1-3. Ano ang nalakip sa pag-alagad kay Jehova sing “bug-os tagipusuon”? Iilustrar.

TANAN kita indi himpit kag makasala. Pero maayo lang kay wala kita ginapakig-angutan ni Jehova “sang nagakabagay sa aton mga sala,” basta nagahinulsol kita kag nagatuo sa iya kag mapainubuson nga nagapalapit sa iya base sa halad-gawad ni Jesus. (Sal. 103:10) Pero subong sang ginsiling ni David kay Solomon, para batunon ni Jehova ang aton pagsimba sa iya kada adlaw, dapat ‘alagaron naton sia sing bug-os tagipusuon.’ (1 Cron. 28:9) Paano naton ini mahimo kay indi kita himpit?

² Para buligan kita, mahimo naton ipaanggid ang kabuhi ni Hari Asa kay Hari Amazias. Pareho sila nga hari sang Juda kag ginhimo nila ang matarong sa panulok ni Jehova, pero si Asa lang ang may bug-os nga tagipusuon. (2 Cron. 15:16, 17; 25:1, 2; Hulu. 17:3) Sila nga duha indi himpit kag nakahimo sing sala. Pero ginatinguhaan pirme ni Asa nga sundon ang mga dalanon sang Dios, kay “bug-os ang debosyon” sang iya tagipusuon sa Dios. (1 Cron. 28:9, footnote) Si Amazias naman indi bug-os ang debosyon kay Jehova. Sang nadaug niya ang mga kaaway  sang Dios, gindala niya ang ila mga dios kag ginsimba ini.—2 Cron. 25:11-16.

³ Ang pag-alagad sa Dios sing “bug-os tagipusuon” nagalakip sang wala untat nga debosyon. Sa Biblia, ang tinaga nga “tagipusuon” masami nga nagapatuhoy sa nasulod nga pagkatawo sang isa. Lakip sini ang iya handum, panghunahuna, disposisyon, panimuot, ikasarang, motibasyon, kag mga tulumuron. Gani ang nagaalagad kay Jehova sing bug-os tagipusuon wala nagapakunokuno sa pag-alagad. Indi pakulahaw ang pagsimba niya kay Jehova. Kamusta kita? Bisan pa nga indi kita himpit, mapadayon naton ang bug-os nga debosyon sa Dios, kag maalagad sia sing putli kag bug-os tagipusuon.—2 Cron. 19:9.

4. Ano ang aton binagbinagon?

⁴ Para mahangpan pa gid naton kon paano mag-alagad sa Dios sing bug-os tagipusuon, binagbinagon naton ang kabuhi ni Asa kag ang iban nga hari sang Juda nga nag-alagad sa Dios sing matutom—sanday Jehosapat, Ezequias, kag Josias. Nakasala sila nga apat, pero nahamut-an gihapon sila ni Jehova. Ngaa gintamod sila sang Dios nga nag-alagad sa iya sing bug-os tagipusuon, kag paano naton sila mailog?

5. Ano ang ginhimo ni Asa?

⁵ Si Asa amo ang ikatlo nga hari sang Juda sugod nga nagbulag ang napulo ka tribo sang Israel sa naaminhan. Gin-untat niya ang idolatriya sa iya ginharian kag gintabog ang makihilawason nga mga lalaki sa templo. Ginpahalin niya sa “pagkarayna bisan gani ang iya lola nga si Maaca, bangod naghimo sia sing makangilil-ad nga diosdios.” (1 Hari 15:11-13) Dugang pa, ginpalig-on ni Asa ang iya katawhan “nga pangitaon nila si Jehova . . . kag tumanon nila ang Kasuguan kag ang sugo.” Huo, ginsakdag niya ang matuod nga pagsimba.—2 Cron. 14:4.

6. Ano ang ginhimo ni Asa sang ginsalakay sang mga Etiopianhon ang Juda?

⁶ Ginpakamaayo ni Jehova ang Juda kag may paghidait ini sa nahauna nga napulo ka tuig nga paggahom ni Asa. Sang ulihi, ginsalakay ni Zera nga Etiopianhon ang Juda upod ang 1,000,000 ka soldado kag 300 ka kangga. (2 Cron. 14:1, 6, 9, 10) Ano ang ginhimo ni Asa? Nagsalig sia sing bug-os kay Jehova. (Basaha ang 2 Cronica 14:11.) Bilang sabat sa pangamuyo ni Asa, ginpadaug sia sang Dios paagi sa paglaglag sing bug-os sa mga soldado sang Etiopia. (2 Cron. 14:12, 13) Bisan pa indi matutom ang mga hari kay Jehova, mahimo padaugon niya gihapon sila sa ila mga kaaway tungod sa iya ngalan. (1 Hari 20:13, 26-30) Sa bahin ni Asa, nagsalig sia kay Jehova, kag ginsabat sang Dios ang iya pangamuyo. Pero sang ulihi, nakasala si Asa. Halimbawa, wala sia nangayo sing bulig kay Jehova kundi sa hari sang Siria. (1 Hari 15:16-22) Pero bisan amo pa sini, nakita sang Dios nga ang tagipusuon ni Asa “bug-os kay Jehova sa bug-os niya nga kabuhi.” Paano naton mailog si Asa sa paghimo sing maayo?—1 Hari 15:14.

