nga dulot sang Labing Gamhanan nga patawaron ang napanubli nga sala sang isa kag ang tanan niya nga kasaypanan! Indi maisip ang sala nga nahimo sang isa antes mangin Cristiano, apang bangod sa gawad, mahimo ini patawaron sang Dios. Si Pablo nagsulat: “Ang dulot bangod sa madamo nga paglapas nagresulta sa pagpahayag nga matarong sa madamo.” (Roma 5:16) Ang mga apostoles kag ang iban pa nga nakabaton sining mahigugmaon nga dulot (nga ginpahayag nga matarong) dapat magpadayon sa pagsimba sa matuod nga Dios nga may pagtuo. Ano ang padya sini? “Ang mga nagabaton sang bugana nga wala tupong nga kaayo kag wala bayad nga dulot sang pagkamatarong mabuhi kag magagahom subong mga hari paagi sa isa ka tawo, si Jesucristo.” Sa pagkamatuod, ang resulta sang dulot sang pagkamatarong amo ang kabuhi.—Roma 5:17; basaha ang Lucas 22:28-30.

15 Ang mga nakabaton sang dulot, nga ginpahayag nga matarong, nangin espirituwal nga mga anak sang Dios. Subong masigkamanunubli ni Cristo, may paglaum sila nga mabanhaw sa langit bilang espiritu nga mga anak nga “magagahom subong mga hari” kaupod ni Jesucristo.—Basaha ang Roma 8:15-17, 23.

Ginpadapat sang Dios ang Iya Gugma sa Iban

16. Paano makabaton sing dulot ang mga may paglaum nga mabuhi sa duta bisan subong pa lang?

16 Indi tanan nga nagatuo kag nagaalagad sa Dios subong matutom nga mga Cristiano “magagahom subong mga hari” upod kay Cristo sa langit. Madamo ang may pasad sa Biblia nga paglaum nga pareho sa ginalauman sang mga alagad sang Dios antes sang panahon sang mga Cristiano. Nagalaum sila nga mabuhi sing dayon sa paraiso nga duta. Makabaton man bala sila sing mahigugmaon nga dulot sang Dios kag makabig nga matarong bisan subong pa lang, samtang nagahulat sang ila paglaum? Suno sa ginsulat ni Pablo sa Roma, huo!

17, 18. (a) Bangod sa pagtuo ni Abraham, paano sia gintamod sang Dios? (b) Ngaa ginkabig ni Jehova nga matarong si Abraham?

17 Ginsambit ni Pablo ang panguna nga halimbawa, ang matutom nga si Abraham. Nagkabuhi sia antes mahatag ni Jehova ang kasuguan sa Israel kag madugay pa antes ginbuksan ni Cristo ang paglaum sa langitnon nga kabuhi. (Heb. 10:19, 20) Aton mabasa: “Kay ang saad kay Abraham ukon sa iya binhi nga mangin manunubli sia sang kalibutan indi paagi sa kasuguan, kundi paagi ini sa pagkamatarong bangod sa pagtuo.” (Roma 4:13; Sant. 2:23, 24) Gani, ginkabig sang Dios nga matarong ang matutom nga si Abraham.—Basaha ang Roma 4:20-22.

18 Indi buot silingon nga sa sulod sang mga dekada nga pag-alagad ni Abraham kay Jehova wala sia makasala. Indi amo sina ang buot silingon sang iya pagkamatarong. (Roma 3:10, 23) Paagi sa wala tupong nga kaalam ni Jehova, gintalupangod niya ang tumalagsahon nga pagtuo kag mga buhat ni Abraham. Nagtuo si Abraham nga ang ginsaad nga “binhi” magahalin sa iya kaliwatan. Ini nga Binhi amo ang Mesias, ukon Cristo. (Gen. 15:6; 22:15-18) Gani, pasad sa “gawad nga ginbayad ni Cristo Jesus,” ang balaan nga Hukom makapatawad sang mga sala nga ginhimo sang nagligad. Amo nga si Abraham kag ang iban pa nga mga matutom antes sang  panahon sang mga Cristiano may paglaum nga mabanhaw.—Basaha ang Roma 3:24, 25; Sal. 32:1, 2.

