Mga Amot nga Nagapahalipay sa Dios

INDI ini isa ka matahom nga sugilanon. Gin-agaw ni Reyna Atalia ang trono sang Juda paagi sa paglimbong kag pagpatay. Ginproklamar niya ang iya kaugalingon nga reyna bangod abi niya, ginpamatay na ang tanan nga lehitimo nga manunubli. Maisugon nga gintago ni prinsesa Josaba, isa ka babayi nga nagahigugma gid kay Jehova kag sa iya Kasuguan, si Jehoas, ang lapsag nga anak sang hari. Gintago ni Josaba kag sang Mataas nga Saserdote nga si Jehoiada, nga iya bana, ang manunubli sang trono sa ila hulot sa templo sing anom ka tuig.​​—⁠2 Hari 11:​1-3.

Sang magpito na ka tuig si Jehoas, nakahanda na ang Mataas nga Saserdote nga si Jehoiada nga tumanon ang iya plano nga pahalinon sa trono ang nang-agaw nga reyna. Ginpagua niya ang gintago nga bata kag ginkoronahan subong ang may kinamatarong nga manunubli sang ginharian. Dayon ginguyod sang mga guardia ang malaut nga si Reyna Atalia pagua sa templo kag ginpatay, sa daku nga kaumpawan kag kalipay sang mga tawo. Bangod sang ila ginhimo, daku gid ang nabulig nanday Jehoiada kag Josaba sa pagpasag-uli sang matuod nga pagsimba sa Juda. Apang labi pa ka importante, nakabulig sila agod mapadayon ang harianon nga kaliwat ni David, nga magadul-ong sa Mesias.​​—⁠2 Hari 11:​4-​21.

Ang bag-ong ginpalingkod nga hari dapat may himuon man agod mapahalipay ang Dios. Ang balay ni Jehova kinahanglan gid kay-uhon. Ang sobra nga pagkaambisyosa ni Atalia nga masolo ang paggahom sa Juda wala lamang nagresulta sa pagpatumbaya sa templo kundi sa pag-ati man sa sini. Gani, determinado si Jehoas nga patindugon liwat kag kay-uhon ang templo. Nagsugo sia gilayon nga magtipon sing kuarta para sa pagpakay-o sang balay ni Jehova. Nagsiling sia: “Ang tanan nga kuarta para sa balaan nga dulot nga gindala sa balay ni Jehova, ang kuarta nga gintangdo sa kada isa, ang kuarta para sa kalag suno sa bili sang indibiduwal, ang tanan nga kuarta nga tinagipusuon nga gindala sang kada isa sa balay ni Jehova, kuhaon sang mga saserdote para sa ila kaugalingon, ang tagsa gikan sa iya kilala; kag kay-uhon nila ang mga litik sang balay bisan diin nga may makita nga mga litik.”​​—⁠2 Hari 12:​4, 5.

Ang mga tawo kinabubut-on nga nag-amot. Apang, ang mga saserdote pakulahaw sa pagtuman sang ila katungdanan sa pagpakay-o sang templo. Gani, namat-od ang hari nga sia na mismo ang magadumala kag nagsugo nga ang tanan nga amot ihulog direkta sa isa ka pinasahi nga kahon. Gintangduan niya si Jehoiada nga maghimo sing kahon, kag ang rekord nagasiling: “Si Jehoiada nga saserdote nagkuha sing kaban kag nagbuho sa takop sini kag ginbutang ini sa luyo sang halaran sa tuo nga kilid kon magsulod ang isa ka tawo sa balay ni Jehova, kag didto ginbutang sang mga saserdote, nga mga manugbantay sang gawang, ang tanan nga kuarta nga ginsulod sa balay ni Jehova. Kag kon makita nila nga may madamo na nga kuarta sa kaban, nagataklad ang sekretaryo sang hari kag ang mataas nga saserdote kag ginaputos nila ini kag ginaisip ang kuarta nga nakita sa balay ni Jehova. Kag ang kuarta nga naisip ginahatag nila sa mga kamot sang mga nagahimo  sing buluhaton nga gintulinan sa balay ni Jehova. Nian ginabayad nila ini sa mga panday kag sa mga manugpatindog nga naghimo sang balay ni Jehova, kag sa mga kantero kag sa mga manugbasbas sing bato, kag agod ibakal sing tablon kag sang binasbasan nga bato sa pagpakay-o sang mga litik sa balay ni Jehova kag para sa tanan nga hinguyangon sa balay sa pagpakay-o sini.”​​—⁠2 Hari 12:​9-​12.