7, 8. Paano mo mailog si Asa sa pag-alagad kay Jehova?

⁷ Mahimo usisaon naton ang aton tagipusuon kon bala bug-os ang aton debosyon sa Dios. Pamangkuta ang imo kaugalingon, ‘Determinado bala ako nga pahamut-an si Jehova, pangapinan ang matuod nga pagsimba, kag amligan ang iya katawhan sa malain nga impluwensia?’ Dapat gid nga mangin maisog si Asa para mabatuan niya si Maaca, nga rayna sang Juda! Mahimo  nga wala ka sing nakilala nga nagagawi pareho kay Maaca, pero basi may mga kahimtangan nga mahimo mo mailog ang kakugi ni Asa. Halimbawa, ano abi kon makasala ang isa ka miembro sang imo pamilya ukon ang isa mo ka suod nga abyan, kag ma-disfellowship sia kay wala maghinulsol? Mauntat ka bala sa pagpakig-upod sa iya? Ano ang imo himuon?

⁸ Pareho ni Asa, mapakita mo nga may bug-os ka nga tagipusuon paagi sa pagsalig gid sa Dios kon daw nabudlayan ka gid sang pila ka pagpamatok. Mahimo nga ginasunlog ka sa eskwelahan ukon ginapakalain kay isa ikaw ka Saksi ni Jehova. Ukon mahimo ginauligyat ka sang imo mga kaupod sa trabaho kay wala ka nag-obra sing pila ka adlaw para sa espirituwal nga mga hilikuton ukon kay wala ka pirme nagaobertaym. Kon amo sini ang kahimtangan, mangamuyo sa Dios pareho sang ginhimo ni Asa. Mangin maisog kag magsalig kay Jehova, kag padayon nga himua ang husto. Dumduma nga ginpalig-on sang Dios si Asa, kag palig-unon ka man Niya.

9. Kon nagabantala, paano naton mapakita nga bug-os ang aton tagipusuon?

⁹ Nagaulikid ang mga alagad sang Dios sa iban. Ginpasanyog ni Asa ang matuod nga pagsimba. Gani, ginabuligan man naton ang iban nga ‘pangitaon si Jehova.’ Nalipay gid si Jehova kon makita niya nga ginasugid naton sia sa aton mga kaingod kag sa iban, kag ginahimo naton ini bangod sang aton gugma sa iya kag sa dayon nga kaayuhan sang iban!

10, 11. Paano mo mailog si Jehosapat?

¹⁰ “Ginsunod [ni Jehosapat] ang dalanon sang iya amay nga si Asa.” (2 Cron. 20:31, 32) Paano? Pareho sang iya amay, ginpalig-on ni Jehosapat ang mga tawo nga pangitaon si Jehova. Ginhimo niya ini paagi sa pagpadala sang mga tawo para tudluan ang katawhan sang “libro sang Kasuguan ni Jehova.” (2 Cron. 17:7-10) Nagkadto pa gani sia sa sakop sang naaminhan nga ginharian sang Israel, sa kabukiran sang Efraim, “agod pabalikon sila kay Jehova.” (2 Cron. 19:4) Si Jehosapat isa ka hari “nga nagpangita kay Jehova sing bug-os tagipusuon.”—2 Cron. 22:9.

¹¹ Mahimo kita makapakigbahin sa hilikuton ni Jehova nga tudluan ang mga tawo. Tulumuron mo bala kada bulan nga tudluan ang iban sang Pulong sang Dios kag pahulagon sila nga alagaron ang Dios? Kon tinguhaan mo ini kag pakamaayuhon ka sang Dios, mahimo nga makasugod ka sing pagtuon sa Biblia. Ginapangamuyo mo bala ini? Handa ka bala nga himuon ini bisan pa nga dapat mo gamiton ang tion nga kuntani para na sa imo? Kag pareho ni Jehosapat nga nagkadto sa teritoryo sang Efraim para buligan ang katawhan nga magbalik sa matuod nga pagsimba, mahimo naton palig-unon ang mga indi aktibo. Dugang pa, ang mga gulang nagaduaw kag nagatanyag sing bulig sa mga na-disfellowship sa teritoryo sang ila kongregasyon nga nag-untat na sa ila nabuhat nga sala.