Tigayuna ang Matarong nga Tindog Subong

19. Ngaa ang pagtamod sang Dios kay Abraham makalilipay gid para sa madamo subong?

19 Gintamod sang Dios sang gugma nga matarong si Abraham, kag makalilipay gid ini para sa mga Cristiano subong. Ang pagpahayag ni Jehova sa iya nga matarong indi pareho sa mga hinaplas sang espiritu nga mangin “kaupod nga mga manunubli ni Cristo.” Ining limitado nga grupo “gintawag agod mangin mga balaan” kag ginbaton subong “mga anak sang Dios.” (Roma 1:7; 8:14, 17, 33) Apang, ginkabig si Abraham nga “abyan ni Jehova” antes pa ginhalad ang gawad. (Sant. 2:23; Isa. 41:8) Kamusta naman ang matuod nga mga Cristiano nga may paglaum nga magpuyo sa ginpasag-uli nga Paraiso sa duta?

20. Ano ang ginapaabot sang Dios sa mga tawo karon nga ginatamod niya nga matarong pareho kay Abraham?

20 Ini sila wala makabaton sang “wala bayad nga dulot sang pagkamatarong” nga may paglaum nga mabuhi sa langit “paagi sa paghilway paagi sa gawad nga ginbayad ni Cristo Jesus.” (Roma 3:24; 5:15, 17) Pero, nagatuo gid sila sa Dios kag sa iya mga aman, kag ginapakita nila ang ila pagtuo paagi sa maayong mga buhat. Ang isa sini amo ang ‘pagbantala sang ginharian sang Dios kag pagpanudlo nahanungod kay Ginuong Jesucristo.’ (Binu. 28:31) Gani, mahimo sila tamdon ni Jehova nga matarong pareho ni Abraham. Ang dulot nga mabaton nila—ang pagpakig-abyan sang Dios—tuhay sa “wala bayad nga dulot” nga mabaton sang mga hinaplas. Pero ginapasalamatan gid nila ini nga dulot.

21. Ano nga mga benepisyo ang matigayon bangod sang gugma kag hustisya ni Jehova?

21 Kon nagalaum ka nga mabuhi sing dayon sa duta, dapat mo tandaan nga ini nga paglaum indi bangod sa pagpanikasog sang tawhanon nga gumalahom. Sa baylo, nagapakita ini sang maalam nga katuyuan sang Soberano sang Uniberso. Naghimo si Jehova sing amat-amat nga mga tikang agod matuman ini nga katuyuan. Ini nga mga tikang nahisuno sa matuod nga hustisya kag labaw sa tanan, sa daku nga gugma sang Dios. Husto gid ang ginsiling ni Pablo: “Ginarekomendar sang Dios ang iya mismo gugma sa aton amo nga samtang mga makasasala pa kita, si Cristo napatay para sa aton.”—Roma 5:8.

[Nota]

^ par. 11 Halimbawa, ini nga pagtamod tuhoy sa kaliwatan ukon kaliwat mabasa sa Insight on the Scriptures, Tomo 2, pahina 736, parapo 4 kag 5.

Madumduman Mo Bala?

• Ano ang napanubli sang kaliwatan ni Adan, kag ano ang resulta?

• Paano gin-aman ang katumbas nga gawad, kag sa ano nga kahulugan nangin katumbas ini?

• Ano nga paglaum ang mahatag sa imo sang dulot nga pagpahayag nga matarong?

[Mga Pamangkot sa Pagtinuon]

[Retrato sa pahina 13]

Ang himpit nga tawo nga si Adan nakasala. Ang himpit nga tawo nga si Jesus nag-aman sang “katumbas nga gawad”

[Retrato sa pahina 15]

Isa gid ka maayong balita—paagi kay Jesus mapahayag kita nga matarong!