Ang mga tawo bug-os tagipusuon nga nag-amot. Ginpatindog liwat ang balay ni Jehova sang pagsimba agod padayon sia nga masimba sing dungganon. Sa amo, ang tanan nga gin-amot nga kuarta nagamit sing nagakaigo. Ginpat-od gid ini ni Hari Jehoas!

Sa karon, ginapat-od gid sang kitaon nga organisasyon ni Jehova nga ang tanan nga donasyon ginagamit sing nagakaigo sa pagpauswag sang pagsimba kay Jehova, kag ang matuod nga mga Cristiano nagaamot kaangay sang mga Israelinhon sang una​—⁠sing bug-os tagipusuon. Mahimo nga isa ikaw sa mga nakaamot agod mapauswag ang intereses sang Ginharian sang nagligad nga tuig sang pag-alagad. Tan-awon naton ang pila ka paagi kon paano gingamit ang imo mga amot.

PAGBALHAG

Ang masunod nga mga publikasyon gin-imprinta agod tun-an kag ipanagtag sa bug-os nga kalibutan:

• Libro: 47,490,247

• Bukleta: 6,834,740

• Brosyur: 167,854,462

• Kalendaryo: 5,405,955

• Magasin: 1,179,266,348

• Tract: 440,995,740

• Video: 3,168,611

Ang pag-imprinta ginahimo sa Aprika, Aminhan, Sentral, kag Bagatnan nga Amerika, Asia, Europa, kag mga isla nga pungsod sang Pasipiko​​—⁠sa 19 tanan ka mga pungsod.

“Ako si Katelyn May. Walo ka tuig ang edad. May $28 [U.⁠S.] ako, kag luyag ko ini ibulig sa pagbayad sa mga imprintahan. Ang inyo pinalangga, Katelyn.”

“Nag-istoryahanay ang amon pamilya nahanungod sa bag-o nga mga imprintahan. Ang amon 11 kag 9 anyos nga mga bata nagdonar man gikan sa ila sinuptan. Nalipay kami nga ipadala ang ila donasyon lakip sang amon.”

 PAGPATINDOG

Ang masunod amo ang pila sang mga proyekto sa pagpatindog nga ginhimo agod makabulig sa mga hilikuton sang mga Saksi ni Jehova:

• Kingdom Hall sa imol nga mga duog: 2,180

• Assembly Hall: 15

• Sanga talatapan: 10

• Bug-os tion nga internasyonal nga mga boluntaryo: 2,342

“Ang una nga miting sa amon bag-o nga Kingdom Hall ginhiwat sining talipuspusan sang semana. Nalipay gid kami nga nakatigayon sing maayo nga duog agod madayaw ang aton Amay, si Jehova nga Dios. Nagapasalamat kami kay Jehova kag sa inyo bangod sang inyo pagtalupangod sang amon mga kinahanglanon paagi sa pagpatindog sing madamo pa nga mga Kingdom Hall. Sa pagkamatuod, ang amon Kingdom Hall isa gid ka pagpakamaayo sa amon duog.”​​—⁠Chile.

“Nagapasalamat gid ang mga kauturan sa bulig sang organisasyon ni Jehova. Tubtob karon, ginaistoryahan gihapon namon ang amon makalilipay nga tion upod sa mga boluntaryo sa konstruksion.”​​—⁠Moldova.

“Sining karon lang ginselebrar namon nga mag-asawa ang amon ika-35 nga anibersaryo sa kasal. Sa baylo nga magregaluhay kami, namat-od kami nga ihatag ini kay Jehova kag sa iya organisasyon, kay kon indi bangod sa ila bulig, ayhan wala kuntani nagmadinalag-on ang amon pag-asawahay. Luyag namon ibulig ang kuarta sa sulod sang sobre sa pagpatindog sing Kingdom Hall sa isa sa imol nga mga pungsod.”

“Nakabaton ako sining karon lang sing palanublion, kag bangod ang akon mga ‘luyag’ diutay man lang kag ang akon ‘mga kinahanglanon’ mas diutay pa gid, luyag ko ibulig ang kuarta sa sulod sini nga sobre sa pagpatindog sing mga Kingdom Hall, nga ginakinahanglan gid sa madamo nga pungsod.”