12, 13. (a) Ano ang ginhimo ni Jehosapat sang nahadlok sia? (b) Ngaa nga dapat naton ilugon ang halimbawa ni Jehosapat?

¹² Pareho sang iya amay nga si Asa, nagpabilin nga matutom si Jehosapat sa Dios bisan pa nga salakayon sia sang tuman kadamo nga kaaway. (Basaha ang 2 Cronica 20:2-4.) Pero bisan hinadlukan sia, “namat-od sia nga pangitaon si Jehova.” Sa iya pangamuyo, mapainubuson nga ginbaton niya nga ang iya katawhan ‘wala sing kusog sa pagbato sa sining daku nga kadam-an’  kag indi sila makahibalo kon ano ang ila himuon. Nagsalig gid sia kay Jehova, nga nagasiling: “Nagasalig kami sa imo.”—2 Cron. 20:12.

¹³ Pareho ni Jehosapat, mahimo nga indi kita makahibalo kon kaisa sang aton himuon kag mahimo nga nahadlok pa kita. (2 Cor. 4:8, 9) Pero dumduma nga ginbaton ni Jehosapat sa atubangan sang katawhan sang nangamuyo sia sing matunog nga wala sila sing mahimo. (2 Cron. 20:5) Mahimo ilugon sang mga ulo sang pamilya si Jehosapat paagi sa pagpangayo sing panuytoy kag kabakod kay Jehova para maatubang nila ang ila problema. Indi mahuya nga mabatian sang imo pamilya ini nga mga pangamuyo. Mabatyagan nila nga nagasalig ka kay Jehova. Ginbuligan sang Dios si Jehosapat, kag buligan ka man niya.

14, 15. Paano nagsalig sing bug-os si Ezequias sa Dios?

¹⁴ Ang isa pa ka hari nga ‘nagpabilin nga matutom kay Jehova’ amo si Ezequias, pero indi pareho ni Jehosapat, dapat isikway niya ang malain nga impluwensia sang iya amay nga nagasimba sa mga idolo. Ginguba ni Ezequias ang ‘sagrado nga mataas nga mga duog, gindugmok ang sagrado nga mga haligi, kag gin-utod ang sagrado nga mga poste. Gindugmok man niya ang saway nga man-ug nga ginhimo ni Moises,’ kay ginasimba ini sang katawhan. Matutom gid sia kay Jehova, kay “gintuman niya ang mga sugo nga ginhatag ni Jehova kay Moises.”—2 Hari 18:1-6.

¹⁵ Nagsalig man si Ezequias kay Jehova sang ginsakop sang pinakagamhanan sadto nga pungsod nga Asiria ang Juda kag tuyo sini nga laglagon ang Jerusalem. Ginyaguta si Jehova ni Hari Senaquerib sang Asiria kag gintinguhaan niya nga pahugon si Ezequias para mag-ampo. Pero ginpabutyag ni Ezequias sa iya pangamuyo nga nagasalig gid sia nga luwason ni Jehova. (Basaha ang Isaias 37:15-20.) Ginsabat sang Dios ang iya pangamuyo paagi sa pagpadala sing isa ka anghel para patyon ang 185,000 ka soldado sang Asiria.—Isa. 37:36, 37.

16, 17. Paano mo mailog si Ezequias samtang nagaalagad ka sa Dios?

¹⁶ Sang ulihi nagmasakit si Ezequias kag daw mapatay sia. Nakiluoy sia kay Jehova nga dumdumon ang iya katutom sa Iya. (Basaha ang 2 Hari 20:1-3.) Nahibaluan naton sa Kasulatan nga wala na subong sing milagro nga ginahimo ang Dios para ayuhon ang aton balatian ukon sugpunan ang aton kabuhi. Pero pareho ni Ezequias, puede kita makapangamuyo kay Jehova: “Nangin matutom ako sa imo kag bug-os ang akon tagipusuon sa imo.” Nagapati ka bala nga handa si Jehova kag masarangan niya nga buligan ka kon magbalatian ka?—Sal. 41:3.

¹⁷ Kon pamalandungan naton ang halimbawa ni Ezequias, mahimo may mga butang nga dapat naton isikway nga makaguba sa aton kaangtanan sa Dios ukon makapahilayo sa aton sa matuod nga pagsimba. Indi naton luyag nga ilugon ang mga tawo sa kalibutan nga daw nagasimba na sa iban paagi sa social media. Matuod nga may pila ka Cristiano nga nagagamit sini sa pagkomunikar sa ila pamilya ukon suod nga mga abyan. Pero madamo sa kalibutan ang nagaabuso sa paggamit sini kay ginahibalo pa gani nila kon ano ang nagakatabo sa mga tawo nga indi nila kilala. Ukon nagakaubos na ang ila tion sa paglantaw sang mga retrato ukon sang mga komento parte sa pila ka indibiduwal. May katalagman nga maapektuhan ang isa sa wala pulos nga  mga butang. Mahimo nga magpabugal ang isa ka Cristiano kay madamo ang nanamian sang iya gin-post, kag mahimo pa gani nga maakig sia kon wala na ini ginalantaw sang iban. Maimadyin bala naton si apostol Pablo ukon si Aquila kag Priscila nga ang ila lang ginahimo kada adlaw amo ang pag-post sang ila mga retrato ukon pagbasa sang mga impormasyon parte sa indi mga tumuluo? Mabasa naton nga si Pablo ‘masako gid sa pagbantala sang pulong sang Dios.’ Kag ginhinguyang nanday Priscila kag Aquila ang ila tion sa pagpaathag sa iban ‘sing sibu pa sang dalanon sang Dios.’ (Binu. 18:4, 5, 26) Mahimo pamangkuton naton ang aton kaugalingon, ‘Daw ginasimba ko na bala ang mga tawo ukon nagakaubos na bala ang akon tion sa wala pulos nga mga butang?’—Basaha ang Efeso 5:15, 16.

18, 19. Paano mo mailog si Josias?

¹⁸ Si Hari Josias, nga apo sa tuhod ni Ezequias, nagtuman gid sang mga sugo ni Jehova “sa bug-os niya nga tagipusuon.” (2 Cron. 34:31) Sang tin-edyer pa sia, “ginpangita niya ang Dios ni David,” kag sang 20 anyos na sia, gindula niya ang idolatriya sa Juda. (Basaha ang 2 Cronica 34:1-3.) Mas makugi sia sa pagpahamuot sa Dios sangsa madamo nga hari sang Juda. Pero sang nasapwan ang orihinal nga mga sinulatan sang Mosaikong Kasuguan kag ginbasa ini kay Josias, narealisar niya nga dapat himuon pa gid sing bug-os ang kabubut-on sang Dios. Ginpalig-on niya ang iban nga alagaron si Jehova. Amo kon ngaa nga samtang nagakabuhi si Josias, “gintuman [sang katawhan] si Jehova.”—2 Cron. 34:27, 33.

¹⁹ Pareho ni Josias, dapat pangitaon sang mga pamatan-on si Jehova samtang bata pa sila. Mahimo gintudluan sang naghinulsol nga si Hari Manases si Josias parte sa kaluoy sang Dios. Mga pamatan-on, mangin suod sa mga matutom nga may edad na sa inyo pamilya kag sa kongregasyon kag hibalua kon paano sila ginpakamaayo ni Jehova. Dumduma man nga sang ginbasa ang Kasulatan, nalab-ot ang tagipusuon ni Josias kag nanghikot sia. Kon basahon mo ang Pulong sang Dios, mahimo magabakod ang imo pagpakig-abyan sa Dios kag mangin malipayon ka, kag mapahulag ka pa gid nga buligan ang iban nga makilala ang Dios. (Basaha ang 2 Cronica 34:18, 19.) Ang pagtuon sa Biblia makabulig man sa imo nga mahibaluan ang dapat mo pa himuon para mapauswag ang imo pag-alagad sa Dios. Kon ginahimo mo ini, iaplikar ang imo natun-an pareho ni Josias.

20, 21. (a) Ano ang pareho nga ginhimo sang apat ka hari? (b) Ano ang binagbinagon naton sa masunod nga artikulo?

²⁰ Ano ang natun-an naton sa apat ka hari sang Juda nga nag-alagad kay Jehova sing bug-os tagipusuon? Nangin makugi sila sa paghimo sang kabubut-on sang Dios kag bug-os ang ila debosyon sa iya. Padayon nila nga ginhimo ang kabubut-on sang Dios bisan pa nga may gamhanan sila nga mga kaaway. Labaw sa tanan, gin-alagad nila si Jehova bangod ginahigugma nila sia.

²¹ Sa masunod nga artikulo, matun-an naton nga ining apat ka hari nakahimo sing mga sala. Pero sang gin-usisa sila sang Manug-usisa sang tagipusuon, nakita niya nga bug-os ang ila tagipusuon sa iya. Indi man kita himpit. Kon ginausisa kita ni Jehova, makita man bala niya nga ginaalagad naton sia sing bug-os tagipusuon? Binagbinagon naton ini sa masunod nga artikulo.