 BULIG PARA SA MGA BIKTIMA SANG KALAMIDAD

Sa sining katapusan nga mga adlaw, ang mga kalamidad masami nga nagaabot sing hinali. Ginadugangan sang madamo nga mga Saksi ni Jehova ang ila mga amot agod mabuligan ang ila mga kauturan sa nasit-an nga mga duog. Bilang pahanumdom, ang mga amot nga ginahatag para sa bug-os kalibutan nga hilikuton ginagamit sa pagbulig sa mga nabiktima sang kalamidad. Ang masunod amo ang pila sang mga duog nga nabuligan sang mga Saksi ni Jehova ang mga biktima sang kalamidad:

• Aprika

• Asia

• Caribeano nga rehiyon

• Mga isla sa Pasipiko

“Nagapasalamat gid kami nga mag-asawa sa ginpadala ninyo nga bulig sang ginlambas kami sang unos. Naatopan na namon ang amon balay. Nalipay gid kami nga nagpadala kamo gilayon sang bulig.”

“Ako si Connor, 11 anyos. Sang nakita ko ang natabo sang nag-tsunami, luyag ko magbulig. Kabay nga makabulig ini sa aton mga kauturan.”

 PINASAHI NGA BUG-OS TION NGA MGA ALAGAD

Madamo nga mga Cristiano ang bug-os tion nga nagabantala sa latagon ukon nagaalagad sa mga puluy-an Bethel. Ang pila ka bug-os tion nga mga boluntaryo ginasuportahan sang boluntaryo nga mga kontribusyon. Ang pila sa sini amo ang masunod:

• Misyonero: 2,635

• Nagalakbay nga manugtatap: 5,325

• Bethelite: 20,092

“Bangod indi pa ako subong makaalagad sa Bethel [lima ka tuig nga bata nga lalaki], gusto ko ipadala ining kontribusyon upod ang daku nga gugma. Kon magdaku ako, makadto ako sa Bethel agod magtrabaho sing lakas.”

Pagpasanyog sa Pagtudlo sa Biblia

Ginsugo ni Jesucristo ang iya mga sumulunod nga “maghimo sing mga disipulo sa mga tawo sang tanan nga kapungsuran.” (Mateo 28:19) Bilang pagtuman sa iya sugo, ang mga Saksi ni Jehova masako nga nagabantala kag nagatudlo sang mensahe sang Biblia sa 235 ka kadutaan. Nagabalhag sila kag nagapanagtag sing mga literatura sa Biblia sa 413 ka hambal.

Sa pagkamatuod, ang pinakabilidhon nga maamot sang isa ka Cristiano agod mabuligan ang madamo nga tawo nga makatuon nahanungod sa Dios kag sa Iya katuyuan amo ang iya tion. Ang mga Saksi ni Jehova naghinguyang sang kapin nila nga tion kag kusog agod buligan ang ila mga isigkatawo. Maalwan man sila nga nag-amot sa pinansial, kag ang tanan nila nga amot, sa nanuhaytuhay nga paagi, nakabulig sa pagpakilala sang ngalan ni Jehova kag sa pagpahibalo sang iya katuyuan sa bug-os nga duta. Kabay nga padayon nga pakamaayuhon ni Jehova ining mga panikasog sa pagbulig sa iban nga makilala sia sing labi pa. (Hulubaton 19:17) Ining kahanda sa pagbulig nagapahalipay kay Jehova!​​—⁠Hebreo 13:​15, 16.

[Kahon sa pahina 28-30]

Mga Paagi sa Paghatag nga Ginpili sang Iban

MGA KONTRIBUSYON PARA SA BUG-OS KALIBUTAN NGA HILIKUTON

Madamo ang nagapain, ukon nagatigana, sing kantidad nga ginahulog nila sa mga kahon-alamutan nga may ngalan “Contributions for the Worldwide Work​—⁠Mateo 24:14.”

Kada bulan, ginapadala sang mga kongregasyon ini nga kantidad sa opisina sang mga Saksi ni Jehova sa ila mga pungsod. Ang boluntaryo nga mga donasyon nga kuarta mahimo man ipadala direkta sa Watch Tower Bible and Tract Society of the Philippines, Inc., P.O. Box 2044, 1060 Manila, ukon sa sanga talatapan sang mga Saksi ni Jehova nga nagapangalagad sa inyo pungsod. Ang mga tseke nga ginpadala sa sini nga adres dapat ipangalan sa “Watch Tower.” Mahimo man idonar ang mga alahas ukon iban pa malahalon nga mga pagkabutang. Dapat ilakip sa sini nga mga donasyon ang isa ka malip-ot nga sulat nga nagasiling nga ini isa ka direkta nga regalo.

KAHIMUSAN SA PAGDONAR NGA MAY KONDISYON

Mahimo man ibutang sa ngalan sang Watch Tower ang kuarta agod gamiton sa bug-os nga kalibutan. Apang, kon pangabayon, mahimo ibalik ang kuarta. Para sa dugang nga impormasyon, pakig-anguti palihug ang Treasurer’s Office sa adres nga ginsambit sa ibabaw.

CHARITABLE PLANNING

Wala labot sa direkta nga mga regalo nga kuarta, may iban pa nga paagi sang paghatag nga makabulig sa bug-os kalibutan nga pag-alagad sa Ginharian. Nagalakip ini sa:

Paseguro: Mahimo hingadlan ang Watch Tower nga benepisyaryo sang isa ka kontrata sang paseguro sa kabuhi (life insurance) ukon isa ka plano sa pagretiro/pension.

Mga Deposito sa Bangko: Ang mga deposito sa bangko, sertipiko sang deposito, ukon indibiduwal nga deposito sa pagretiro mahimo ibutang sa ngalan ukon ihatag sa Watch Tower kon mapatay, nahisanto sa mga kondisyones sang lokal nga bangko.

Stocks kag Bonds: Mahimo idonar sa Watch Tower ang stocks kag bonds subong direkta nga regalo.

Real Estate: Ang sarang mabaligya nga real estate (balay, bilding, kag lote) mahimo idonar paagi sa direkta nga pagregalo ukon, kon balay naman, paagi sa pagreserba sini sa donor, amo nga padayon sia nga makaistar sa sini mientras nga sia buhi. Pakig-anguti ang sanga talatapan sa inyo pungsod antes isaylo ang titulo sang bisan ano man nga real estate.

Gift Annuity: Ang gift annuity isa ka kasugtanan diin ginasaylo sang isa ang kuarta ukon securities sa isa ka korporasyon sang Watch Tower. Bilang kabaylo, ang donor, ukon ang isa nga gintangduan sang donor, regular nga makabaton sing espesipiko nga bayad nga annuity kada tuig mientras buhi sia. Sa tuig nga nagsugod ang gift annuity, mabuhinan na ang iya ginabayaran nga buhis.

Mga Testamento kag mga Trust Agreement: Mahimo ipasubli sa Watch Tower ang pagkabutang ukon kuarta paagi sa isa ka testamento nga ginhimo suno sa legal nga paagi, ukon himuon ang Watch Tower subong benepisyaryo sang isa ka trust agreement. Kon ang benepisyaryo isa ka relihioso nga organisasyon, ang iya ginabayaran nga buhis mabuhinan.

Subong ginapahangop sang termino nga “charitable planning,” ining sahi sang mga donasyon nagakinahanglan sang pagplano sa bahin sang nagdonar. Agod buligan ang mga indibiduwal nga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga ginatig-uluhan Charitable Planning to Benefit Kingdom Service Worldwide. Ginbalhag ang brosyur agod maghatag sing impormasyon tuhoy sa nanuhaytuhay nga paagi sang pagdonar karon ukon sa tion sang kamatayon. Pagkatapos mabasa ang brosyur kag makonsulta ang ila mga abogado ukon manugkwenta sang buhis, nakabulig ang madamo sa pagsuportar sa relihioso nga mga hilikuton kag sa mga buhat sang kaluoy nga ginahimo sang mga Saksi ni Jehova sa bug-os nga kalibutan kag sa amo nabuhinan sing daku ang ila ginabayaran nga buhis. Ini nga brosyur matigayon paagi sa pagpangabay sing kopya direkta sa Charitable Planning Office.

Para sa dugang nga impormasyon, mahimo kamo makig-angot sa Charitable Planning Office, paagi sa sulat ukon sa telepono, sa direksion nga nalista sa ubos ukon makig-angot sa sanga talatapan sang mga Saksi ni Jehova sa inyo pungsod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Credit Line sang retrato sa pahina 27]

Faithful video: Stalin: U.⁠S. Army photo